IMEANDIKWA NA : ERICK SHIGONGO
*********************************************************************************
Sehemu Ya Kwanza (1)
MIKE MARTIN 1958-1996
ILIKUWA ni alfajiri yenye mawingu mazito angani. Kila mtu alijua mvua ingenyesha siku hiyo kwani dalili zote za mvua zilikuwepo angani. Waliokuwa wamelala walizidi kujifunika mablanketi vitandani mwao na waliokuwa wameamka walivaa masweta na kuendelea na shughuli zao za kila siku. Ndege wa kila aina walisikika wakilia mitini, jambo lililoashiria kuwa siku mpya ilikuwa imeanza.
Wakati huo Mike Martin alikuwa mwanafunzi wa kidato cha tatu katika Shule ya Sekondari ya Nsumba. Alikuwa kijana mkimya, mtaratibu na asiye na makuu katika mambo yake. Akiwa katika umri wa miaka kumi na minane, Mike alikuwa kijana mwenye uwezo mkubwa sana darasani. Alijali na kutilia maanani sana masomo yake.
CHANZO: https://deusdeditmahunda.blogspot.com/
Zaidi ya hayo, Mike alikuwa na uwezo mkubwa wa kuongea na kuandika kwa lugha ya Kiingereza, jambo lililofanya awe kivutio kikubwa sana miongoni mwa wanafunzi wenzake. Walimu wake walijivunia kuwa na mwanafunzi kama yeye.
Sifa za Mike hazikuishia hapo, alikuwa na sifa nyingine tena ya ziada ambayo ni kucheza muziki. Sio siri, Mike alijua namna ya kuucheza muziki, hasa wa Pop, kiasi kwamba wanafunzi wenzake walimbandika jina la “Double M” au Michael Jackson wa Tanzania!
Sifa za Mike zilitapakaa sana katika shule zote za sekondari mjini Mwanza, hasa katika shule ya Ngaza ambako alikuwa gumzo kwa kila msichana. Kutokana na sifa hizo wasichana wengi walitamani sana kumwona Mike ana kwa ana.
Mara kwa mara alipokea barua, kadi na maua kutoka kwa wasichana mbalimbali asiowafahamu wa shule ya Nganza. Sifa nyingine kubwa aliyokuwa nayo ambayo iliwashangaza hata wanafunzi wenzake ni uhusiano wake na wasichana. Mike hakuwahi kutembelewa na mwanafunzi wa kike kutoka shule nyingine ambaye wanafunzi wenzake wangeweza kuhisi alikuwa mpenzi wake!
Pamoja na kufikisha umri wa miaka kumi na minane alikuwa bado hajakutana na mwanamke kimapenzi. Si kwamba alikuwa na kasoro, ila hakuona umuhimu wa kufanya mawasiliano na wasichana kwa wakati huo. Jambo hilo liliwatesa wasichana wengi waliotamani kuwa na uhusiano naye kimapenzi.
Kijiografia shule za sekondari za Nsumba na Nganza zilikuwa jirani zikiwa zimetenganishwa na kilima kidogo tu katikati. Kwa muda mrefu wanafunzi wa shule hizo walikuwa na uhusiano mzuri wa ujirani mwema.
Wanafunzi wa shule ya Nsumba walipokuwa na sherehe, waliwakaribisha wanafunzi wa shule ya Nganza ambayo ilikuwa ni ya wasichana watupu.
Vilevile, wanafunzi wa Nganza walipokuwa na sherehe waliwaalika wanafunzi wa shule ya Nsumba iliyokuwa ya wavulana watupu, kwenda kucheza nao muziki. Huo ndio uliokuwa uhusiano wa shule hizo mbili.
***
Mara ya kwanza Mike kufika shuleni Nganza ilikuwa Mei 23, 1975. Siku hiyo wanafunzi wa Nsumba walikuwa wamealikwa kwenye malumbano ya hoja ambayo kwa kimombo huitwa “debate.” Yalikuwa ni juu ya Yapi Yalikuwa Maisha Bora kati ya Maisha ya Mjini na ya Vijijini. Malumbano hayo yalifanyika katika ukumbi wa sherehe wa shule ya Nganza.
Mike alipoondoka Nganza, nyuma yake aliacha gumzo kwa jinsi alivyojichukulia pointi nyingi baada ya kuongea Kiingereza kama mtu aliyezaliwa Uingereza! Aliwavuta wasichana wengi sana.
Miongoni mwa wasichana waliochanganyikiwa juu yake, alikuwa ni Beatrice Rugakingira. Huyu alikuwa ni msichana mrembo kutoka mkoa wa Kagera, aliyekuwa mwanafunzi wa kidato cha pili shuleni hapo.
Beatrice alipomwona Mike akiongea, alijihisi kuchanganyikiwa! Ni wazi nyota ya Mike iliishinda ya Beatrice na kuiburuza vibaya mno. Beatrice alitamani sana kuongea na Mike lakini alishindwa aanze vipi kwa kuwa wasichana wengi walimfuata baada ya malumbano hayo na kumwomba anwani yake na vitu vingine.
Hivyo Beatrice hakubahatika kabisa kuongea naye kitu chochote mpaka anaondoka, jambo hilo lilimuuma sana moyoni mwake lakini yote alimwachia Mungu. Aliamua kuwa mvumilivu akikumbuka methali isemayo milima haikutani lakini binadamu hukutana. Aliamini siku moja angekutana na Mike na kumweleza kilichokuwa kikiendelea moyoni mwake.
Tabia za wasichana katika shule ya Nganza ziligawanyika katika makundi matatu. Walikuwepo waliokuwa na uhusiano wa kimapenzi na wavulana kutoka shule mbalimbali za sekondari mjini Mwanza kama vile Bwiru na Nsumba.
Kundi jingine lilikuwa ni la waliokuwa na uhusiano na wafanyabiashara maarufu mjini humo na kundi la tatu na la mwisho, lilikuwa ni la wasichana walioliwazana wenyewe kwa wenyewe. Hawa waliitwa wasagaji au lusibo.
Tofauti sana na wasichana wengi, Beatrice alikuwa msichana mpole ambaye katika umri wake wa miaka kumi na mitano, kama ilivyokuwa kwa Mike, hakujihusisha na kundi lolote kati ya hayo matatu. Kifupi alikuwa hajawahi kukutana kimwili na mwanamume yeyote, jambo ambalo halikuwa rahisi kwa wasichana wa shule ya Nganza wa wakati ule.
Ilikuwa ni Januari 27, 1976 siku ambayo wanafunzi mia moja wa shule ya Nganza walialikwa kwenda kucheza disko na wanafunzi wa shule ya wavulana ya Nsumba katika sherehe ya kuwakaribisha wanafunzi wa kidato cha kwanza shuleni hapo iliyojulikana kwa jina la “Welcome Form One!” Kiranja mkuu wa shule ya Nganza, Neema Lucas, alipopewa barua hiyo na mwalimu wa zamu alifanya hima kuwatangazia wanafunzi wenzake na kuwaomba waliopenda kwenda Nsumba wajiandikishe mapema.
Beatrice aliiona nafasi ile kama bahati ya mtende na alikuwa mtu wa sita kujiandikisha. Lengo lake halikuwa kucheza muziki bali kuonana na Mike Martin, mwanaume aliyetokea kuunyanyasa moyo wake kwa nguvu zote.
Kitendo cha Beatrice kujiorodhesha kati ya wasichana waliotaka kwenda Nsumba kilizusha mjadala mkali kati ya wasichana wa Nganza. Beatrice, ambaye siku zote alionekana mlokole, aliwafanya wengi kujiuliza imekuwaje hata akaamua kwenda Nsumba kucheza disko siku hiyo? Wengi walihofu huenda Beatrice naye alikuwa ameanza kuangukia dhambini.
“Hata wewe Beatrice? Ya leo kali!” mwanafunzi mmoja alimuuliza Beatrice baada ya kulisoma jina lake ubaoni.
“Ni lazima niende, siendi kucheza bali nawapelekea watu habari njema! Bila kuwafuata kwenye kumbi zao za starehe wataupataje wokovu? Mbona Kristo alikula na watoza ushuru?” Beatrice hakuwa na njia yoyote ya kujitetea zaidi ya kutumia Biblia hiyohiyo ingawa lengo lake lilikuwa ni kumfuata Mike.
***
Wakati wasichana kutoka Ngaza wakiwasili katika viwanja vya Nsumba, Mike alikuwa bwenini akimalizia kufanya mazoezi ya kucheza shoo ya muziki wa “Thriller” wa Michael Jackson uliokuwa umepangwa kutumika katika onyesho siku hiyo. Pamoja na kuwepo bwenini katika mazoezi makali na ya mwisho alifanikiwa kuliona lori lililokuwa limewachukua wanafunzi wa Nganza likiingia shuleni kwao.
Kitu cha kwanza ambacho wasichana hao walifanya baada ya kuteremka kutoka kwenye lori lililowaleta ni kuuliza mahali alipokuwepo Mike. Jambo hilo lilimkera sana Beatrice, alihisi nafasi yake ya kukutana na Mike ilikuwa finyu.
CHANZO: https://deusdeditmahunda.blogspot.com/
Muda wa kuanza kwa sherehe hiyo ulipotimu, wanafunzi wa vidato vyote walifurika katika ukumbi wa starehe wa shule ya Nsumba na sherehe ikaanza mara moja.
Macho ya wanafunzi wa Nganza yalizunguka huku na kule ukumbini yakimsaka Mike bila mafanikio. Mike alikuwa bado yuko bwenini akivaa nguo zake za kung’ara zilizomfanya afanane kabisa na Michael Jackson.
Majira ya saa sita usiku, wakati sherehe ikiwa imepamba moto, mshereheshaji au MC kwa Kiingereza, Zablon Julius, aliyekuwa kiranja mkuu wa shule ya Nsumba, aliomba muziki usimamishwe na kuwataka wanafunzi wote wakae vitini na kuacha ukumbi wazi. Muziki uliposimamishwa hakupoteza muda, aliongea kwa sauti ya juu.
“Jamani naomba mkae kwenye viti vyenu mtulie. Hivi sasa ni kipindi cha onyesho maalumu, Show time na tunamkaribisha, The Tanzanian Michael Jackson au Double M aje kutuonyesha show ya wimbo wa “Thriller” ulioimbwa na Michael Jackson.”
Alipomaliza tu kusema hayo ukumbi wote ulipiga mayowe kushangilia na taa zikawashwa ili Mike aonekane vizuri.
Beatrice aliyekuwa amekaa nyuma kabisa ya ukumbi akiwa hajacheza hata muziki mmoja tangu disko lianze, alisogea mbele ili apate kumwona vyema mtu aliyekuwa akiusumbua moyo wake kwa kipindi kirefu.
Baada ya kukaribishwa, Mike hakupoteza muda. Aliingia ukumbini, kitu cha kwanza kukifanya kilikuwa ni kuinua mikono yake juu na kutamka kwa sauti ya juu, “Hi everybody?”
Kauli hiyo iliamsha shamrashamra ya aina yake na waliokuwepo ukumbini walizidi kupiga kelele na kushangilia “Cool Mameeeeeen!” kila mtu aliitika.
DJ alianza kuachia wimbo wa “Thriller” taratibu na Mike akaanza kufanya vitu vyake. Hakuna aliyeamini kama kweli Mike angeweza kufanya vitu vikubwa namna ile. Hata wanafunzi wa Nsumba wenyewe siku hiyo walishikwa na butwaa kwa jinsi Mike alivyojinyonganyonga kama hana mifupa mwilini! Wengi wa wanafunzi walisikika wakidai kwamba siku hiyo alicheza makusudi ili kuwazingua wasichana wa Nganza.
Beatrice alishindwa kujizuia. Alitamani sana kuongea na Mike ingawa hakujua kama Mike angeweza kupoteza muda wake kumsikiliza mtu kama yeye. Kwa mara ya kwanza katika maisha yake alihisi kutumbukia katika dimbwi kubwa la mapenzi ambalo lilionekana dhahiri kuutesa na kuugubika moyo wake.
Alijikuta akitafuta njia ambayo angeweza kuitumia kuwasiliana na Mike lakini bado hakuigundua kwa sababu karibu kila msichana alitaka kuongea naye.
Muziki ulipokaribia kwisha, ghafla Beatrice alipata wazo aliloona linafaa kuufikisha ujumbe. Aliingiza mkono kwenye mfuko wake wa sketi na kutoa kitabu kidogo, akachana kikaratasi na kuchukua kalamu, kisha akaanza kuandika. Alipomaliza alikichukua kile kikaratasi na kukiweka ndani ya noti na kuikunja!
Hakupoteza muda akaondoka moja kwa moja na kwenda katikati ya ukumbi alikokuwa Mike na kumtunza noti ile. Akiwa katikati ya muziki, huku watu wakimshangilia na wasichana wakimzunguka na kumpiga mabusu usoni, Mike aliipokea noti ile na kuiweka mfukoni mwake.
Baada ya onyesho aliondoka moja kwa moja hadi bwenini ambako alibadilisha nguo na kuvaa suti nzuri aliyonunuliwa kama zawadi na baba yake alipofanya vizuri katika mtihani wake na kuingia kidato cha pili!
Kabla hajaondoka bwenini kurudi ukumbini aliikumbuka ile noti aliyotunzwa na msichana wa Nganza. Ilikuwa ni pesa peke yake aliyotunzwa, akainyanyua suruali yake na kuitoa noti hiyo na kuikunjua. La haula! Ndani ya noti ile kulikuwa na kipande cha karatasi! Alikikunjua na kuanza kukisoma. Kilikuwa kimeandikwa kwa mwandiko mzuri sana:
Mike,
Naitwa Beatrice Rugakingira. Nilivutiwa na wewe kwa mara ya kwanza ulipokuja shuleni kwetu kwenye malumbano! Nahisi kukupenda Mike. Ninajua si kitu cha kawaida kwa msichana kuandika barua na kumtaka mvulana kimapenzi, lakini mimi nimeshindwa kuvumilia Mike na imebidi niseme!
Naapa kwamba siyo malaya na sijawahi kukutana na mvulana kimwili maishani mwangu, kitu ambacho unaweza usikiamini.
Naomba tuonane, tuongee kabla sijarudi Nganza. Tafadhali, usinielewe vibaya. Ni moyo wangu ndio unaonisumbua.
Ni mimi
Beatrice.
Barua ile haikumshtua sana Mike, kwani jambo lile lilikuwa la kawaida katika maisha yake. Alipomaliza kuisoma, aliiweka mfukoni na kuondoka tena kuelekea ukumbini. Aliingia ukumbini kwa siri kubwa na kujikita kwenye kiti cha nyuma kabisa.
Aliketi na kuanza kuwaangalia watu walivyokuwa wakicheza muziki. Ghafla, mawazo ya ile barua aliyoisoma yalimjia tena kichwani mwake! Alijaribu kuikumbuka sura ya msichana aliyempa barua ile bila mafanikio yoyote na kujikuta akijiinamia kwa mawazo.
Baada ya Beatrice kuzunguka ukumbini kwa muda mrefu, akimtafuta Mike bila mafanikio yoyote hatimaye alifanikiwa kumfuma akiwa amejificha kwenye giza. Alijongea taratibu mpaka sehemu ile na kusimama nyuma yake kwa takribani dakika tatu, bila kumwita wala kumgusa huku moyo ukimwenda mbio.
Baadaye Mike alihisi moyo ukimwenda mbio, alihisi mtu akimgusa begani! Alipogeuka sura yake iligongana na ya msichana mrembo, mweusi, mwenye ngozi nyororo na sura ya Kinyarwanda. Akamkumbuka kuwa ndiye aliyemtunza noti.
“Hallow habari yako?” Beatrice alimsabahi huku akitabasamu.
“Ni nzuri tu,” Mike aliitika.
“Karibu dada hakuna tatizo,” Mike alijibu.
Beatrice aliona huo ulikuwa wakati mwafaka kwake kuulizia ujumbe wake.
“Naitwa Beatrice Rugakingira, nafikiri ujumbe wangu umeupata?”
“Ah! Ndiyo! Nimeuona. Kumbe ni wewe!” Mike aliijibu kwa upole.
Baada ya mazungumzo ya muda mfupi walitoka ukumbini na kuelekea bustanini. Wakiwa huko Beatrice alimweleza Mike kila kitu kuhusu alivyojisikia mpaka wakati huo. Mike alishindwa kutoa jibu sahihi, kama alimridhia au la.
“Tafadhali Mike nipe ukweli, unanitesa mwenzio!” Beatrice alilalama huku machozi yakimtoka.
Mike alishindwa kumjibu na badala yake alibaki kimya, ameduwaa.
Waliendelea kuwa pamoja, ilipotimu saa tisa na nusu ya usiku Mike na Beatrice walikuwa bado wapo bustanini. Muda wa kuondoka ulipofika wanafunzi wa Nganza walianza kukusanywa kwa safari ya kurudi shuleni kwao. Wanafunzi wote walikuwepo kwenye gari isipokuwa Beatrice. Mwalimu aliyeongozana na wanafunzi kwenda Nsumba aliamuru Beatrice atafutwe haraka iwezekanavyo kabla hawajaondoka.
Baada ya msoko wa hapa na pale wanafunzi wa Nganza walifanikiwa kuwafuma Beatrice na Mike wakiwa wamekumbatiana bustanini. Wanafunzi hao walishangaa kumwona mlokole Beatrice katika hali ile.
Hata hivyo, walichofanya ni kumvuta tu Beatrice na kuondoka naye. Alipofika mbele hatua kama tano Beatrice aligeuka nyuma na kumwangalia Mike.
“Nenda tu, nitakuandikia barua,” Mike alisema wakati akiondoka. Beatrice alimpungia mkono Mike, huo ndio ukawa mwanzo wa Beatrice na Mike kukutana na kupendana.
CHANZO: https://deusdeditmahunda.blogspot.com/
Wiki moja baadaye Mike alipokea zawadi ya kanda kutoka kwa Beatrice. Kanda ile ilikuwa imerekodiwa sauti ya Beatrice akilia huku akimwomba Mike amhurumie na kukubali kuwa mpenzi wake.
Ilimaliza kwa ujumbe kutoka katika wimbo wa taarab usemao Jamani Mapenzi Yananitatiza ulioimbwa na JKT Taarab.
Kanda hiyo ilimchanganya sana Mike na kwa mara ya kwanza katika maisha yake, alihisi kumpenda msichana kwa dhati. Siku iliyofuata alimwandikia barua kulikubali rasmi ombi lake lakini kwa masharti kwamba penzi hilo liwe la kawaida, siyo linaloshirikisha tendo la ndoa.
Urafiki wao uliendelea mpaka Mike akamaliza kidato cha nne na kujiunga na kidato cha tano katika Shule ya Sekondari ya Nyakato iliyoko Bukoba ambako alisoma hadi kumaliza kidato cha sita.
Baada ya kumaliza kidato cha nne Beatrice hakuendelea na kidato cha tano bali alijiunga na Chuo cha Uuguzi cha Rubya ambacho pia kipo mkoani Kagera, kwa kozi ya miaka minne ya Uuguzi na Ukunga.
Baada ya kumaliza kidato cha sita, Mike alibahatika kupata nafasi ya kwenda kusomea Shahada ya Uchumi katika Chuo Kikuu cha Oxford, nchini Uingereza. Kabla hajaondoka, walikuwa tayari wamepanga kuoana baada ya kumaliza masomo yao. Mike alimsihi Beatrice awe mvumilivu na mwaminifu katika kipindi chote ambacho angekaa Uingereza ili atakaporudi wafunge ndoa yao!
***
Mike alisafiri hadi Dar es Salaam ambako alipokewa na baba yake mdogo, mzee Joshua, ambaye alimfanyia taratibu zote za usafiri.
Kabla ya safari yake ya Uingereza yeye na mtoto wa mzee Joshua, Consolatha, walikwenda Zanzibar ambapo Mike alinunua nguo na vitu mbalimbali vya safari.
Wakiwa njiani kutoka Zanzibar waliongea mambo mengi kuhusu maisha. Mike alimuuliza Consolatha alichotaka kufanya katika maisha yake. Consolatha alimjibu kuwa kama angefanikiwa kumaliza na kufanya vizuri kidato cha sita wazazi wake walikuwa wamepanga aende Marekani kwa mama yake mdogo ambako angesomea Udaktari wa Mifupa.
Alidai hiyo ilikuwa ndiyo kazi pekee ambayo angependa kuifanya maishani mwake. Siku mbili baadaye, Mike alipanda ndege ya Shirika la Ndege la Uingereza, British Airways, kuelekea Uingereza kupitia Copenhagen. Alikuwa ni mtu mwenye furaha kupita kiasi, aliona ndoto zake zikitimia! Katika maisha yake alitaka kuwa mtu mkubwa na mwenye madaraka katika nchi na kwa kwenda kusoma Uingereza aliamini hilo lilikuwa limetimia.
***
Alikuwa wa kwanza kukaa kwenye kiti cha watu wawili alichokuwa amepangiwa. Baadaye alikuja msichana mmoja wa Kisomali na kukaa jirani yake. Msichana huyo ama kwa maringo au kwa kujiona mzuri, hakumsalimu Mike na alionekana mwenye dharau nyingi! Jambo hilo lilimkera sana Mike naye akaamua kukaa kimya pia.
Baada ya kukaa kitini msichana yule alichukua gazeti la Ebony la mwezi huo akijifanya kutogundua kuwa kuliwa na mtu pembeni yake.
Mike naye hakutaka kujirahisi. Alichukua gazeti lake la Uwazi na kuanza kusoma taratibu. Hakuna aliyemjali mwenzake. Muda mfupi baadaye ndege iliruka na dakika arobaini na tano baadaye ilitua katika Uwanja wa ndege wa Jomo Kenyatta, Nairobi, nchini Kenya bila Mike wala msichana yule kusemeshana.
Lakini kabla ndege haijaruka kutoka Nairobi kuendelea na safari, msichana yule alizinduka rasmi na kuanza maongezi.
“Hi, I am Laila, and you?” (Hujambo, mimi naitwa Laila, wewe ni nani?).
“My name is Mike. Hi Leila!” (Ninaitwa Mike. Hujambo Laila!).
“Fine thank you. What’s your destination sir?”
(Sijambo! Safari yako inaishia wapi, bwana?).
“My destination is UK, what about you?”
(Safari yangu inaishia Uingereza, wewe je?).
“I’m tavelling to Capenhagen. I’m a student at the University of Copenhagen taking Medicine and Public Health. What are you doing in the UK?” (Mimi nakwenda Copenhagen ambako nasoma Udaktari na Afya ya Jamii. Je, wewe unafanya nini Uingereza?).
“I’m going to join the Univesity of Oxford for my Bachelor Degree in Economics and Extra Education in Computer Science” (Ninakwenda Chuo Kikuu cha Oxford kusomea Shahada ya Kwanza ya Uchumi na Elimu ya Kompyuta).
“Oxford?” Laila aliuliza kwa mshangao.
“Yes?” (Ndiyo).
“It’s the most expensive university in the United Kingdom! Only very bright or rich students do join there! How did you get the chance? You must either be very bright or rich! (Ni chuo cha gharama kubwa sana Uingereza na wanafunzi wenye akili nyingi ndio hujiunga, wewe ulipataje nafasi hiyo? Wewe ni tajiri au una akili nyigi mno!).
“I’m neither rich nor bright, it was just a game of luck”. (Mimi sio tajiri na wala sina akili nyingi mno lakini ilikuwa ni bahati tu).
Mazungumzo hayo mafupi yaliwaunganisha Mike na Laila katika hali ya urafiki. Tangu dakika hiyo maongezi yalipamba moto wakawa kama watu waliofahamiana miaka kumi kabla!
Saa tano baadaye, wakiwa bado angani lakini wakiwa wamekaribia kabisa kutua katika Uwanja wa ndege wa Copenhagen uliokuwa mwisho wa safari ya Laila, bahati mbaya ilimkumba Mike.
Alianza kujisikia kichefuchefu na tumbo likaanza kumkata na mtu wa karibu kwake kwa wakati ule hakuwa mwingine bali Laila. Alimweleza tatizo lake akitaka amsaidie. Laila alitoa chupa ya dawa ya maji iliyoandikiwa Mucaine Suspension na kumpa Mike akanywa lakini bado haikumsaidia.
Hali ilizidi kuwa mbaya kadri dakika zilivyozidi kwenda. Mike akaanza kutapika, ikabidi Laila awataarifu wahudumu ndani ya ndege juu ya tatizo hilo ambapo walimfanyia huduma ya kwanza bila mafanikio.
Ndege ilipotua Copenhagen ilibidi safari ya Mike ikatishwe na akimbizwe haraka sana hospitali ambako iligundulika kwamba alikuwa na tatizo la kujisokota kwa utumbo. Ugonjwa huo ulitamkwa na madaktari kama Intestinal Obstruction.
Hali ya Mike ilikuwa mbaya mno na ili kuokoa maisha yake ilibidi mipango ifanyike haraka iwezekanavyo ili afanyiwe upasuaji kurekebisha hali ya kujisokota kwa utumbo. Hata hivyo, kabla ya kufanyiwa operesheni hiyo zilihitajika chupa tatu za damu.
Laila, ambaye wakati wote alikuwepo kumsaidia Mike ambaye hakuwa na mtu aliyemfahamu zaidi yake nchini Dernmark, ilibidi aende chuoni kwake ambako aliwataarifu wanafunzi kumi wa Kitanzania waliokuwa wakisoma katika Chuo cha Kikuu cha Copenhagen. Aliwataka waongozane naye hadi hospitali kujitolea damu ili kuyaokoa maisha ya Mtanzania mwenzao.
Kuna makundi manne ya damu ambayo binadamu anaweza kuwa nayo, ambayo ni ama kundi A, B, AB na O. Kinachofanya makundi ya damu yatofautiane ni Protini ziitwazo Agglutinogen. Mtu mwenye kundi “A” damu yake huwa na protini Agglutionogen na mtu mwenye kundi “B” damu yake huwa na Agglutionogen.
Mwenye kundi “O” huwa hana aina yoyote ya Agglutionogen. Hata hivyo, ndani ya damu ya mwanadamu kuna maaskari au “antibody” kwa Kiingereza ambao hupambana na hizi Agglutionogens, maaskari hawa huitwa Agglutins.
CHANZO: https://deusdeditmahunda.blogspot.com/
Mtu mwenye kundi “A” la damu huwa na maaskari waitwao Agglutinions Anti B na mwenye kundi “B” huwa na Agglutinis Anti A na mwenye kundi “AB” huwa hana aina yoyote ya maaskari hao. Kwa sababu hii mtu mwenye kundi “AB” anaweza kupokea damu kutoka kwa kundi lolote la damu!
Kwa sababu mtu mwenye kundi “O” la damu ana maaskari wote wa “A” na “B” hupokea damu kutoka kwa mtu mwenye kundi “O” peke yake. Hivyo, Mike alihitaji damu kutoka kwa mtu mwenye kundi “O” peke yake.
Wanafunzi wote kumi walipopimwa damu zao hazikushabihiana na damu ya Mike, wengi walikuwa kundi “A” na “B”. Alipoona hivyo, Laila aliomba ajaribu kupimwa yeye. Kwa bahati nzuri alipopimwa damu yake ilikuwa “O” na kushabihiana na damu ya Mike. Palepale Laila alitolewa damu chupa tatu ili kuokoa maisha ya mtu waliyekutana naye kwenye ndege! Wanafunzi wa Tanzania walimshukuru sana Laila kwa moyo wa ukarimu aliouonyesha.
Wiki moja baada ya kufanyiwa operesheni, Mike alikuwa mzima kabisa. Alitoa shukurani za pekee kwa Laila na wanafunzi wengine wa Kitanzania waliomsaidia katika matatizo yake. Akaendelea na safari yake moja kwa moja hadi Uingereza ambako aliendelea na masomo kama kawaida.
Miaka miwili baada ya Mike kufika nchini Uingereza, kulitokea ugonjwa wa ajabu uliopunguza kinga ya mwili kupambana na magonjwa ambao Marekani na nchi nyingi za Ulaya uliitwa Acquired Immuno Deficiency Syndrome au AIDS na Tanzania uliitwa Upungufu wa Kinga Mwilini au UKIMWI. Ugonjwa huo ulitangazwa kuwa ni ugonjwa hatari duniani kote baada ya kugundulika kuwepo wagonjwa kadhaa nchini Marekani na Uganda, Afrika Mashariki.
Njia za kuambukiza ugonjwa huo zilipotajwa zilikuwa ni pamoja na ile ya kuongezewa damu. Mike aliposikia hivyo, alishtuka lakini alijipa moyo na kuamini Laila asingekuwa nao kwa jinsi afya yake ilivyokuwa nzuri.
“Hakuonekana kuwa mtu mwenye dalili za ugonjwa huu,” alisema baada ya kuzisoma dalili zake.
Miaka sita baadaye Mike alimaliza masomo yake. Yalikuwa ni masomo ya miaka mitano lakini aliongeza mwaka mmoja ambao aliutumia kusomea Uongozi wa Elimu ya Kompyuta, lengo lake likiwa kupata kazi nzuri baada ya kurudi Tanzania.
Akiwa njiani kurudi Tanzania, Mike aliamua kupita Copenhagen kumshukuru Laila, mtu aliyeokoa maisha yake! Alimnunulia zawadi nzuri ya friji kama ishara ya shukurani zake. Alipofika Copenhagen alishangazwa na taarifa alizosikia kuwa Laila hakuwepo chuoni, alirudishwa Mogadishu baada ya kuugua kifua kikuu kwa muda mrefu na hali yake kudhoofika.
Mike alitamani sana kumwona Laila lakini hakuwa na uwezo wa kusafiri hadi Mogadishu. Badala yake alipanda ndege moja kwa moja hadi Nairobi na kuunganisha kwa ndege nyingine hadi Dar es Salaam.
Uwanjani Dar es Salaam alipokewa na mzee Joshua, mkewe na Lydia, mdogo wake Consolatha. Hakushangaa kwa nini Consolatha hakuwa pale. Alijua ni lazima kwa wakati huo alikuwa amefanya vizuri katika masomo yake ya kutimiza ndoto yake ya kwenda Marekani kusomea Udaktari wa Mifupa.
Wakiwa ndani ya gari kuelekea nyumbani kwa mzee Joshua, Mike alishindwa kuvumilia. Akajikuta akiuliza kama Consolatha alifanikiwa kutimiza ndoto yake. Cha kushangaza ni kwamba hakuna mtu aliyelijibu swali lake ingawa alikuwa na uhakika kabisa kuwa watu wote walimsikia.
Walipofika nyumbani alikaribishwa ndani na yakafanyika maombi maalum kumshukuru Mungu kwa kumrudisha Mike salama nyumbani Tanzania.
Baada ya maombi hayo kabla ya chakula cha jioni Mike alianza kuwasimulia yote yaliyojitokeza akiwa Uingereza, likiwemo tatizo lake la kuugua njiani na kufanyiwa upasuaji nchini Denmark.
“Namshukuru sana yule dada wa Kisomali vinginevyo nisingekuwa hai maa…” Mike alishtuka ghafla, dakika mbili baadaye alianza kulia.
“Mike mbona unalia tena?” Mzee Joshua alimuuliza.
“Yaani kumbe Consolatha alishafariki na hamjanieleza?” Mike alisema huku ameikodolea macho picha kubwa iliyokuwa imetundikwa ukutani ikiwa imezungukwa na maandishi, 'Tulikupenda mwanetu lakini Mungu alikupenda zaidi, Mungu ailaze roho yako mahali pema peponi.'
“Tulikuwa tunasubiri upumzike ili tukueleze maana tulishindwa kukutaarifu ukiwa Uingereza tukiamini tungekuvurugia masomo yako maana ulimpenda sana marehemu dada yako,” alisema mzee Joshua.
“Haya nielezeni basi,” Mike alisema huku akijifuta machozi.
“Dada yako alimaliza shule na kufanya vizuri sababu alipata daraja la kwanza kidato cha sita alipata pointi nne. Mama yake mdogo aliyekuwa Marekani, kama zawadi kwa alivyofanya vizuri katika wanafunzi wote Tanzania, alimwita akasomee Udaktari wa Mifupa, kazi ambayo marehemu aliipenda.
Kama ulivyofanya wewe, Consolatha naye aliamua kwenda Zanzibar kununua nguo za kusafiri nazo, akiwa njiani kutoka Zanzibar boti aliyokuwa akisafiri nayo ilizama, watu wote waliokuwa ndani ya boti hiyo hawakuonekana na hata boti yenyewe mpaka leo hii bado iko majini! Hivyo, Consolatha alifariki na hatukufanikiwa hata kuupata mwili wake.”
“Eee Mungu wangu ilaze roho ya Consolatha mahali pema peponi,” Mike alisema huku machozi yakimtoka na kunyanyuka kwenda kuibusu picha ya Consolatha.
***
Wakati wote Mike akiwa nje ya nchi, Beatrice alijitahidi kuwa msichana mwaminifu. Hakutaka kabisa kuvunja ahadi waliyowekeana na hakutaka kuharibu ubikira wake. Aliamini kwamba hiyo ndiyo zawadi pekee ya kumtunzia Mike mpaka siku ya ndoa yao.
Alipomaliza masomo yake ya Uuguzi na Ukunga, Beatrice aliajiriwa na Hospitali ya Mkoa wa Kagera kama Muuguzi Mkunga, na mawasiliano yake na Mike yalikuwa mazuri. Mike alimpigia simu moja kwa moja kutoka Uingereza karibu kila mwezi na kumtumia zawadi nyingi mara kwa mara.
Beatrice alisumbuliwa na wanaume wengi wakitaka kumwoa! Aliwakataa wachumba wasiopungua watatu akiwemo Meneja wa Kiwanda cha Sukari cha Bukoba kwa sababu ya Mike.
Tarehe 12 Septemba, 1986, saa 10 jioni, ikiwa ni miaka sita baada ya Mike kuondoka nchini, Beatrice akiwa amejipumzisha chumbani mwake, simu iliita ghafla naye aliipokea. Ilikuwa ni simu ya Mike.
“Hi! Darling habari za Uingereza?”
“Sio Uingereza mama, hapa nipo Bongo.”
“Dar? Mbona ghafla hivyo na hujaniambia?”
“Nilitaka kukufanyia surprise! (kukushtukiza) kwa hiyo, kesho naingia Mwanza, nakuomba uje Mwanza tukutane sawa?”
“Nitakuwepo,” Beatrice alijibu na kuongeza: “Jamani Mike miaka mingi sijakuona mpenzi wangu, nafikiri umezidi kuwa mzuri eh!” Beatrice alimwaga sifa.
“Darling utaniona kesho kutwa, lakini nafikiri nimekuwa mbaya zaidi” Mike alitania.
“Kama umekuwa mbaya basi mimi sikutaki tena,” Beatrice aliongeza utani.
“Acha utani wewe, tafadhali njoo tuongee mipango yetu ya ndoa wakati umefika sasa.”
***
Kwa kawaida, meli kutoka Bukoba huwasili Mwanza saa 12:30 asubuhi lakini Septemba 14, 1986 saa 11:00 alfajiri Mike alikuwa tayari amekwishaamka. Alikuwa na hamu kubwa ya kumwona Beatrice baada ya miaka karibu saba bila kumtia machoni.
Baada ya kufanya mazoezi na kuoga aliamua kupumzika na kungoja muda utimie ili aende bandarini kumpokea mchumba wake Beatrice, mwanamke aliyempenda kuliko wanawake wote chini ya jua. Mwanamke ambaye ndiye angekuwa wa kwanza kuvunja naye amri ya sita.
Saa 12:00 asubuhi Mike alikuwa ndani ya teksi aliyoikodi toka nyumbani kwao, Nyakato-Mecco, akielekea bandarini kumpokea kipenzi chake, Beatrice.
Dakika 15 baadaye teksi aliyokodi Mike iliegesha nje ya lango la bandari ya Mwanza na kwa mbali Mike aliweza kuiona meli ya MV Viktoria ikiwasili.
Meli ilipotia nanga moyo wake ulianza kudunda, utafikiri moyo wa mtu aliyekuwa akisubiri kuingia kwenye usaili wa kazi. Alikuwa na hamu kubwa ya kumwona Beatrice na moyoni alihisi furaha ya ajabu.
Alishindwa kuelewa ingekuwa furaha ya aina gani pindi angemtia Beatrice kwenye mboni ya macho yake. Abiria walianza kuteremka mmoja baada ya mwingine. Hata hivyo, Beatrice hakuonekana!
‘Labda aliahirisha safari nini?’ Mike alijikuta akijisemea kwa mshangao.
Akiwa karibu akate tamaa, ghafla alimwona Beatrice akiteremka ngazi taratibu ambapo bila kupoteza muda na bila aibu, alikimbia mbio kuelekea kwenye ngazi akikatiza katikati ya watu mpaka akamfikia. Beatrice alipomwona alimrukia na kumkumbatia.
CHANZO: https://deusdeditmahunda.blogspot.com/
“Ooh darling! Is it you?” (Mpenzi ni wewe kweli?) Beatrice aliuliza.
“It’s me Beatrice.” (Ni mimi) Mike alijibu kwa sauti ya juu.
“I can’t believe my eyes.” (Siyaamini macho yangu) Beatrice alisema huku machozi ya furaha yakimtoka.
Waliangushana chini huku wakiwa wamekumbatiana na watu wote waliokuwa pale walishangaa. Dakika tano baadaye wote walikuwa wima wakiwa wamekumbatiana, wakilia kwa furaha! Kila mmoja alimwona mwenzake kuwa amezidi uzuri.
“Hawa kweli wanapendana!” akinamama waliokuwa jirani walisikika wakisema.
Baadaye Mike alichukua begi la Beatrice na wote wakaingia ndani ya gari na kuondoka.
“Dereva, moja kwa moja hadi Natta Hotel, sawa?” Mike aliamuru.
“Hakuna taabu!” dereva alijibu na kuliondoa gari kuelekea alikoelekezwa.
Baada ya kusema hayo, Mike alimgeukia Beatrice ambaye alikuwa bado akilia kwa furaha.
“Za siku mpenzi?”
“Niache kwanza nipumzike Mike, nina mengi ya kuongea na wewe kwa sasa kifua kimenibana, nikitulia nitakusimulia mengi lakini nashukuru Mungu amekurudisha salama mpenzi wangu.”
Dakika tano baadaye gari liliegeshwa nje ya Hoteli ya Natta, Mike akamlipa dereva pesa zake, akachukua begi na kumshika Beatrice mkono. Walikaa hotelini ambako Mike alipanga chumba. Baada ya kuweka mizigo vizuri walijitupa kitandani.
“Nafikiri sasa umetulia hebu nieleze,” Mike aliyaanzisha maongezi.
“Ni mengi lakini kifupi nilikukumbuka sana, vilevile bado ninakupenda, sitaacha kukupenda milele Mike.”
Majira ya saa kumi jioni, Mike alirudi nyumbani kwao kuongea na wazazi wake. Akawaomba wamruhusu aende mjini kwa shida zake na kuwafahamisha kwamba asingerudi mpaka asubuhi siku iliyofuata.
Alidanganya kuwa kulikuwa na sherehe iliyoandaliwa na rafiki zake kumpongeza. Alilazimika kusema hivyo kwa sababu wazazi wake walikuwa bado hawajamfahamu Beatrice.
Alichukua begi lililokuwa na zawadi alizomnunulia Beatrice na kuondoka nalo.
Alipofika hotelini alimkuta Beatrice akiwa bafuni anaoga, hakupoteza muda, naye akavua nguo zake, akachukua taulo na kuingia bafuni ambako walioga pamoja.
Ilikuwa ni mara ya kwanza kwao kuoga pamoja tangu wafahamiane. Wakati wakioga ghafla Beatrice alianza kujisikia msisimko wa ajabu mwilini, ilikuwa ni mara yake ya kwanza kumwona mwanaume akiwa kama alivyozaliwa.
“Mike!”
“Naam, darling.”
“NImevumilia kwa muda mrefu sana, mwenzio nimeshindwa, tafadhali naomba…naomba tu…tu..” baada ya kusema hayo alimkumbatia Mike kwa nguvu.
“Beatriceeeee!” Mike alisema kwa ukali.
“Be…e! Mike!” Beatrice aliitikia.
“Kumbuka ahadi yetu na utulie mpenzi,” Mike alisisitiza.
Ilikuwa ni mara ya kwanza kwa Beatrice kumsikia Mike akiongea kwa sauti ya ukali kiasi kile. Alitambua kuwa alikuwa amemkasirisha, hakupoteza muda, aliamua kumwomba msamaha na Mike alimsamehe.
Baada ya kuoga walivaa na kutoka kwenda Hoteli ya Continental iliyokuwa maarufu mjini humo kwa kupika chakula kizuri.
Mike alivaa suti nyeusi na Beatrice alivaa suruali ya jeans iliyombana vizuri na tisheti nyeupe iliyoandikwa kifuani “My virginitiy is just for you only” (Bikira yangu ni kwa ajili yako wewe tu).
“Beatrice, ulinunua wapi nguo hii?” Mike alimuuliza.
“Dukani, huko Kampala.”
“Kwa nini ulinunua?”
“Nilitaka kukuonyesha nipo kwa ajili yako Mike.”
Mike alimkumbatia Beatrice na kumbusu kwenye paji la uso.
“Nakupenda Beatrice, nitakupenda milele na leo nakutamkia kuwa nitakuoa ili uwe mke wangu wa milele na milele.”
Beatrice akaanza kulia kwa furaha, hakuyaamini masikio yake kama yalisikia sawa maneno yale.
“Asante Mike, hata mimi nimevumilia vya kutosha nafikiri sasa ni vizuri tukaishi pamoja.”
Baada ya chakula wakarudi tena hotelini na usiku huo walikesha wakiongea kuhusu mipango yao ya ndoa na kila mtu alionekana kuwa na hamu ya harusi kumzidi mwenzake.
Siku iliyofuata baada ya kuweka mambo sawa Beatrice alirudi Bukoba huku tayari wakiwa wamepanga kwamba Mike angekwenda Bukoba kwa wazazi wake kujitambulisha.
***
Mwezi uliofuata Mike aliajiriwa na Kiwanda cha Nguo cha Mwatex kama Meneja Utawala. Kabla ya kuanza kazi alikwenda Dar es Salaam kukomboa bandarini mali zake zote alizozinunua Uingereza. Kulikuwa na malori matano na matela yake, magari madogo mawili, moja la kwake la kutembelea aina ya BMW na jingine la baba yake aina ya Mitsubishi Canter tani tatu na nusu.
Pia alinunua mashine ya kusaga, kuchana mbao, mashine za kuchapisha nakala, kompyuta ishirini na vyombo vya ndani.
CHANZO: https://deusdeditmahunda.blogspot.com/
Kutokana na mali alizokuwa nazo pamoja na kazi yake ya umeneja akiwa katika umri mdogo, jina lake lilivuma kupita kiasi mjini Mwanza.
Alifahamika karibu na kila mtu hadi watoto wadogo. Alipopita mitaani watoto walimshangilia Mike! Mike! Mike! Kwa muda mfupi tu alikuwa ameshakuwa maarufu kuliko hata Meya wa mji huo.
Gari lake la BMW lilizidisha umaarufu wake maradufu kwani hapakuwa na mtu mwingine mwenye gari kama hilo mjini Mwanza.
Miezi michache baada ya Mike kuanza kazi, alipewa nyumba ya kuishi katika nyumba za wafanyakazi wa Mwatex zilizokuwa mlimani Bugando.
Maisha ya kuishi pekee hakuyaweza, aliamua kusafiri hadi Bukoba kwa Beatrice ili ampeleke kwa wazazi wake kujitambulisha. Alifika Bukoba siku ya Jumamosi na jioni ya siku iliyofuata Beatrice alimpeleka Mike kijijini kwao Kanyigo kuonana na wazazi wake.
***
"Msigazi murungi nabasa kumshwela muhala waitu Beatrice." (Ni kijana mzuri anafaa kuwa mume wa binti yetu Beatrice) mama yake Beatrice alisema.
"Nanye nimbona asaine chonka munyamahanga, Msukuma.” (Na mimi naona anafaa lakini si mtu wa kabila letu, ni Msukuma).
Mzee Rugakingira, baba mzazi wa Beatrice aliitikia.
"Okuba Msukuma ti nshonga boona bashaija." (Kuwa Msukuma si tatizo, wote ni wanaume tu kama wengine), mama alimalizia.
Mzee Rugakingira na mkewe walikaa pembeni kumjadili Mike baada ya kutambulishwa kwao na Beatrice.
Baada ya chakula cha usiku wazazi wa Beatrice walimkubali Mike na kutoa baraka zao zote, ilikuwa furaha kubwa kwa Beatrice.
Mike hakuamini kama ingekuwa rahisi kiasi hicho kwani alishaambiwa kuwa watu wa mkoa wa Kagera walipendelea sana kuoana wao kwa wao, yaani watu wa kabila moja! Hakutegemea kama wangeweza kumkubali yeye Msukuma mara moja.
Pamoja na kukubali kwao kirahisi, wazazi wa Beatrice waliwasisitizia umuhimu wa kupimwa UKIMWI, kabla ya ndoa. Walidai kuwa wakati huo UKIMWI ulikuwa tishio kubwa sana kwa mkoa wa Kagera na Tanzania nzima.
Si Beatrice wala Mike aliyetiwa hofu na suala hilo la kupima UKIMWI, hiyo ilitokana na ukweli kwamba hadi umri waliokuwa nao hakuwepo mmoja kati yao aliyewahi kukutana kimwili na mtu mwingine.
Walikuwa wakisubiri siku ya ndoa yao kwa hamu ili wapate kukionja kitendo hicho.
Kabla ya kuondoka Bukoba, Mike alifanya mipango yote ya kumhamishia Beatrice mjini Mwanza kikazi ili apate kuwa karibu naye wakati wakikamilisha mipango yao ya ndoa.
Baada ya ya kufika Mwanza, Mike aliwataarifu wazazi wake ambao kwa muda mrefu aliwaficha mipango yake ya kumwoa Beatrice. Wazazi wake walifurahi sana na moja kwa moja wakatoa baraka zao zote. Mzee Martin akaahidi kusafiri yeye na wazee wengine maarufu mjini Mwanza kwenda Bukoba kufahamiana na wazazi wa upande wa pili na pia kutoa mahari.
***
Taarifa za harusi ya Mike zilipoanza kutapakaa mjini Mwanza watu wengi hawakuamini. Kwa muda mrefu watu wengi waliamini Mike alikuwa na kasoro ya kimaumbile, kwani tabia ya Mike kutojihusisha na wanawake ndiyo iliyosababisha watu kuamini hivyo.
Mzee Martin aliporudi kutoka Bukoba vikao vya harusi vilianza na kadi za michango zilisambazwa kwa kila mtu aliyekuwa karibu na Mike na familia yake. Watu wakawa na hamu kubwa ya kuishuhudia ndoa ya Mike na Beatrice.
Huko Bukoba pia taarifa zilisambaa kila kona na kwa ndugu wote na marafiki wa familia ya Rugakingira.
Hata wafanyakazi wenzake katika hospitali ya Mkoa wa Kagera walitaarifiwa. Michango ilianza kutolewa. Kwa jinsi pesa zilivyochangishwa, watu walishindwa kuelewa ukubwa wa harusi hiyo ungekuwa vipi.
***
Miezi miwili baadaye Beatrice alihamia mjini Mwanza. Alifikia Capri Point, kwa dada yake mkubwa, Margareth, mke wa Samson, mfanyabiashara maarufu mjini Mwanza. Baada ya kufika Mwanza, Mike alimtafutia kazi hospitali ya Bugando ambako alifanya kazi kama Muuguzi Mkunga kama ilivyokuwa Bukoba.
Kwa sababu ya ukaribu, mawasiliano kati yao yakawa makubwa. Walionana karibu kila siku, ambapo Mike alipotoka kazini alikuwa na kawaida ya kupitia hospitali kumchukua Beatrice na kumrudisha nyumbani kwa dada yake.
Kila mtu aliyewaona Mike na Beatrice alikiri kweli walipendana na walikuwa mfano wa kuigwa. Siku za mwishoni mwa wiki kila walikokwenda walikuwa wawili, tena mkono kwa mkono! Kila mtu mjini Mwanza alitamani kuiona ndoa yao.
***
Wakati homa ya harusi ya Beatrice na Mike ikiwa imepanda kupitia kiasi mjini Mwanza, mzee Rugakingira alipiga simu kutoka Bukoba na kuwakumbusha Mike na Beatrice juu ya kupima UKIMWI.
Ili kuonyesha kuwa hawakulidharau ombi la wazazi, siku iliyofuata asubuhi na mapema wote wawili wakaenda hospitali ya Bugando kushughulikia suala hilo.
"Sijui baba hatuamini!" Beatrice alihoji kwa utani wakiwa njiani kuelekea Bugando.
"Si unajua tena wazee wetu, si ajabu wananitilia mashaka mimi au naonekana mhuni sana nini?" Mike alitania.
Walinyoosha moja kwa moja hadi hospitali ya Bugando, baada ya kuegesha gari walipitiliza moja kwa moja hadi maabara ambako waliandikisha majina yoa na kupanga foleni, wakisubiri kuitwa.
Muda mfupi baadaye mwanamke mmoja mfupi alichungulia kutoka mlango wa maabara.
"Mike Martin na Beatrice Rugakingira, tafadhali ingieni!" Ilikuwa ni sauti ya muuguzi akiwataka waingie maabara.
Wote wawili walinyanyuka na kuingia maabara ambako walichukuliwa vipimo. Baada ya shughuli hiyo, Mike alimrudisha Beatrice nyumbani, kwa dada yake.
Siku hiyo Beatrice alitaka kuingia zamu ya mchana, hivyo alipomfikisha kwao aliondoka kwenda kazini kwake eneo la viwanda vya Nyakato, barabara ya kuelekea Musoma.
Maisha yaliendelea kama kawaida huku watu wakiendelea kuchanga maelfu ya shilingi kwa ajili ya harusi hiyo ya aina yake. Harusi iliyotegemewa kufungiwa angani ndani ya ndege ya Shirika la Ndege la Precision wakati maelfu ya watu wakishuhudia na kushangilia kwa chini.
***
"Siamini!" Mike alisema huku machozi yakimtoka.
"Nimeutoa wapi mimi?" Aliendelea kujiuliza maswali bila kupata majibu.
"Huu ni uongo mkubwa," alisema kwa sauti ya juu mpaka baadhi ya watu waliokuwa karibu naye wakasikia, palepale alinyanyuka na kumkaba shati daktari aliyekuwa akimpa unasihi.
"Kwa nini mnanipakazia, hamtaki nimuoe Beatrice siyo?"
"Mike wewe ni kijana unayeheshimika sana hapa mjini, tafadhali usifanye jambo hilo." Mmoja wa wauguzi waliokuwa maabara alisihi katika kujaribu kuituliza hali hiyo kabla watu hawajakusanyika kusikiliza.
"Haiwezekani, kwa nini mnisingizie kitu kama hiki mimi wakati sijawahi kukutana na mwanamke yeyote maishani mwangu? Iweje leo mniambie habari kama hii?"
"Sio hivyo kaka, tuliza moyo kwanza!" Muuguzi aliyekuwa pale aliendelea kusihi.
CHANZO: https://deusdeditmahunda.blogspot.com/
Mike alivikunjua tena vile vyeti vya majibu na kuanza kuvisoma kwa mara ya pili. Alikuwa haamini kabisa kama majibu yake yalionyesha alikuwa “Elisa Test Positive,” yaani alikuwa na virusi vya UKIMWI na majibu ya Beatrice yalionyesha “Elisa Test Negative,” yakiwa na maana hakuwa na virusi vinavyoambukiza UKIMWI.
"Nimeutoa wapi mimi?" Mike aliendelea kuuliza kwa sauti.
Kwa kasi ya ajabu Mike alitoka maabara na kukimbia hadi nje ya geti, akaingia ndani ya gari lake na kuliondoa kwa mwendo wa kasi kuelekea eneo la Isamilo. Alinyoosha moja kwa moja hadi kwenye majengo ya kitengo cha uchunguzi cha kitabibu cha Medical Research.
Aliyemfuata huko hakuwa mwingine bali ni Dkt. Mazira, mmoja wa marafiki zake wa karibu waliyesoma wote Shule ya Sekondari ya Nsumba.
"Ee bwana mbona macho mekundu, umefiwa?" Dkt. Mazira aliuliza mara tu baada ya kumwona Mike.
Mike alianza kulia tena.
"Bwana, mimi nimetoka Bugando, hapa nilipo nimechanganyikiwa kiasi cha kutosha."
"Kuna nini cha kukuchanganya Mike?"
"Majibu!"
"Majibu ya nini?"
"Ya UKIMWI, eti yameonyesha mimi Positive na Beatrice ni Negative hizi si njama za kukwamisha ndoa yetu, kweli? Siamini hata kidogo, nimekuja kwako ili turudie kupima?”
"Hebu njoo huku ndani."
Waliingia ndani ambako kwa haraka Dkt. Mazira alimtoa Mike damu na kuanza kuifanyia uchunguzi.
"Nisubiri hapo hapo!" Dkt. Mazira alisema.
Dakika arobaini baadaye Mike alishangazwa na jinsi macho ya Dkt. Mazira yalivyokuwa yametoka, alionyesha wasiwasi mkubwa.
"Nini daktari?"
"Hapana Mike ni kitu cha kawaida tu."
"Please tell me, is it positive or negative? That's what I want to know!" (Niambie, daktari, nina virusi au sina, hicho ndicho ninachotaka kujua).
"Ah! Ah! Ah!..." daktari alishikwa na kigugumizi.
"Niniiii?"
"Kwa kweli, Mike ni suala gumu kidogo kukueleza, nafikiri tunahitaji kurudia tena baada ya wiki tatu, kuna wakati hivi vipimo vyetu huwa vinatoa majibu yasiyo kweli?”
“Hivyo ina maana kwa leo imeonyesha mimi ni positive?” Mike aliuliza.
"Hivyo ndivyo rafiki yangu, siwezi kukuficha kitu lakini ninategemea utasimama imara katika kipindi chote tukisubiri kurudia vipimo!"
Mike aliinama na kuanza kulia tena, Dkt. Mazira alijaribu kumbembeleza lakini haikuwezekana Mike akaondoka bila kuaga na kuingia ndani ya gari lake na safari ya kuelekea nyumbani kwake ikawa imeanza.
Mike hakumwambia Beatrice habari za majibu hayo ingawa Beatrice aliingiwa na hofu kwa jinsi alivyoona mabadiliklo ya tabia ya mpenzi wake. Mike alikuwa ni mwenye huzuni kubwa na mara nyingi alikuwa akitokwa na machozi.
"Mike una tatizo gani?” Kila siku Beatrice aliuliza.
"Mimi? Sina matatizo yoyote, nina mafua tu!" Mike alitumia jibu hilo kila alipoulizwa kuhusu afya yake.
Wiki tatu baadaye Mike alikuwa tena Medical Reseach ambako Dkt. Mazira alichukua tena damu yake kwa ajili ya kupima. Majibu yalipotoka yalionyesha Mike alikuwa Positive vilevile!
Mike alilia machozi kwa uchungu na alishindwa kuelewa jibu la Positive lilitoka wapi, wakati maishani mwake hakuwahi kufanya ufuska wowote wala kutembea na mwanamke yeyote! Kitu kingine kilichomchanganya zaidi akili ni lugha gani angeitumia kuwafahamisha watu ambao tayari walishachanga pesa zao kwa ajili ya harusi yake. Je, angewaambia hataoa tena kwa sababu ana virusi vya UKIMWI? Alishindwa kupata jibu la moja kwa moja angetumia njia ngani kumwelewesha Beatrice kuwa ndoa isingewezekana tena kwa kuwa yeye alikuwa anaishi na virusi.
Kila alipoufikiria muda ambao Beatrice aliupoteza kumsubiri, alijihisi vibaya, aliulaani UKIMWI na kwa nini ulikuja duniani. Alikumbuka kuwa Beatrice alikwishakataa wachumba watatu wakati Mike akiwa Uingereza. Alishindwa kuelewa Beatrice angejisikia vipi wakati tayari alikwishawaeleza marafiki zake wote kuhusu ndoa yake na wengine tayari walishaanza kushona sare za harusi.
Mike alibaki ameduwaa bila kujua la kufanya, hakuwa tayari kuua kiumbe kisicho na hatia. Hakutaka kumuua Beatrice kwa sababu alimpenda mno! Alimshukuru Mungu kwa sababu yeye na Beatrice walikuwa hawajawahi kujamiiana tangu wafahamiane, vinginevyo hata Beatrice angekuwa Positive.
Alipofikiria ni wapi alikoupata ugonjwa huo bado hakupata jibu. Jibu lililomjia kichwani kwa haraka ni hisia juu ya damu ya Laila! Damu ile aliitilia shaka sana.
"Nitakwenda hadi Mogadishu nikamtafute Laila ili nihakikishe kama ni kweli yeye ndiye aliyeniambukiza,” alijisemea Mike. Alikumbuka kuwa Laila aliwahi kumweleza kuwa baba yake mzee Mohamed alikuwa mtu maarufu sana mjini Mogadishu.
"Hivyo ni rahisi sana kumpata na nikikuta ni kweli sijui nitampa adhabu gani...! Hakuna sababu ya kumwadhibu Laila nia yake ilikuwa njema alitaka kuokoa maisha yangu.”
Wakati Mike akiwaza yote hayo, tayari alikwishaondoka Medical Research. Gari lake aliligesha kando ya barabara ya kwenda uwanja wa ndege. Kutokana na kuelemewa na mawazo alijikuta usingizi umempitia humohumo ndani ya gari. Aligutuka saa kumi jioni baada ya kupigiwa honi na gari la wafanyakazi wa kiwandani kwake, walishangaa kumkuta bosi wao mahali pale.
Alikuwa amelala ndani ya gari hilo kwa saa tano! Alipokumbuka kilichomfanya awe pale na katika hali ile, alianza kulia tena. Baadaye kwa taabu aliliondoa gari lake kwa kasi ya ajabu kuelekea nyumbani kwake, Bugando.
Mike alianza kuamini ukweli kuwa UKIMWI ulikuwa na tabia ya kuwaua vijana mara tu wanapopata mafanikio katika maisha yao!
Alipata mafanikio makubwa katika maisha yake na sasa alitakiwa kufa na kuviacha vyote alivyokuwa navyo. Mbele yake aliona giza nene, tena aliziona siku zake za kuiaga dunia hazikuwa mbali naye, machozi yakamtoka.
Aliamini hapakuwa na mtu aliyeuogopa UKIMWI duniani kama yeye lakini sasa alikuwa nao na hakujua angewaeleza nini watu ili waamini kuwa katika maisha yake hakuwahi kutembea na mwanamke.
Aliamini kila mtu angemwona malaya kwa sababu ndivyo jamii ilivyouchukulia ugonjwa huo. Mike alitamani kujiua kwa kuogopa aibu hiyo. Alipofika nyumbani kwake aliingia ndani na moja kwa moja alikwenda mezani ambako alichukua kalamu na karatasi na kuanza kumwandikia barua Beatrice.
CHANZO: https://deusdeditmahunda.blogspot.com/
Mpenzi Beatrice,
Naandika barua hii nikiwa katika majonzi makubwa na machozi yakinitoka, Beatrice, jambo ninalotaka kukueleza si rahisi wewe kuliamini hata kidogo lakini ndivyo ilivyo. Najua litakuumiza zaidi lakini inabidi niseme ili angalau nipate faraja kutoka kwako! Nitakuficha hadi lini wakati hiki ni kifo?
Naikumbuka siku ya kwanza tulivyokutana shuleni Nsumba miaka mingi iliyopita, tangu siku hiyo hadi leo ni kama miaka kumi au zaidi.
Tangu wakati huo umenisubiri ili tuoane, tuzae watoto na kujenga familia yetu. Hilo limekuwa kweli, na wazazi wetu wametupa baraka zao na lilikuwa tegemeo letu kuwa siku chache zijazo tungefunga ndoa.
Beatrice, inaniuma kukueleza kuwa HATUTAOANA TENA!! Si kwamba nakuchukia, la, ila sitaki kuua kiumbe kisicho na hatia!
Beatrice, uamuzi huu unatokana na yale majibu ya damu tulivyokwenda kupimwa. Hayo ndiyo yaliyosababisha yote haya. Amini, usiamini, Beatrice, sijawahi kukutana na mwanamke kimapenzi katika maisha yangu na ndiyo maana siku zote huwa nasema ninaweza kuitwa “bikira wa kiume.”
Lakini cha ajabu na cha kushangaza majibu yameonyesha mimi nina virusi vya UKIMWI wewe huna! Nilipoyaona majibu haya sikuamini, ikabidi niende Medical Research kurudia vipimo, lakini nako majibu yakawa ni hayohayo. Leo tumepima kwa mara ya tatu bado mimi nimeonekana nina virusi, hivyo nimelazimika kuuchukua huo kama ukweli wenyewe.
Beatrice, ninakupenda na namshukuru Mungu katika maisha yetu ya kufahamiana hatukuwahi kuingia majaribuni na kufanya mapenzi. Je, unaikumbuka siku ile pale bafuni Natta Hotel? Kama tungemruhusu shetani na kufanya tendo la ndoa, wewe pia ungekuwa positive.
Sasa basi, kwa vile bado hujaambukizwa mimi sioni sababu ya kukuua Beatrice! Ni heri tuachane ili uolewe na mtu mwingine yeyote na uwe na familia yako. Naomba uniache mimi nife peke yangu. Nafikiri hivyo ndivyo Mungu alivyopanga.
Samahani Beatrice kwa kukupotezea muda wako mwingi lakini nitakulipa fidia kidogo. Nitakupa shilingi milioni kumi na gari moja lenye tela, hizo zitakuwa mali zako mwenyewe na zitakusaidia maishani.
Sina mengi ya kusema bali nakutakia maisha marefu popote. Wewe ni msichana mzuri, nina imani utapata mtu mwingine wa kukuoa na uzae watoto wazuri. Naomba ukizaa mtoto wa kiume umwite Mike kwa kumbukumbu yangu.
Asante.
Ni mimi katika majonzi,
Mike.
CHANZO: https://deusdeditmahunda.blogspot.com/
Je nini kitaendelea?
ITAENDELEA
0 comments:
Post a Comment