DAMU, MABUSU NA MACHOZI - 4

 

Simulizi : Damu, Mabusu Na Machozi

Sehemu Ya Nne (4)



“Hapana! Lazima tuukubali ukweli kuwa hawa watu wameondoka na Danny! Si unakumbuka walivyoingia walisema wamekuja kumtafuta mtu mmoja, sasa kukosekana kwa Danny hapa ndani kunamaanisha nini Nancy?”Mzee Katobe aliuliza.CHANZO:  https://deusdeditmahunda.blogspot.com/

“Inawezekana kweli katekwa, tutafanyaje sasa kumpata?”

“Nataka kupiga simu polisi niwataarifu juu ya tukio hili!”

“Baba subiri kwanza, naelewa aliyefanya kitendo hiki si mwingine bali ni Tonny! Acha nikazungumze naye, nina uhakika atamrudisha!” Aliongea Nancy akijaribu kumshawishi mzee Katobe asitoe taarifa polisi kwanza.



Baada ya maongezi ya karibu dakika kumi mama yake Nancy akipinga wazo lililotolewa na binti yake akidai hapakuwa na sababu ya kusubiri, wote walikubaliana na Nancy akatoka mbio hadi nje akipitia ufunguo wa gari ya baba yake juu ya kabati, aliingia ndani na kuwasha kisha kugeuza na kuondoka kwa kasi ya ajabu akitimua vumbi nyuma yake hadi nyumbani kwao na Tonny!

Aliegesha gari mbele ya nyumba ndogo ya matope, akashuka na kutembea hadi mlangoni ambako alianza kugonga, hakuna mtu aliyemwitikia na hapakuwa na dalili za watu kuwemo ndani ya nyumba hiyo! Aliendelea kugonga karibu dakika tano huku watu wakipita njiani na kumshangaa, hakuelewa ni kwanini.

“Nyumba hiyo haina watu dada walishahama muda mrefu!” Mpitanjia mmoja alimwambia.

“Wako wapi?”

“Miaka mingi hawakuwepo ila nasikia walirudi kutoka Marekani na kufikia hapa lakini baadaye wakahamia kwenye hoteli moja huko ufukweni inaitwa Badeco!”

“Ahsante sana!” Nancy aliitikia na kurudi hadi kwenye gari na kuondoka zake kuelekea kwenye hoteli aliyoelekezwa, aliifahamu vizuri sana Badeco Hoteli, ndio hoteli pekee ya kitalii iliyotisha kwa uzuri mjini Bagamoyo kipindi hicho. Kutoka nyumbani kwa akina Tonny hadi hotelini ilichukua muda wa dakika kumi lakini Nancy alitumia dakika tano, tayari akawa anaegesha gari lake mbele ya hoteli na kushuka.

“Habari yako dada?” Nancy alimsalimia msichana aliyemkuta mapokezi.

“Nzuri! Nikusaidie?”

“Ndiyo, namuulizia kaka mmoja anaitwa Tonny amepanga hapa?”

“Kweli yupo lakini hivi sasa amepumzika kidogo!”

“Mpigie simu mwambie mimi Nancy niko hapa!”

“Sawa! Karibu ukae kwenye kiti wakati nikikushughulikia!”

Nancy alilisogelea kochi lililokuwa jirani na kuketi bila kusema kitu, moyo wake ulikuwa ukienda kasi na hasira ilizidi kumpanda ingawa hakutaka kumwonyesha msichana wa mapokezi hasira zake. Akiwa kwenye kochi aliendelea kumshuhudia msichana akiongea na simu na alipoiweka chini alimwonyesha ishara kwamba amsogelee.

“Nifuate!” Alisema msichana wa mapokezi.

Nancy alimfuata msichana huyo nyuma bila kusema chochote na wote wakatembea pamoja hadi pembeni kabisa mwa hoteli kulikokuwa na nyumba nzuri iliyoezekwa kwa makuti msichana wa mapokezi alibonyeza kengele iliyokuwa juu pembeni mwa mlango, sekunde chache baadaye mlango ulifunguliwa, Tonny akatokeza uso wake haukuonekana kuwa na mshangao mkubwa sana, alikuwa kama mtu aliyemtegemea Nancy afike chumbani kwake muda huo.

“Karibu sana!”

“A...h..s..an..te!”Aliitikia Nancy kwikwi za kulia zikiwa zimemkaba kooni, hasira yake iliongezeka maradufu alipouona uso wa Tonny! Alimchukia sana kijana na hakuwa na mapenzi naye tena kufuatia kitendo cha kikatili alichomfanyia Danny.

“Tonny kwanini umenifanyia hivi?” Alianza kuongea kabla hata ya salamu.

“Vipi?”

“Kwanini umetuma watu kuja kumteka Danny?”

“Nini? Nani kakuambia nimefanya hivyo?” Aliuliza Tonny uso wake ukionyesha mshtuko ambao akili ya Nancy iliutafsiri kama maigizo.

“Usinifanyie maigizo Tonny, nipo siriasi kabisa! Hicho ndicho kitu ulichoahidi kukifanya wakati unaondoka nyumbani tafadhali naomba umrudishe Danny kwangu, usininyanganye mtu ambaye kwa sasa ninampenda huo ni ukatili Tonny, nitatoa taarifa polisi!” Aliongea Nancy akionyesha hasira.

“Sijafanya hivyo Nancy! Siku ile niliposema ilikuwa ni hasira tu, kamwe siwezi kumteka mtu!”

“Siangalii unachokisema sasa hivi, maneno yako ya siku ile ndiyo yaliyonifanya nikufikirie wewe! Tafadhali naomba umrudishe Danny kwangu! Vinginevyo nakwenda polisi”

“Ukienda polisi ujue ndio utakuwa umenichokoza, hapo ndipo nitalazimika kulipa kisasi!”

“Nakwenda, fanya lolote utakalo!”

“Huo ni uamuzi wako lakini yatakayotokea baada ya hapo usinilaumu!”

Nancy aliubamiza mlango wakati akitoka nje na dakika moja baadaye muungurumo wa gari likiondoka kwa kasi ulisikika kulikuwa na kila dalili kuwa kilichotoka mdomoni kwa Nancy hakikuwa utani, alimaanisha alichokisema na tayari kulikuwa na vita kali kati ya Nancy na Tonny ambayo mwisho wake usingekuwa rahisi kufikiri.CHANZO:  https://deusdeditmahunda.blogspot.com/

“Kama anakwenda polisi basi mimi pia nawasiliana na mzee Katapila! Tuone nani ni mjanja kati yangu mimi na yeye!” aliongea Tonny akiisogelea simu iliyokuwa pembeni mwa kitanda chake, kabla hajabonyeza namba yoyote mama yake aliyekuwa akiishi naye hotelini aliingia akitaka kufahamu nini kilikuwa kimetokea.

“Nancy, amekuja hapa anadai nimemteka Danny!”

“Umemteka Danny?” Mama yake aliuliza kwa mshangao.

“Ndiyo!”

“Ni kweli?”

“Hapana mama siwezi kufanya hivyo!”

“Sasa?”

“Kwa sababu ameamua kunipa jina la utekaji basi nimeamua kufanya kweli!” Tonny aliongea uso wake ukiwa umefura kwa hasira, mara nyingi akiwa katika hali hiyo hata mama yake alimwogopa. Kwa harakaharaka alibonyeza namba kadhaa kwenye simu kisha kuanza kuongea na mtu ambaye mama yake hakumfahamu.

“Naongea na mzee Katapila?...Sawasawa....sasa hebu sikiliza, ninachotaka ufanye ni kuhakikisha wote wanatekwa na utawapeleka hukohuko Tindiga ulikosema, wafiche huko kwa muda mrefu lakini usiwaue mpaka nitakapoona nao na ninaomba uje haraka hapa hotelini nikukabidhi hundi yako ili uchukue pesa benki......tafadhali wahi maana ukichelewa nitakuwa nimeshakamatwa na polisi....ndiyo ....Nancy amekwenda kushtaki!....najua watanichukua lakini wataniachia, ukishawakamata kaa nao siku nikitoka nitaamua nini cha kufanya juu ya watu hao! Nataka Nancy aelewe mimi si mtu wa kuchezea, nimeishi Marekani na ninajua visasi!” Aliongea Tonny huku mkono wake wa kuume ukipiga piga meza mara kwa mara, mama yake alibaki mdomo wazi akielewa tayari matatizo yalikuwa yametokea! Watu walikuwa wanatekwa kwenda kuuawa, kichwani mwake hakuwa na picha za watu wengine zaidi ya familia ya mzee Katobe.

*******

“Una uhakika ni yeye?”

“Asilimia mia moja kwani ndio kitu alichokisema!”

“Unao ushahidi?”

“Nina uhakika akihojiwa ataeleza ukweli!”

Nancy alitoa maelezo yote polisi kuanzia uhusiano wake na Tonny, alivyomwacha na kurejea kwa Danny jambo aliloamini lilimfanya alipe kisasi, maelezo yake ya karibu saa nzima yaliwafanya polisi waamini alichokisema na kuondoka haraka kwenda hotelini kwa Tonny, gari la polisi lilikuwa mbele likiwa na askari zaidi ya saba na Nancy alikuwa nyuma ndani ya gari la baba yake, hakuna kilichomfurahisha moyoni mwake wakati huo kama kukamatwa kwa Tonny na kufikishwa mbele ya sheria ili hatimaye aseme ni wapi alikompeleka Danny baada ya kumteka.

Walipofika hotelini, Tonny alikamatwa na kupigwa pingu kisha kuchukuliwa hadi kituoni, maelezo aliyoyatoa hayakutosha kuwafanya askari wamuachie huru, akawa ametupwa mahabusu ili aisaidie polisi katika upelelezi! Nafsi ya Nancy iliridhika kwa kitendo hicho na aliwaomba maaskari wamtese Tonny sana ili hatimaye aeleze ni wapi mchumba wake alikokuwa amefichwa.

“Hakyanani nitawapa pesa nzuri! Mkipiga kofi moja mia tano, teke elfu moja, kifuti elfu mbili, kila kirungu kitakachotua mwilini mwake elfu mbili na mia tano! Kazaneni kumpiga na mtunze kumbukumbu zenu ili nikija asubuhi niwakeshi mafaranga yenu!” Aliongea Nancy akitabasamu na maaskari wote waliokuwa wakimsikiliza waliitikia, jambo lililoonyesha wazi Tonny angeteswa usiku mzima mpaka aeleze ni wapi alikokuwa Danny.



Mzee Katapila alikuwa ni jambazi aliyeutingisha mkoa wa Dar es Salaam miaka ya sitini na sabini, alijipatia mali nyingi sana kwa njia haramu hatimaye kujikuta ametajirika! Lakini pamoja na kuwa na mali nyingi bado hakuisahau kazi yake ya ujambazi, akawa ameunda genge lililofanya kazi ya kuvamia mabenki, watu binafsi na kuwaibia! Kundi hili aliliita Lambadamu.

Lilikuwa ni kundi maarufu kwa vitendo vya uharamia, hata polisi walilifahamu lakini halikuchukuliwa hatua yoyote kwa sababu tajiri mzee Katapila alilikingia kifua! Watu wengi waliotaka kulipa kisasi walimfuata mzee huyu na kumlalamikia, kwa malipo kidogo tu aliwakamilishia kazi zao.

Ni kwa mzee huyu ndiko Tonny alikwenda kueleza shida yake, akalipa kiasi cha pesa ili amfundishe Nancy adabu akidai kitendo alichofanyiwa kilikuwa cha kudhalilisha mno, akiwa amesahau ukatili aliomfanyia Nancy nchini China na kitendo cha kumlisha Yamini na kuharibu kabisa maisha yake.

Kuua, kuteka na kutesa ilikuwa kazi rahisi sana kwa kundi hilo la Lambadamu hivyo baada ya mzee Katapila kupokea maagizo kutoka kwa Tonny na kukabidhiwa hundi yake ya milioni mbili kukiwa na salio la milioni moja aliwaamuru vijana wake kuingia kazini muda huohuo.

********

Alipotoka kituoni Nancy alinyoosha moja kwa moja nyumbani kwao, moyoni mwake akiwa na furaha kwa sababu ya kuridhishwa na hatua zilizochukuliwa na polisi! Alitamani kufika nyumbani mapema ili awasimulie wazazi wake juu ya kilichotokea, alitegemea wangefurahi kama alivyokuwa amefurahi yeye kwani matumaini ya Danny kurejea yalikuwa makubwa!

Hali aliyoikuta nyumbani kwao ilimshangaza, kulikuwa na idadi kubwa sana ya majirani pamoja na maaskari! Moyo wake ulipasuka kwa mshtuko, hakuelewa ni nini kilikuwa kimetokea kwani kulikuwa na kila dalili ya jambo baya. Aliegesha gari upande wa pili wa barabara na kushuka kisha kuanza kutembea kwa haraka kuelekea nyumbani kwao.

“Vipi kimetokea nini?” Nancy alimuuliza mmoja wa majirani.

“Aiseee! Sisi tulifikiri hata wewe umo?”

“Nimo wapi?”

“Walikuja watu na gari, wakaanza kurusha risasi hewani hapahapa nyumbani kwenu kisha tukawaona wakitoka ndani pamoja na watu watatu, wawili niliwatambua, alikuwa baba pamoja na mama yako lakini watatu sikumwelewa! Baada ya hapo niliingia uvunguni mwa kitanda polisi walipokuja ndipo nikajitokeza! Nilifikiri na wewe umetekwa!”CHANZO:  https://deusdeditmahunda.blogspot.com/

Nancy hakujibu kitu, alimwaga machozi hapohapo na kuanza kutembea kwenda ndani, maaskari wakimfuata kwa nyuma! Sebuleni kwao kulijaa damu, kulikuwa na picha ya wazi kuwa wazazi wake walipigwa risasi kabla ya kutekwa! Alihisi kuishiwa nguvu miguuni, akaketi kwenye kiti na kuendelea kuwaza juu ya yaliyokuwa yakitokea! Ghafla alisikia sauti za watu wakiongea chumbani, alitoka mbio na kufungua mlango! Wadogo zake David na Catherine walilala kitandani wakiwa wamejifunika shuka.

Aliwachukua na kuanza kutembea nao kwenda nje ya nyumba huku yeye na wadogo zake wakiendelea kulia machozi, ilikuwa hali ya kusikitisha! Maisha ya Nancy yalikuwa yameingia kwenye dhoruba nyingine baada ya kutoka katika wendawazimu.

“Kwa mkono wangu nitawaokoa baba, mama, Danny na mzee Mwinyimkuu, nasema damu itamwagika!” Aliongea kwa uchungu Nancy.

Nancy alikuwa amechanganyikiwa kabisa, mambo yalionekana kumtokea kwa ghafla mno! Hakutegemea baba na mama yake wangetekwa, muda wote alikuwa akilia wadogo zake David na Catherine wakiwa mikononi mwake! Hakuacha kuapiza kwamba kwa mkono wake angewaokoa wazazi wake hata kama Polisi wangeshindwa kuwapata, alikuwa tayari kumwaga damu ili mradi wazazi paoja na mume wake mtarajiwa Danny warudi kutoka walikokuwa wamepelekwa.

“Kwa mkono wangu mimi Nancy nitawakomboa, ni bora mimi pia nipoteze maisha yangu! Sitaweza kuishi duniani bila mama na baba yangu!” Aliongea Nancy kwa jazba, hasira kali ilikuwa imemkamata, alielewa wazi yote yaliyotokea yalifanywa na Tonny kama kisasi cha kumkataa, hata hivyo kilikuwa kisasi kikubwa mno.

Baadaye Polisi walimchukua Nancy na wadogo zake hadi kituoni ambako alitoa maelezo ya nyongeza juu ya tukio lililojitokeza, Polisi waliahidi kufanya kila kilichowezekana kumpata mtu aliyefanya tukio hilo, walimhakikisha isingechukua hata siku tatu kabla mzee Katobe, mke wake pamoja na Danny hawajapatikana.

“Ah! Hii kazi ni ndogo kabisa wala usiwe na wasiwasi, wewe tulia sisi tutawaleta wazazi wako nyumbani na mhalifu tutamtia nguvuni! Hii ndio kazi yetu tulia!” Mmoja wa maaskari alisema.

“Nafurahi sana kusikia hivyo! Sijui nitawashukuruje lakini lazima kutakuwa na namna fulani ya kuwapeni shukurani zangu kama baba, mama na mchumba wangu watarudi, huyuhuyu Tonny mliyenaye mahabusu anaelewa kila kitu!”

“Atasema tu wala usiwe na wasiwasi! Tutakupigia”

Nancy aliondoka kituoni na wadogo zake kwenda nyumbani ambako aliendelea kusubiri taarifa za kukamatwa kwa majambazi waliowateka wazazi wake pamoja na mchumba wake Danny, hakubanduka pembeni mwa simu akisubiri simu kutoka kituo cha polisi cha Bagamoyo lakini hakuna simu iliyoingia kutoka Polisi zaidi ya zilizopigwa na watu waliompa pole.

Siku hiyo alilala mpaka asubuhi bila taarifa yoyote na ikapita hadi siku iliyofuata, siku ya tatu saa sita mchana simu iliita! Wakati huo alikuwa ametoka kwenda msalani, alikatisha starehe yake na kukurupuka hivyohivyo hadi sebuleni, kweli simu hiyo ilitoka Polisi.

“Tunakuhitaji uje mara moja hapa kituoni, hili ni agizo kutoka kwa Mkuu wa Kituo!”

“Nipe dakika tano nitakuwa hapo!”

“Tafadhali usichelewe!”

“Nakuja!”

Kabla ya kuondoka alikwenda chumbani kuangalia wadogo zake na kukuta wapo katikati ya usingizi, hakutaka kuwashtua kwani aliamini asingechelewa sana kituoni! Aliinamana na kuwabusu wote wawili usoni kisha kutembea hadi nje ambako aliwasha gari na kuondoka kwa kasi kuelekea kituo cha Polisi.

“Karibu Nancy!” Askari wa kike aliyekuwa mapokezi alimkaribisha, alishafahamika kwa maaskari wengi kituoni hapo

“Ahsante!”

“Umekuja kumwona Mkuu?”

“Ndiyo nimepigiwa simu!”

“Zunguka basi upande huu nikupeleke!”

Nancy alifanya kama alivyoombwa na kuongozwa hadi ofisini kwa Mkuu wa kituo, mzee mfupi mnene alikaa nyuma ya meza akiwa amevaa magwanda ya jeshi la Polisi, alimkaribisha Nancy kitini na baadaye askari aliyempeleka aliondoka na kuwaacha wawili.

Baada ya salamu maongezi kati yao yalianza, mzee huyo aliyejitambulisha kwa jina la Afande Alphonce alianza kumuuliza Nancy maswali juu ya tukio zima ambayo hayakutofautiana sana na maswali aliyokwishakuulizwa na maaskari wa upelelezi kabla. Yote aliyajibu kutegemea na ufahamu aliokuwa nao na mkuu wa kituo alimweleza hatua waliyokuwa wamefikia katika kazi ya kupeleleza.

“Unamhisi nani?”

“Hakuna mtu mwingine ninayemhisi zaidi ya Tonny!”

“Tumemhoji sana lakini inavyoonekana hakuna anachokifahamu na amedhaminiwa na mzee Katapila nafikiri unamfahamu yule tajiri mkubwa jijini Dar es Salaam!”

“Yaani amempa Tonny dhamana?”

“Ni haki yake kudhaminiwa!”

“Hapa lazima kuna kitu kimetendeka sio bure! Mtampaje dhamana wakati wazazi wangu, mzee Mwinyimkuu bado hawajapatikana!” Aliongea Nancy kwa sauti ya juu akisimama na kukiacha kiti, kifua chake kikiwa kimejaa pumzi na kumfanya ashindwe kuongea vizuri

“Nancy...! Tulia kidogo, tafadhali shusha jazba ili tuongee kwa utaratibu, hakuna ushahidi wa kutosha kuwa Tonny ndiye ameshiriki katika kuwateka wazazi wako!”

“Sawa tu! Lakini haki lazima itatendeka na nitahakikisha Tonny na wote walioshiriki wanaingia mikononi mwa sheria!”

“Tutashukuru sana kama utatusaidia maana hii kazi inaonekana kuwa ngumu, vijana wangu wanajitahidi sana lakini hawafanikiwi hata kupata picha ya mahali wazazi wako walipopelekwa na hatuna uhakika kama wapo hai ama wamekufa! Hata hivyo hatujakata tamaa, bado tunaendelea na kazi”

Nancy hakuwa na la kusema tena, muda wote alikuwa akilia! Alikuwa ameingia katika matatizo mengine mazito zaidi baada ya tu ya kuibuka katika tatizo la wendawazimu na yamini aliyokula! Alimlaumu Tonny kwa kila kitu kilichotokea maishani mwake, yeye ndiye alikuwa mkandarasi wa mabaya yote yaliyokuwa yakimtokea.

“Tonny hastahili kuishi!” Aliongea kwa sauti akiketi kitini na baadaye kunyanyuka tena na kumpa mkono mkuu wa Kituo ili waagane.

“Nakushukuru sana kwa kuja binti!”

“Ahsante sana Mkuu, kuna jambo jingine la kuongelea kabla sijaondoka?”

“Hapana! Nenda kama kuna kitu kitajitokeza tutakupigia simu tena”

“Ahsante!”

Nancy alitoka ofisini kwa mkuu wa kituo akijifuta machozi, moyo wake ulikuwa umeongezewa kidonda kingine! Kitendo cha Tonny kuwekewa dhamana na tajiri wakati yeye Nancy alikuwa na uhakika asilimia mia moja ndiye aliyehusika kila kitu juu ya kutekwa kwa wazazi wake, kiliashiria mazingira ya rushwa! Roho ilimuuma sana kugundua hata Polisi aliowategemea kuwa walinzi wa usalama wa Raia walionekana kutokuwa upande wake.

“Sina la kufanya kwa sasa lakini haki lazima itatendeka!” Aliwaza akiingia ndani ya gari akawasha na kuondoka zake akitimua vumbi, moyo wake ulijaa hasira na alikuwa na wasiwasi mwingi moyoni! Kwani maisha yake yalikuwa hatarini kama Tonny alikuwa huru, aliamini angeweza kumfanya chochote lakini yote alimwachia Mungu na tayari alishaanza kukata tamaa.CHANZO:  https://deusdeditmahunda.blogspot.com/

Aliendesha gari akilia hadi nyumbani kwao ambako aliegesha na kuingia ndani na kujimwaga kwenye kochi ambako aliendelea kulia akiwakumbuka wazazi wake pamoja Danny! Dunia ilikuwa imebadilika kupita kiasi, kwake hapakuwa mahali pa kuishi tena bali jehanamu ndogo. Alishindwa kuelewa angefanya nini kubadilisha hali iliyokuwepo ili mambo yarejee kuwa kama zamani, awe mke wa Danny na arudi Chuo Kikuu kuendelea na masomo yake.

Alikaa sebuleni hadi akapitiwa na usingizi, alipozinduka ilikuwa saa kumi na mbili ya jioni! Alishangaa kuona wadogo zake hawapo sebuleni, kwani kwa wakati huo mara nyingi walizoea kukaa sebuleni wakicheza! Kwa sababu wakati anaondoka kwenda kituoni walikuwa wamealala aliamini bado wapo chumbani, swala hili halikupitishwa moja kwa moja kichwani mwake kwani haikuwa kawaida ya David na Catherine kuwa chumbani muda huo ni hapo ndipo alipoamua kunyanyuka kwenda chumbani kuangalia.

Mlango ulikuwa wazi na kitandani hapakuwa na kitu! David na Catherine hawakuwepo, alitoka mbio na kuanza kukagua vyumba vingine vyote hadi chooni lakini bado hakuwaona! Wasiwasi ulianza kumwingia kuwa huenda akiwa kituoni, baada ya Tonny kupewa dhamana alikwenda nyumbani kwao na kuwateka watoto.

Alitoka ndani ya nyumba na kukimbia nyumba ya jirani kuulizia kama kuna gari lilifika nyumbani kwao mchana akiwa kituoni, hakuna aliyeonakana kufahamu! Nancy alizidi kuchanganyikiwa, alirudi tena ndani na kuendelea kupekua lakini David na Catherine hawakuwepo! Alilia kwa uchungu.

Hakuwa na la kufanya zaidi ya kupiga simu polisi kuwataarifu juu ya kilichotokea, aliunganishwa moja kwa moja na mkuu wa kituo na kumweleza mambo yaliyotokea akilitupia lawama jeshi la Polisi kwa kumwachia Tonny ili aende kuwateka wadogo zake pia.

“Hivyo ndivyo unavyofikiri?” Mkuu wa Kituo aliuliza.

“Ndio!”

“Basi shauri yako!” Aliongea Mkuu wa Kituo na kukata simu.

Nancy alibaki akilia machozi na aliendelea usiku mzima hadi asubuhi saa kumi na mbili aliposhtuliwa na mlio wa simu akanyanyuka na kuikimbilia akitegemea ingekuwa ni taarifa ya Polisi wakimweleza mahali baba, mama, Danny, wadogo zake na mzee Mwinyimkuu walikokuwa.

“Haloo!” Ilikuwa sauti ya mtoto mdogo na kwa kuisikiliza mara moja Nancy aliweza kuitambua, alikuwa mtoto David.

“Ndiyo! Mko wapi?”

“Tuko...!Tuko...!” Mtoto hakuweza kueleza, sauti nzito ya mwanaume ilisikika.

“Nancy za siku nyingi?”

“Nzuri nani anaongea?”

“Mimi? Umenisahau?”

“Siwezi kukumbuka kwenye simu mpaka uniambie unaitwa nani?”

“Unakikumbuka kisiwa cha Galu?”

“Ndiyo!”

“Unakumbuka wazee wawili wanaoitwa Mzee Kiwembe na Babu Ayoub?”

“Ndiyo!”

“Basi tulikuja kuchukua watoto wetu na hivi sasa tuko njiani kurejea kwetu!”

“Mlipafahamu vipi nyumbani na namba ya simu mmeitoa wapi?”

“Hiyo siyo kazi ngumu sana kwetu, tumekaa Bagamoyo kwa wiki nzima!”

“Kwa hiyo hata wazazi wangu mmewateka nyinyi?”

“Hapana, hatujahusika! Hatukuwa na sababu ya kufanya hivyo! Sisi pia tulisikia tu baba na mama yako wametekwa na watu wasiojulika.....!”

Simu ilikatika na Nancy alibaki kusubiri ilie tena lakini jambo hilo halikutokea, aliendelea kuwalilia wadogo zake! Alishawazoea na hakuwa tayari kuwaacha warejee mikononi mwa wazee hao hatari, aliamini siku moja lazima angewakomboa ingawa hakuelewa ni kwa njia zipi.

Saa nne na nusu za asubuhi simu ililia tena, alinyanyua na kuipokea akiamini ilitoka kituo cha Polisi, ilikuwa sauti ya mwanamke akiongea kwa nyodo!

“Halooo wewe ni nani?”

“Unataka kunifahamu?”

“Ndiyo!”

“Ni mimi mke mwenzio! Mambo uliyonifanyia kanisani sijayasahau, aibu niliyoipata siku hiyo sitoisahau pia ndio maana niliamua kuacha chuo ili nimfundishe adabu huyu mwendawazimu! Hebu kwanza ongea naye” Aliongea mwanamke huyo bila kutaja jina lake.

Sekunde chache baadaye sauti ya kiume ilisikika, alikuwa Danny akiongea huku akilia! Damu katika mwili wa Nancy ilikwenda kasi huku moja ukimdunda kwa nguvu kama uliotaka kuchomoka kifuani kwake! Danny alielezea mateso aliyokuwa akipata huku akilia, Nancy alishindwa kujizuia naye akajikuta akibubujikwa na machozi.

“Uko wapi?”

“Sijui mahali nilipo maana wakati naletwa hapa nilikuwa nimefungwa na kitambaa cheusi usoni!”

“Uko na baba na mama yangu?”

“Hapana!”

“Huyo mwanamke ni nani?”

“Ni Agness! Niliyemwacha kanisani siku ya ndoa kwa sababu yako, aliamua kukodisha watu kunileta hapa kuteswa! Kama unaweza kuja kuniokoa tafadhali fanya hivyo, wataarifu polisi kama wewe huwe......!”Hakuyamalizia maneno yake, kukatokea ukimya wa sekunde kadhaa ndipo baadaye ikaibuka sauti ya kike.

“Usijisumbue kutoa taarifa polisi! Kaa mbali na jambo hili kama unataka kuishi, vinginevyo utapoteza uhai wako!”

“Huwezi kuniua! Malaya mkubwa weee! Na ninakueleza kwa mkono wangu nitakufikisha mbele ya sheria na nitamkomboa Danny kabla hujamfanya lolote!”

“Unanitukana mimi? Unataka nikufanyizie?”

“Fanya lolote unalotaka!”CHANZO:  https://deusdeditmahunda.blogspot.com/

“Poa!” Agness alijibu na simu kukatika akimwacha Nancy mwenye wasiwasi mwingi juu ya maisha yake.



Hakuna kilichomuumiza Agness moyo kama kitendo cha kuachwa na Danny kanisani mbele ya Padri kisa kikiwa ni kurudi kwa Nancy! Alilia kwa uchungu na kuondoka kanisani yeye na ndugu zake wakiwa wamejaa gadhabu, hakuna walichokifikiria zaidi ya kisasi kwa Danny kwa aibu aliyosababishia ukoo wao.

“Anastahili kufa! Hakuna kitu kingine kinachostahili kuwa adhabu kwa Danny isipokuwa kifo! Ametufanyia kitendo cha aibu sana katika familia yetu, hakika hastahili kuhurumiwa!” Walisema baadhi ya ndugu wa Agness wakiingia katika magari tayari kwa kuondoka eneo la kanisa.

Ilikuwa aibu iliyomkera kila mtu, Agness hakuwahi kuwaeleza ndugu zake juu ya msimamo wa Danny kuhusu msichana Nancy! Kwamba alikuwa naye lakini kama ingetokea akarudi basi angelazimika kumwacha na kurudiana na mpenzi wake wa zamani. Akiufahamu ukweli huo Agness aliwaunga mkono ndugu zake.

Kikao cha siri kilifanyika usiku wa manane nyumbani kwao Agness Jijini Dar es Salaam, mara tu walipowasili kutoka Bagamoyo! Pamoja na kusafiri umbali wa kilometa zaidi ya hamsini kutoka Bagamoyo mpaka Dar es Salaam bado mioyo ya ndugu wengi wa Agness hata wazazi wake ilijawa na hasira.

Mauaji ya Danny yalitawala mjadala katika kikao hicho, kila mtu alitaka Danny auawe tena kwa mateso makubwa iwe fundisho kwa watu wenye tabia za kudhalilisha watoto wa watu, Agness hakutetea kitu chochote hata yeye alikuwa tayari kuona Danny anakufa, muda wote alikuwa akilia machozi ya uchungu akilaani kitendo alichofanyiwa, hakutaka kukubali ukweli kuwa aliwahi kuelezwa na Danny juu ya Nancy.

“Ni heri tukose wote! Hata huyo mwendawazimu wake pia akose mume!” Aliwaza Agness akibubujikwa na machozi.

Familia ilikubaliana kufanya mauaji ya siri kubwa, mzee Elibariki Shao, baba mdogo wa Agness na mfanyabiashara maarufu jijini Dar es Salaam aliyemiliki vituo vingi vya mafuta aliahidi kushughulikia suala hilo yeye mwenyewe tena kwa gharama zake bila kushirikisha familia, alionyesha wazi chuki yake kwa Danny na kusema kilichofanyika ilikuwa ni aibu kwa ukoo mzima wa Shao.

Hapakuwa na mtu mwingine wa kutatua tatizo hilo, ni mtu mmoja tu ambaye mzee Shao alimfikiria! Hakuwa mwingine bali mzee Katapila, mtaalam wa mauaji tena kwa gharama nafuu! Baada ya kikao usiku huohuo kwa kutumia simu yake ya mkononi alipiga namba ya mzee Katapila na kupanga kukutana naye siku iliyofuata ili ampe kazi ya kufanya.

“Mtu kakuudhi nini?”

“Ebwanae duniani hapa hata ukitulia watu watakuchokoza!”

“Kakufanya nini?”

“Siwezi kuongea kwenye simu, simu zetu wengine zinasikilizwa nataka kukutana na wewe ana kwa ana!”

“Basi kesho saa nne asubuhi njoo ofisini kwangu!”

“Sawa rafiki!”

Walikuwa marafiki wa siku nyingi sana, waliowahi kushirikiana katika biashara mbalimbali na mzee Shao alikuwa na uhakika kwa kumtumia mzee Katapila kazi yake ingefanyika! Alisifika kwa kazi za ujambazi ingawa alikuwa mtu tajiri pengine katika nafasi ya pili au ya tatu jijini Dar es Salaam.

“Kazi imemalizika! Niachieni kila kitu na nitakifanya kwa uaminifu!” Mzee Shao aliwaambia ndugu wote waliokusanyika kabla hawajasambaa, ilikuwa tayari ni Alfajiri.

*********

Mzee Shao hakulala usingizi wala kukigusa kitanda chake, alichofanya baada ya kufika nyumbani kwake ni kuoga na kujiandaa kwenda ofisini kwake jengo la IPS katika ya jiji la Dar es Salaam, alijishughulisha na biashara ya kusafirisha mizigo ndani ya nje ya Tanzania akiwa na kampuni yake ya East African TransCargo.

Asubuhi hiyo ingawa ilikuwa siku ya Jumapili alikuwa na kazi za kufanya kabla hajaelekea ofisini kwa mzee Katapila na alimaliza kila kitu ilipogonga saa nne kasorobo na taratibu akajikongoja kwa miguu kuelekea kwenye ofisi ya mzee Katapila iliyokuwa ndani ya jengo lake refu la Katapila House lililokuwa mtaa wa Jamhuri.

“Binti naomba kumwona bosi!”

“Nimwambie nani?”

“Rafiki yake Elibariki!”

“Alishanitaarifu juu ya ujio wako, tafadhali karibu anakusubiri!”

“Ahsante!”

Mzee Katapila alimkaribisha mzee Shao ofisini kwake, baada ya salamu hakutaka kupoteza muda, alianza kueleza shida yake mara moja akionekana mwenye jazba aliyepania kufanya mauaji! Muda wote akiongea mzee Katapila alikuwa akitabasamu na kutingisha kichwa chake.

“Aisee! Hiyo ni kazi ndogo lakini lazima uhakikishe kuwa hutoboi siri mahali popote, kama ikitokea ukafanya hivyo basi hata wewe mwenyewe rafiki yangu maisha yako yatakuwa hatarini, nafikiri sifa zangu unazisikia!”

“Ah! Nakufahamu!”CHANZO:  https://deusdeditmahunda.blogspot.com/

“Nitakusaidia kufanya unavyotaka, lakini uwe tayari kunilipa milioni tano!”

“Hilo sio tatizo!”

“Nielekeze mahali anapoishi, baada ya kufanya kazi ndio utanilipa pesa!”

“Sina uhakika sana anaishi wapi labda jambo hilo nilifanyie kazi baada ya kutoka hapa!”

“Sasa bahati mbaya mimi ninasafiri kwenda Afrika Kusini nitarudi baada ya wiki moja, usiwe na wasiwasi kazi yako nitaifanya baada ya kurudi!”

“Nakutegemea wewe!”

Hapakuwa na maongezi zaidi baada ya hapo, waliagana mzee Shao akarudi ofisini kwake ambako baadaye aliwapigia simu baadhi ya ndugu akiwemo Agness wakakusanyika na kuliongelea suala hilo, kila mtu alikuwa bado amedhamiria kufanya mauaji ya Danny.

Wiki moja baadaye mzee Katapila alirejea na kupewa maelekezo yote juu ya mahali Danny alikoishi, hakuwa mahali pengine zaidi ya nyumbani kwa mzee Katobe akisubiri kufunga ndoa na Nancy! Jambo hilo ndilo lilitaka kuzuiliwa haraka iwezekanavyo, ilikuwa ni lazima Danny atekwe na kuuawa kabla ndoa haijafungwa.

“Ndoa haitafungwa! Leo hiihii nawatuma vijana wangu kwenda kufanya kazi huko huko Bagamoyo! Mnataka tumuue palepale?”

“Hapana! Ni lazima ateswe kwanza!”

“Kwa hiyo baada ya kumteka tumpeleke wapi?”

“Tafuta mahali tumhifadhi!”

“Ninalo ghala langu lililowahi kuwa kiwanda cha Fenicha huko Vingunguti, kwa hivi sasa halitumiki ila kuna walinzi wa Omega Security wanaolinda kwa nje, hawaruhusiwi kuingia ndani kwani kuna vitu vyangu muhimu na vya siri navihifadhi!Ninaweza kutoa chumba kimoja pale ili ateswe vizuri lakini itawalazimu mniongezee shilingi milioni moja!”

“Haina tatizo, tunachotaka sisi ni kutoa mfano, aliyekuwa bibi harusi mtarajiwa amekasirika sana!”

“Basi niachieni mimi, kesho usiku njooni nitawapeleka mahali atakapokuwa!”Mzee Katapila alimwambia mteja wake.

Jambo hilo lilifanyika, Danny akawa ametekwa kutoka nyumbani kwa mzee Katobe na kusafirishwa hadi Vingunguti akafichwa ndani ya ghala la mzee Katapila, siku hiyo hiyo Agness alifika ghalani na baadhi ya ndugu na mateso yakaanza rasmi kabla Danny hajauawa.

*********

Kugundua kuwa Danny hakutekwa na Tonny isipokuwa Agness kulimwongezea Nancy hasira! Aligundua ni kazi kubwa kiasi gani aliyokuwa nayo mbele yake lakini ilikuwa ni lazima aifanye kwani hapakuwa na mtu mwingine wa kuwakomboa wazazi, mchumba, mzee Mwinyimkuu pamoja na wadogo zake waliotekwa.

“Lazima niwakomboe! Hata kama kuna vitisho kiasi gani, Agness ni mwanamke kama mimi! Simjui kwa sura wala umbile lakini nitapambana naye!”Aliwaza Nancy.

Ni kweli hakumkumbuka Agness kwa sababu siku aliyoingia kanisani na kukuta ndoa kati ya Danny na Agness ikiwa mbioni kufungwa, alikuwa ni mwendawazimu ambaye hakuelewa chochote.

Alitamani kuwa mtaalam wa silaha ili aweze kupambana vizuri na alihitaji kuwa na bunduki yake lakini hakuwa na uwezo huo, alielewa wazi kupambana kwa mikono na watu wenye silaha lilikuwa jambo gumu kwake kupata mafanikio! Fikra za mafunzo ya Mgambo zilimwingia na siku hiyo hiyo alianza kufutilia suala hilo, ikawa kama bahati alipofika ofisini kwa mshauri wa Mgambo alikuta watu wakijiandikisha naye alifanya hivyo mara moja.

“Sasa kazi wataipata, mambo yanakwenda kama nilivyopanga!” Aliwaza Nancy.

Siku iliyofuata aliingia uwanja wa shule ya msingi Mwanamakuka, akiwa na kundi la vijana kama themanini na kuanza mafunzo, kwa wiki mbili kazi ilikuwa hiyo na tayari alishafundishwa jinsi ya kutumia bunduki aina ya SMG na hata mazoezi ya kulenga shabaha yalishafanyika, mafunzo yalikwenda haraka kuliko kawaida kwa sababu vijana waliohitaji mafunzo walikuwa wengi.

“Sihitaji kitu zaidi, nilichotaka mimi ni kuelewa kutumia bunduki basi hakuna zaidi!”Aliwaza Nancy.

Tangu siku hiyo hakwenda tena uwanjani, alishinda nyumbani akifikiria ni kitu gani cha kufanya na akiwawazia sana wazazi, wadogo na mchumba wake! Aliamini walikuwa mahali fulani wakisubiri msaada wake kuwaondoa katika mateso, alitamani kumfuata Tonny kumwomba msaada kwani alishagundua wazi hakuwa na hatia.

Akiwa katika mawazo hayo simu iliyokuwa mezani ililia na kwa unyonge alinyanyuka na kuifuata, mawazo yake yote yakaimini ilikuwa ni simu kutoka polisi ambao alikuwa hajasikia kitu chochote kutoka kwao.

“Halow!”Aliita lakini hakuitikiwa, alichokisikia upande wa pili ni kwikwi za mtu akilia kwa uchungu.

“ Wewe nani?” Alizidi kuuliza lakini bado hakujibiwa, wasiwasi ulizidi kumwingia.

“Mimi...! Mimi...!Ni mama yako!”

“Mama! Mama!Mko wapi?”

“Sielewi hapa tulipo ni wapi ila elewa tuko katika mateso makali na tunahitaji msaada wako, baba yako ana hali mbaya sana kama unaweza tafadhali njoo!”

“Mko na Danny?”

“Hapana! Tupo na baba yako pamoja na mzee Mwinyimkuu!”

“Wapi?”

Simu ilikatika kabla hajapewa jibu, Nancy akazidi kuchanganyikiwa na wajibu ukazidi kuongezeka, uchungu mkubwa ulimshika moyoni na kujikuta akiyaona maisha yake hayana thamani yoyote! Alikuwa tayari kufa lakini aokoe maisha ya wazazi wake, hakuna kitu kilichowahi kuumiza moyo wake kama kumsikia mama yake akilia kwa sauti aliyoisikia kwenye simu.

“Kwa ujuzi mdogo nilioupata, hakika nitawakomboa wazazi wangu! Si wazazi wangu tu bali pia Danny, wadogo zangu na mzee Mwinyimkuu!” Aliongea peke yake Nancy akikaa kitini, mwili wake wote ulikuwa ukitetemeka kwa hasira.

“Haiwezekani! Iko namna, lazima nijue hawa watu wanapiga simu kutoka wapi, huo ndio utakuwa mwanzo wa upelelezi wangu, polisi wamenitelekeza lakini nitafanya kazi mwenyewe mpaka niwafikishe wahalifu mbele ya sheria!”Aliwaza Nancy na kuyaona mawazo yake yalikuwa sahihi.

Alitoka nje na kuingia ndani ya gari tena bila kufunga mlango wa nyumba na kuondoka kuelekea ofisi za Kampuni ya Simu. Saa, dakika, sekunde za nyakati ambazo simu zote ziliingia alikuwa nazo kwenye kitabu chake kidogo! Hilo ndilo jambo muhimu alilokumbuka kufanya. Dakika kumi baadaye aliegesha gari mbele ya jengo la Kampuni ya Simu lililo kandokando ya barabara mara tu uingiapo Bagamoyo.

“Dada samahani!” Alianza kumwambia mfanyakazi wa kampuni ya simu baada ya salamu.

“Sema nikusaidie!”

“Naomba uniangalizie, kuna simu tatu zimeingia kwenye nyumbani kwetu, moja leo na nyingine mbili ni wiki mbili zilizopita lakini nakumbuka muda ambao ziliingia!”

“Sasa nikusaidiaje?”

Kabla Nancy hajasema lolote aliingiza mkono wake kwenye mkoba na kuchomoa noti nne za elfu tanotano akaziweka mezani, mfanyakazi wa Kampuni ya Simu alionyesha mshangao wa ajabu, hakuelewa fedha hizo zilikuwa za kazi gani.

“Hiyo siyo Rushwa ni shukrani kwa kazi utakayonisaidia, naomba tu uniangalizie hizo namba ni zipi na zilipigwa kutoka wapi!”

“Sawa lakini hapa siwezi kukusaidia! Hatuna huo mtambo acha nipige Dar es Salaam makao makuu kuna rafiki yangu atakusaidia!”

“Mungu akubariki sana!” Aliongea Nancy akionyesha meno yake nje kama dalili ya tabasamu, moyoni alikuwa akisali ili aweze kubahatisha kuelewa namba hizo zilipigwa kutoka wapi! Huo ndio ungekuwa mwanzo wa kazi yake ndefu.CHANZO:  https://deusdeditmahunda.blogspot.com/

Mfanyakazi wa Kampuni ya Simu akiwa amefurahishwa na fedha iliyokuwa mezani kwake, alinyanyua simu na kupiga Makao makuu na kuomba kuongea na rafiki yake aitwaye Linda na kumweleza shida yake, alimtajia namba ya simu ya nyumbani kwa mzee Katobe pamoja na nyakati ambazo simu hizo ziliingia. Dakika tano baadaye alikuwa na jibu.

“Hii ya leo ni namba 2181719, inatoka Dar es Salaam, mwenye simu ni Kampuni iitwayo Tanbrand Funitures Ltd na hii namba 0222468 inatoka Kilosa, inamilikiwa na mtu anayeitwa Abdulmarik Issa! Hii ya tatu ilipigwa kutoka Nzega, Shinyanga bahati mbaya jina la mwenye simu halikujulikana mara moja, inavyoonekana ni hizi simu za kupiga kwenye vibanda!”

“Ahsante sana dada! Umenisaidia kuliko unavyofikiria, chukua na hii!” Nancy alimkabidhi noti nyingine ya shilingi elfu tano meno yote thelathini na mbili ya mfanyakazi wa Kampuni ya Simu yakawa nje.

Nancy aliondoka na kurejea nyumbani ambako alijifungia chumbani na kuanza kulia, alielewa kazi iliyokuwa mbele yake ilikuwa ngumu na pengine yenye mateso mengi ambayo yangeweza hata kumgharimu maisha yake! Hakujihurumia hasa alipowafikiria wazazi na wadogo zake na alikuwa tayari kwa lolote.

Alilia usiku mzima mpaka kukacha, asubuhi hiyo alikuwa na azimio moja kichwani mwake! Kuanza na Dar es Salaam kabla hajaenda Kilosa na baadaye ziwa Tanganyika alikoamini wadogo zake walipelekwa.

“NAANZA NA DAR ES SALAAM! DAMU ZA AGNESS NA NDUGU ZAKE WOTE NI HALALI YANGU NI LAZIMA DANNY AWE HURU!”Alisema Nancy kwa uchungu.

Hakuwa na jambo jingine la kufanya Bagamoyo, hakuna kilichosalia kwake! Wazazi hawakuwepo, wadogo zake hawakuwepo na wote pamoja na mchumba wake Danny walikuwa katika mateso, alitoka ndani ya nyumba na kufunga mlango akaingia ndani ya gari la baba yake ambalo wakati huo lilikuwa ni kama mali yake, alipoiangalia nyumba yao machozi yalizidi kumtoka aliamini hiyo ilikuwa mara yake ya mwisho kuiona nyumba yao.

“Buriani!” Alitamka maneno hayo akiingia garini na kuondoka,hakuwa na uhakika kama angerudi tena Bagamoyo akiwa hai.



Nancy amefanikiwa kumwokoa Danny kutoka katika ghala la mzee Katapila huko Vingunguti, wote wawili wanachukua gari la mzee Katapila hadi Kimara ambako wanakodisha teksi inayowapeleka hadi kijijini Tindiga huko Kilosa shambani kwa mzee Katapila.

Ni huko ndiko wazazi wa Nancy pamoja na mzee Mwinyimkuu wamefungiwa wakiteswa, lengo lao ni kuwaokoa na wanafanikiwa kuingia ndani ya ngome ya shamba hilo, Danny amepigwa mshale mbavuni na Nancy amewekwa chini ya ulinzi na mlinzi wa Kimakonde aliyeuvuta upinde wake sawasawa tayari kwa kuuachia ili uzame katika nyama za msichana huyu jasiri.

Je, nini kinafuata? Atafanikiwa kuwaokoa wazazi wake? Nini hatima ya Danny ambaye mshale umezama mbavuni kwake? Endelea.........



Nancy alibaki amepiga magoti chini pembeni mwa Danny akitetemeka mwili mzima, ingawa hali ilikuwa ya baridi alihisi jasho jembamba likimtoka na kulowanisha nguo zake! Mzee mfupi, mwenye misuli alisimama nyuma yake akiwa ameuvuta upinde wake sawasawa tayari kwa kuachia mshale, kulikuwa na kila dalili kama Nancy angejitingisha au kutotii amri aliyokuwa amepewa, mshale ungezama kifuani kwake na huo ndio ungekuwa mwisho wa maisha yake, yeye na Danny wangekufa kabla hata ya kuwakomboa wazazi wake.

“Mzee naomba usiniue, najua unao uwezo wa kufanya hivyo lakini tafadhali sana nisikilize!” Aliomba lakini mzee huyo hakumjali.

“Huchikii siyo? Nimesema uchijitingiche, uchigeuke, uchikae, uchichimame, uchicheke wala uchiheme!” Aliendelea kusisitiza mzee huyo akimaanisha Nancy asiongee chochote, kulikuwa na kila dalili hapakuwa na utani katika maneno yote aliyoyasema.

Kulikuwa na mambo mawili tu ya kuchagua kwa Nancy, aidha kusubiri kifo kwa mshale au kujaribu kujiokoa kwa namna yoyote ile! Hakuwa na uhakika kama chaguo lake la pili lingefanya kazi lakini pia hakuwa tayari kusubiri kifo chake kama kondoo, nguvu ya ajabu ilimwijia mwilini mwake, ilikuwa ni lazima aitumie bastola iliyokuwa pembeni mwake kujiokoa.

Akili yake ilifanya kazi kwa kasi, akayumba kidogo kuelekea kulia kisha kurudi haraka kushoto, alishangaa kuona mshale ukipita kwa kasi kuelekea mbele, ulikuwa umemkosa kidogo tu! Alimshuhudia mzee huyo akipinda mkono wake mgongoni kuchomoa mshale mwingine lakini kabla hajafanikiwa kufanya hivyo tayari Nancy alishainyakua bastola yake ardhini na risasi moja ilizama katikati ya kifua cha mzee huyo akaanguka chini bila kupiga kelele, kwa Nancy ulikuwa ni ushindi.

“Haleluya!” Nancy alijikuta akitamka maneno haya bila kutegemea, furaha kubwa ilimjaa moyoni kuona amekiepuka kifo.

Bila kuchunguza kulikuwa na walinzi wengine, alimgeukia tena Danny aliyekuwa kimya na kuanza kumwita huku kwa mara nyingine akijaribu kuung’oa mshale! Danny aliyekuwa kimya alipiga kelele kwa maumivu akimwomba auache kama ulivyo.

“Nia..che!Nia..che dar..ling, nenda kaja..ribu kuwaokoa wazazi kwangu mimi imeshindikana!” Aliongea Danny kwa taabu.

“Haiwezekani! Haiwezekani Danny, huwezi kufia hapa!”

“Sasa uta..fanya ki...tu gani?”

“Lazima kuna njia ya kuokoa maisha yake!” Aliwaza Nancy na kwa haraka alimsogelea mzee aliyempiga risasi, akamvua mashuka aliyovaa na kuyafunga mwilini akizifunika nguo alizovaa! Alimalizia kwa kuchukua kofia ya mzee huyo iliyotengenezwa kwa nyasi na kuivaa kichwani.

Nancy alitaka kujibadilisha afanane na walinzi wa shamba la mzee Katapila ili kufanya kazi ya ukombozi iwe rahisi, alikuwa amebakiza hatua moja tu, kuingia ndani ya jengo kubwa lililokuwa mbele yake na kuwakomboa wazazi wake lakini hatua hiyo aliamini ndiyo ilikuwa ngumu kuliko zote zilizotangulia.

Hakuelewa nguvu zilizomiminika mwilini mwake zilitoka wapi kwani hata siku moja hakuwa kutegemea angeweza kumbeba mtu mwenye uzito mkubwa kama Danny lakini alishangaa kuona anamnyanyua na kumweka begani kwake na kukimbia naye kusonga mbele bastola ikiwa mkononi.

Alipokuwa umbali kama wa mita hamsini kutoka kwenye jengo hilo, alimlaza Danny chini kwa uangalifu ili mshale usizidi kuzama, alikuwa kimya kabisa na hata alipomwita hakuitika! Nancy alilia na kupoteza kabisa matumaini ya kumwokoa mwanaume aliyempenda na kumhitaji maishani mwake.

“Danny!Danny! Danny!” Alizidi kumwita lakini bado aliendelea kuwa kimya.CHANZO:  https://deusdeditmahunda.blogspot.com/

Alinyanyuka na kusimama wima akimwangalia kwa macho ya huruma, muda ulikuwa ukizidi kusonga na giza kupungua, alielewa muda mfupi uliofuata ingekuwa alfajiri na ilikuwa ni lazima afanye kila kitu wakati bado kuna giza! Ni hapo ndipo alipojikuta akiamua kumwacha Danny mahali hapo na kusonga mbele, kila kitu akikikabidhi mkononi mwa Mungu! Aliamini kuna wakati binadamu anatakiwa kuchagua moja na haikuwa rahisi kukiongezea uhai kitu ambacho Mungu mwenyewe alikuwa ameamua kife.

Alipiga magoti tena akainamisha kichwa chake na kusogeza mdomo wake karibu kabisa na sikio la Danny na kuanza kuongea masikioni mwake maneno aliyoamini yalikuwa ya mwisho.

“Danny ninakupenda, najua unanisikia! Nakuacha hapa nasonga mbele, kuna mambo mawili yanayoweza kutokea, aidha ninaweza kuungana na wewe ahera muda huuhuu au ukanitangulia kidogo lakini nina uhakika siku moja lazima tutakutana! Penzi lako kwangu lilikuwa la kweli, hakuna mwanaume atakayenipenda kama ulivyofanya wewe!...” Nancy hakumaliza sentensi yake hasira ikampanda, kifo cha Danny kilimuongezea uchungu.

Alinyanyuka na kuanza kukimbia kusonga mbele, hali ilikuwa kimya na hapakuonekana mlinzi yeyote! Hata hivyo hakutaka kujiingiza hatarini, alianza kutambaa kwa tumbo kuelekea mbele ya nyumba alikoamini kulikuwa na mlango. Alifanya kila kitu kwa uangalifu mkubwa akielewa eneo alilokuwepo lilikuwa ni la hatari, mbele kwenye kona akiwa amelala kifudifudi alichungulia na kuona watu wawili wenye bunduki wakiwa wamesimama na kulilinda lango.

“Hawa hawa ndio naanza nao!” Alijisemea na kunyanyuka kisha kuruka kwenda mbele huku risasi zikifyatuka kutoka kwenye bastola yake, kila kitu kilikwenda kama alivyotaka! Walinzi wote wawili walikuwa chini, Nancy alijishangaa alifanya kazi kama mtu aliyepitia mafunzo ya Ukomandoo.

Alikuwa na uhakika kabisa bastola yake ilikuwa inakaribia kuishiwa risasi, alichofanya akiamini mbele yake kulikuwa na kazi kubwa ni kuchukua moja ya bunduki za walinzi waliolala mbele yake! Hapo akawa na uhakika wa kuendelea na mapambano zaidi.

Akiwa mlangoni alisikia sauti za watu wakilia ndani ya jengo hilo, bila kufikiria mara mbili alizitambua sauti, walikuwa ni baba na mama yake! Kulikuwa na sauti nyingine nzito ambazo hakuzitambua. Nancy aliikosa thamani ya maisha yake mwenyewe, hakuona sababu ya kuendelea kuishi wakati wazazi wake walikuwa ndani ya jengo hilo wakiteseka na wakimtegemea yeye kuwaokoa.

“Ni bora kufa!” Alijisemea maneno hayo alichungulia ndani kupitia kwenye tundu la mlango, kulikuwa na mwanga mkali sana ndani ya jengo hilo uliomfanya awaone wazazi wake wakiwa wamelala chini uchi wa mnyama na mwanaume mmoja mwenye nguvu akiwachapa! Alijaribu kumtambua mwanaume huyo kuona kama alikuwa Tonny lakini haikuwa sura ya mtu aliyemfahamu, alielewa walikuwa ni vijana wa mzee Katapila.

Hasira aliyokuwa nayo moyoni mwake ilikuwa haielezeki, alikuwa ni kama Simba aliyejeruhiwa! Tayari alishaua watu wengi na alikuwa amempoteza mpenzi wake, hivyo hakuona sababu ya kushindwa kuingia ndani ya jengo hilo na kujaribu kuwaokoa wazazi wake, ingawa hakuwa na uhakika wa kupata ushindi alikuwa tayari kujaribu.

“Mh! Kumbe mlango haujafungwa?” Alijiuliza baada ya kugundua mlango ulikuwa wazi na hapo hapo bila kusita aliusukuma na kuingia moja kwa moja ndani, mkono mmoja ukiwa umeshika bunduki aina ya SMG aliyoichukua kwa mmoja wa walinzi na mwingine ukiwa umeshika bastola yake ambayo awali ilimilikiwa na mzee Katapila.

Risasi zilimiminika kutoka kwenye SMG na kuwaangusha watu watatu waliokuwa wamesimama wakiwatesa wazazi wake, akasonga mbele mbio hadi mahali hapo akiangaza huku na kule kuona kama kulikuwa na adui mwingine, hakumwona! Kwa sababu hakuwa na uhakika kama maadui waliokuwa chini walikuwa wamekufa alilazimika kuwaongezea risasi nyingine mbilimbili kutoka kwenye bastola yake, akahakikisha alikuwa salama.

“Nan..cy! Nan..cy!Na..ncy, Nancy mwanangu umefi....” Sauti ya mama yake iliongea kwa taabu, hakuweza kuimaliza sentensi yake.

Wazazi wake walikuwa wamelala sakafuni wakiwa wamefungwa kwenye vipande vya magogo, miili yao ilijaa majeraha ya kuchapwa, mzee Katobe hakuwa hata na uwezo wa kuongea lolote na hata mzee Mwinyimkuu pia alikuwa kimya! Ilivyoonekana wanaume walipigwa zaidi kuliko mama yake.

“Namshukuru Mungu mama! Sikutegemea hata kuwatia machoni, nimepita katika magumu mengi na siamini kama nitaweza kuwaokoa lakini acha nijaribu!”

“Hata tusipookoka si mbaya, ili mradi nimekuona mwanangu, nilikuwa na masi...kitiko makubwa sana kufa bila kukuambia maneno ya mwi...sho, kwa hivi sasa niko tayari kufa!Hata baba yako alitamani sana ku..kuona lakini ba.hati mbay...a tan..gu jana hao...ngei” Aliongea mama yake Nancy kwa taabu.

Nancy hakutaka kupoteza muda zaidi ilikuwa ni lazima awafungue kwenye magogo na kuwaweka huru ingawa hakufahamu angeondoka eneo hilo kwa utaratibu gani! Ndio, aliliona gari aina ya Landrover nje wakati akiingia ndani ya jengo lakini hakuelewa ni nani alikuwa na ufunguo wa gari hilo.

Mara moja alianza kumfungua mama yake, kisha baba yake na mwisho kwa mzee Mwinyimkuu lakini kabla hajamaliza alisikia sauti ya Tonny nyuma yake, akitokea kwenye mlango wa nyuma wa jengo hilo! Alikuwa na bastola mkononi, hasira ya Nancy iliongezeka maradufu, alimchukia mwanaume huyo kuliko kiumbe mwingine yeyote lakini hakuwa na la kufanya kwani hakuwa na bunduki mkononi mwake wakati huo, aliiweka pembeni kipindi akimfungua mama yake kutoka kwenye gogo! Kitendo chochote cha kujaribu kuichukua kingemaanisha kifo chake, Tonny asingemwacha hai.

“Nakupongeza sana Nancy kwa kazi nzuri uliyoifanya, wewe ni mwanamke hodari kwa kweli umejitahidi sana kutaka kuwaokoa wazazi wako lakini nakuhakikishia hautafanikiwa kwa hilo! Mambo yalipofika ni pabaya na kuwaokoa kwako kutamaanisha mimi kuingia matatizoni na hatimaye kwenda jela, sasa ni kipi bora? Kwanini nisikuue wewe, kuwaua wazazi wako na baadaye mimi mwenyewe kujimaliza kwa risasi?”

“Tonny ni lazima ukumbuke kuwa mimi na wewe tuliwahi kuwa wapenzi na tulishirikiana mambo mengi, kwanini leo tumefika hapa?” Nancy alijaribu kubembeleza.

“Usijaribu kunilaghai ili baadaye unigeuzie kibao, lazima ufe Nancy! Tena sasa hivi sikupi hata muda wa kusali sala yako ya mwisho!” Alisema Tonny akiwa amemlenga Nancy katikati ya paji lake la uso.

“PAAAAAAAA!” Ndio mlio uliosikika ndani ya jengo hilo.

CHANZO:  https://deusdeditmahunda.blogspot.com/

Danny amechomwa mshale kwenye mbavu wakiwa ndani ya ngome ya shamba la mzee Katapila,hajitambui na kuna dalili kwamba tayari amekwishakufa! Nancy analia kwa uchungu na kukosa jambo analoweza kufanya ili kuokoa maisha ya mchumba wake, anaichukulia hiyo kama kazi ya Mungu na kuamua kusonga mbele hadi ndani ya jengo walimo wazazi wake pamoja na mzee Mwinyimkuu.

Kwa risasi ameua watu wengi na kuwafikia wazazi wake lakini wakati anawafungua kamba, mwanaume asiyempenda na aliyesababisha matatizo yote yanayompata katika maisha yake, Tonny! Anatokea akiwa na bastola mkononi na kumweka chini ya ulinzi akitaka kumuua, muda mfupi baadaye anasikia mlio wa risasi na anaamini risasi hiyo imemwingia yeye.

Je, nini kimetokea? Fuatilia........



Hali ndani ya ghala la mzee Katapila iliwashangaza maaskari walioingia, maiti nne zililala chini moja ikiwa ya mwanamke ambaye hawakumtambua kwa jina! Hawakuamini macho yao walipomwona mzee Katapila ameanguka pembeni akilia kwa maumivu makali kutokana na risasi aliyopigwa pajani, mmoja wa maaskari alimsogelea na kuanza kumhoji maswali juu ya kilichotokea.

“Vipi mzee?”

“Majambazi!”

“Yamekuvamia?”

“Kabisa! Ina maana hamkukutana nayo?”

“Hapana!”

“Kuna gari mmepishana nayo muda si mrefu ikitokea hapa! Ni gari yangu yameondoka nayo!”

“Yakoje?”

“Siyakumbuki vizuri!”

“Yako mangapi?”

“Mawili tu! Mmoja mwanamke na mwingine mwanaume!”

“Pole sana kwa yaliyokupata maana naona wenzako wamefariki dunia! Inabidi tukupeleke hospitali!”

“Sina jinsi ili naomba kama mtawakamata hao majambazi waueni kabisa, askari atakayewapiga risasi nitampa milioni tano!” Aliongea mzee Katapila.

Alikuwa amedanganya kila kitu alichokisema lengo lake likiwa ni kuuficha ukweli na alitaka Nancy na Danny wauawe kabisa ili kuficha siri ya ukweli uliokuwepo, aliamini kama ingegundulika bado alijishughulisha na shughuli za ujambazi sifa yote aliyojipatia katika jamii ingepotea na angeingia matatizoni na pengine kupelekwa jela jambo ambalo hakutaka kabisa litokee.

“Unafikiri wameelekea wapi?”

“Wamedai wanakwenda Tindiga shambani kwangu kwenda kufanya ujambazi mwingine!” Alizidi kudanganya mzee Katapila lengo lake likiwa ni kuwafikishia maaskari ujumbe wa mahali Nancy na Danny walikokuwa wameelekea, hakuna alichokitamani kama kifo chao.

Maiti zote ikiwemo ya Agness zilisombwa na kupakiwa kwenye gari kisha mzee Katapila akafuatia na gari la polisi likaondoka kuelekea Muhimbili njiani kabla ya kufika hospitali maaskari waliwasiliana na wenzao waliolifuatilia gari lililowabeba Nancy na Danny walioamini lilikuwa la majambazi kwa taarifa walizopewa na mzee Katapila.

“Tumekuta limetelekezwa Kimara lakini tukapewa taarifa na wasamaria wema kwamba waliliacha na kukodisha teksi wakasonga mbele kuelekea Barabara ya Morogoro kama wanakwenda Tindiga basi tutawapata, afande Alphonce anasema anafahamu mahali shamba la mzee Katapila lilipo, msiwe na wasiwasi watatiwa mbaroni tu!”

“Tunawatakia kazi njema ila hali haikuwa nzuri ndani ya ghala la mzee Katapila, watu wanne wameuawa na mzee mwenyewe amepigwa risasi kwenye paja lakini hali yake sio mbaya sana!”

“Mnao wale walinzi wa Omega?”

“Ndiyo!”

“Mkihitaji msaada zaidi mnaweza kuwasiliana na kamanda wa Polisi wa Mkoa wa Morogoro!”

“Sidhani kama tunahitaji msaada ila tafadhali pigeni simu Morogoro muwape taarifa juu yetu!”

Waliagana na maaskari ndani ya gari la polisi lililokuwa safarini kuelekea Morogoro liliongeza kasi nyuma yake likiwepo gari la Kampuni ya Omega Security lililojaza walinzi wenye silaha wakiongozwa na kamanda Yesaya, kijana mwenye mwili mdogo lakini mbinu nyingi za kijeshi. Dereva aliuelewa urefu wa safari iliyokuwa mbele yao.

Nusu saa baadaye walikuwa wakivuka kijiji cha Mgeta, gari lao likitembea kwa kasi ya kilometa mia moja na sitini kwa saa lakini bado walikuwa hawajafanikiwa kulipata wala kuliona mbele yao gari walilokuwa wakilifukuza, walishindwa kuelewa gari hilo liliendeshwa kwa kasi gani! Mpaka wanafika Dumila na kukata kona kuelekea Kilosa bado gari lilikuwa halijaonekana.

“Mh!”mmoja wa maaskari aliguna

“Vipi mbona umeguna?”

“Isijekuwa hawa watu wamenyoosha kuingia Morogoro mjini!”

“Haiwezekani! Nyie twendeni hukohuko Tindiga, kama watakuwa hawajafika tutawasubiri!”

Walikubaliana na kuendelea na safari yao, saa moja na nusu baadaye waliingia Kilosa ikiwa ni katikati ya usiku na kuendelea na safari yao hadi Tindiga shambani kwa mzee Katapila ambako waliegesha gari lao mbele ya lango la kuingilia, walinzi wawili walikuwepo na silaha zao mikononi.

“Habari zenu?”

“Nzuri tu habari yako bwana?” Maaskari walijibu.

“Safi tu! Niwasaidie nini?”

“Sisi ni maofisa wa Polisi!”

“Ndio!”

“Kuna majambazi wamemvamia mzee Katapila huko mjini na kuua vijana wake wanne na wakakimbilia huku, hebu tueleze kuna hali gani hapa? Au umeona jambo lolote lisililo la kawaida?”

“Hapana ila..!”CHANZO:  https://deusdeditmahunda.blogspot.com/

“Ila nini?”

“Kuna kipindi niliona taa za gari zikija lakini gari hilo halikufika hapa, likageuzia pale chini! Nilishindwa kuelewa ni kwanini nikahisi labda kuna watu wamesahau kitu chao mjini Kilosa!”Alieleza kwa kirefu mmoja wa walinzi hao, ni kweli aliliona gari lililowaleta Nancy na Danny lakini hakuwa na habari kama walipita kwenye nyasi na kuzunguka upande wa pili ambako walipanda ukuta na kuingia ndani kuendeleza mauaji.

“Tunaomba tuingie ndani kukagua!”

“Leteni kwanza vitambulisho vyenu, tutaaminije kuwa nyie ni maaskari!”

Maaskari pamoja na walinzi wa Omega Security Guards waliingiza mikono yao mfukoni, kutoa na kisha kuonyesha vitambulisho vyao, walinzi wote wakaamini lakini wakati bado hawajawaruhusu kuingia mlio wa bunduki aina ya SMG ulisikika ndani ya ngome, wote wakashtuka na kwa pamoja wakaanza kukimbia kuingia ndani silaha zao zikiwa tayari, walinzi wa ngome walishindwa kuelewa ni saa ngapi majambazi yaliingia ndani na kwa kupitia mlango gani.

Mlangoni mwa jengo pekee lililokuwemo ndani ya ngome walikuta maiti mbili, hawakutaka kuchelewa mara moja walisukuma mlango na kuingia ndani, mwanaume mmoja alikuwa amesimama wima akiwa na bastola mkononi iliyomlenga mwanamke aliyechuchuma! Bila kujiuliza mara mbili walielewa huyo alikuwa mmoja wa majambazi na askari mmoja aliachia risasi zilizompata mwanaume huyo moja kwa moja begani akadondosha bastola yake.

*****

Alisikia mlio wa risasi, badala ya kuwa imempenya yeye hakuamini kuona Tonny anaanguka chini! Alishindwa kuelewa ni nani aliyefanya kitendo hicho, fikra zake zilimpeleka kwa Danny lakini alilifuta wazo hilo mara moja alipoifikiria hali aliyomwacha nayo wakati anaondoka, hakuwa mtu wa kunyanyuka na kukamata bunduki.

Mara ghafla aliwaona wanaume wengi wakifika eneo hilo na bunduki zao mkononi, wakikimbia huku na kule kuangalia kama kulikuwa na mtu mwingine! Mmoja wao alimfuata akajitambulisha na kuanza kumhoji juu ya kilichotokea, Nancy alilia machozi ya furaha alipogundua walikuwa ni maaskari.

“Wazazi wangu pamoja na mchumba wangu, walitekwa na mzee Katapila akishirikiana na huyu mliyempiga risasi, anaitwa Tonny! Nilitoa taarifa polisi Bagamoyo lakini sikusaidiwa ndipo nikaamua mimi mwenyewe na mchumba wangu ambaye nilimwokoa huko Dar es Salaam kwenye ghala la mzee Katapi...! Lakini jamani kwanini tuzidishe maongezi, mimi naomba tuwachukue kwanza hawa wazee wangu tuwapeleke hospitali, mambo mengine tutaongea baadaye ni vyema tukaokoa maisha kwanza!” Alisema Nancy baada ya kusita.

Maaskari hawakuwa na ubishi, wote walisaidiana kubeba na kupakia maiti zote zilizokuwemo ndani ya jengo hilo na hata zilizokuwa mlangoni kisha kuwabeba wazazi wa Nancy waliokuwa hoi bin taaban kwenda kwenye gari na mara moja kuondoka kuelekea hospitali ya wilaya ya Kilosa iliyokuwa kama kilometa hamsini kutoka eneo hilo, lilikuwa tukio la kusikitisha lililowakosesha raha hata maaskari, walitaka sana kumhoji Nancy maswali juu ya kilichotokea lakini hakuwa tayari kuongea akidai angeeleza kila kitu baada ya kufika hospitali na wazazi wake kutibiwa. Muda wote alikuwa akilia.

******

Danny alizinduka ghafla baada ya fahamu zake kumrejea, alijaribu kusimama wima akashindwa, mwili wake haukuwa na nguvu kabisa! Alikuwa kama mtu aliyefumbua macho kutoka usingizini, kumbukumbu zake hazikuwa sawa! Alijaribu kuzivuta na kuzisogeza karibu ili alewe mahali alipokuwa ni wapi na alikuwa akifanya nini lakini hakufanikiwa kutuliza ubongo wake, mpaka dakika mbili baadaye alipomfikiria Nancy! Kila kitu kilirejea kichwani mwake.

Alikumbuka alivyopigwa mshale na kuanguka chini na mara ya mwisho alipoongea na Nancy, kwa mbali maneno ya kuagwa yaliyosemwa na mpenzi wake wakati akiwa katika upotevu wa fahamu yalimwijia akaelewa Nancy alikuwa ameondoka na kumwacha eneo lile akifikiri alikuwa amekufa baada ya kuchomwa mshale, hakutaka kukubaliana na fikra hizo na kuanza kuliita jina la Nancy.

“Nancy! Nancy!Nancy!” Aliita mara kadhaa bila kuitikiwa, hapakuwa na mtu kabisa ndani ya ngome hiyo hata walinzi waliondoka na magari ya polisi na Omega security Guard kuelekea hospitali ya Kilosa.

Pamoja na maumivu makali aliyokuwa nayo, Danny hakutaka kukata tamaa akazikusanya nguvu zake zote zilizobaki mwilini na kusimama wima akiyumbayumba na baadaye kuanguka chini, alihisi mshale aliochomwa ulikuwa na sumu sababu ya kizunguzungu alichokuwa nacho.

“Kusimama siwezi acha nitambae kuelekea mbele!” Alijisemea moyoni mwake na kunyanyuka tena, safari hii kama alivyowaza hakutaka kusimama alianza kutambaa kuelekea kweney jengo lililokuwa mbele yake! Moyoni mwake alijawa huzuni akiamini kwa vyovyote hata Nancy alishauawa mawazo hayo ndiyo yalimtia ujasiri zaidi, hakuogopa kulisogelea jengo hilo ili kama ni kuuawa basi wammalizie kabisa kuliko kuendelea na mateso aliyokuwa nayo.

Mbele ya jengo hapakuwa na mtu zaidi ya damu zilizotapakaa kila mahali na Danny hakutaka kuingia ndani, alichofanya ni kunyoosha moja kwa moja kuelekea langoni ambako pia hapakuwa na mtu akatoka hadi nje ya ngome na kwenda kulala katikati ya barabara akitarajia gari lolote ambalo lingepita maeneo hayo lazima lingesimama na kumchukua kumpeleka hospitali. Tayari mwanga wa alfajiri ulishaanza kuonekana.

Ghafla giza nene liliyatanda macho pake, moyo wake ukaanza kunywea taratibu, mapafu yakabana pumzi ikawa haiingii kifuani kama ilivyo kawaida huku mwili wake ukilegea, hakuelewa kitu chochote kilichoendelea baada ya hapo.

*********

Safari kuelekea Kilosa ilikuwa bado ikiendelea, Nancy naye alikuwa bado akibubujikwa na machozi akiwa katikati ya wazazi wake pamoja na mzee Mwinyimkuu waliokuwa hoi bin taaban! Hakuwa na uhakika kama baba yake alikuwa hai, muda wote alimwomba Mungu afanye muujiza.

“Ulisema kwamba ulikuja huku na mchumba wako?” Lilikuwa ni swali kutoka kwa mmoja wa maaskari lililorejesha kumbukumbu sawasawa katika kichwa cha Nancy, akanyanyuka na kusimama wima mikono yake yote miwili ikiwa kichwani kwake.

“Vipi?” Mmoja wa maaskari aliuliza baada ya kuugundua mshtuko aliouonyesha.

“Simamisha gari!” Aliamuru.

“Kwanini?”

“Tumemsahau!”CHANZO:  https://deusdeditmahunda.blogspot.com/

“Nani?”

“Mchumba wangu!”

“Alikuwa sehemu gani?”

“Nyuma ya jengo akiwa amechomwa mshale!”

“Mama yanguuu! Sasa kwanini hukusema?”

“Nilichanganyikiwa nikasahau! Tafadhali dereva simamisha gari!”

Dereva akakanyaga breki na baadaye kusimama, baadhi ya maaskari walihisi anawachanganya akili zao na kuwapa usumbufu, minongíono ya chinichini ilisikika wakati gari linasimama.

“Sasa tufanye kipi? Tuwapeleke wazazi wako hospitali au turudi kwa mchumba wako? Mbona unataka kutuchanganya? Kwanza mambo yenyewe hayajaeleweka, hebu chagua kitu kimoja tafadhali! Baba na mama au mchumba wako?”Meja Alphonce aliuliza na Nancy kukaa kimya, wote walikuwa na umuhimu mkubwa maishani mwake.



Nancy amefanikiwa kuwaokoa wazazi wake pamoja na mzee Mwinyimkuu, waliotekwa na kufichwa shambani kwa mzee Katapila huko Tindiga Kilosa, yote haya yalifanywa na Tonny kama kisasi baada ya kumkataa, kwa juhudi zake Nancy amefanikiwa kuingia ndani ya ngome ya shamba hilo akiwa na Danny, mwanaume ampendaye ambaye kwa bahati mbaya amechomwa mshale na kuanguka chini, kupoteza fahamu jambo lililomfanya Nancy akate tamaa kwamba asingepona!Akiwa ndani ya jengo Nancy anawekwa chini ya ulinzi na Tonny aliyemlenga na bastola yake kwa lengo la kumuua lakini kabla hajafyatua risasi, Tonny anaanguka chini! Amepigwa risasi na maaskari waliokuwa wakiwafutilia Danny na Nancy kutokea Dar Es Salaam!

Nancy anakataa mahojiano yoyote na polisi kwanza anataka wazazi wake pamoja na mzee Mwinyimkuu ambao hali zao ni mbaya kutokana na mateso waliyoyapata wapelekwe hospitali, amesahau kabisa kuwa Danny yupo nyuma tu ya jengo hilo! Maiti ikiwemo ya Tonny zinabebwa na kupakiwa ndani ya gari na wazazi wa Nancy pamoja na mzee Mwinyimkuu wanapakiwa ndani ya gari jingine na safari ya kuelekea Kilosa hospitali inaanza.

Ghafla wakiwa njiani Nancy anajiwa na kumbukumbu za Danny, anagundua amemsahau mpenzi wake! Hapohapo anamwamuru dereva asimame na anafanya hivyo, Nancy anawasimulia kilichotokea baadhi ya maaskari wanaona anachowaeleza ni usumbufu na wanamwambia achague kimoja wazazi au mpenzi wake? Anachanganyikiwa na anashindwa achague lipi kwani wote ni wa muhimu kwake.

Je, nini kinaendelea? Fuatilia.......



“Chagua!” Askari alisema.

“Siwezi kuchagua!”

“Kwanini?”

“Wote ni wa muhimu kwangu!”

“Mshika mbili?”

“Moja humponyoka!” Badala ya Nancy kujibu askari mwingine alidakia.

Nancy alijitahidi kuwabembeleza kwa uwezo wake wote ili wakubali yeye ashuke kwenye gari lililowabeba wazazi wake, apande gari lililobeba maiti ambazo hazikuwa na sababu yoyote ya kuwahishwa hospitali kwa wakati huo ili wazazi wake wapelekwe hospitali haraka na warudi hadi shambani kwa mzee Katapila kumtafuta Danny! Aliwahikikishia kuwa mtu huyo alikuwa wa muhimu kiasi gani kwake, kiasi kwamba asingeweza kumwacha afie porini, wakati msaada ulishapatikana.

“Una uhakika atakuwa hai?”

“Sina uhakika lakini anaweza kuwa hajafa ingawa hali yake ilikuwa mbaya sana!”

“Kwa hiyo turudi?”

“Nitafurahi sana mkichukua uamuzi huo!”

“Ok! Basi nyinyi tangulieni, sisi tutarudi na huyu binti hadi shambani!” Kamanda Yesaya wa kampuni ya Omega alisema na wakakubaliana, gari likageuzwa na kuanza tena kurudi shambani kwa mzee Katapila, Tindiga. nusu saa baadaye walishafika na kuegesha gari, kabla ya kufika langoni walipishana na simba wawili! Mmoja jike na mwingine dume, walitishika kwani hawakutegemea kama wanyama kutoka Mikumi waliweza kufika maeneo hayo! Nancy akawa wa kwanza kurudi akifuatiwa na walinzi wengine wa Omega na kuanza kukimbia kwenda ndani hadi nyuma ya jengo, Nancy aliangua kilio alipokuta mwili wa Danny haupo mahali alipouacha! Alishindwa kuelewa alikuwa amekwenda wapi, alipita huku na kule kuzunguka maeneo hayo bila mafanikio ya kumwona.

“Una uhakika alikuwa hapa?”

“Kweli kabisa!”CHANZO:  https://deusdeditmahunda.blogspot.com/

“Nilimwacha hapahapa akiwa na mshale mgongoni!”

“Sasa atakuwa amekwenda wapi?”

“Kwa kweli hata mimi sifahamu!” Alijibu Nancy akilia, baada ya hapo wote walianza kuzunguka huku na kule shambani wakimtafuta bila mafanikio mwisho wakakata tamaa kabisa, muda wote huo Nancy alikuwa akilia mfululizo! Pamoja na kazi yote kubwa aliyoifanya kumwokoa Danny na baadaye wazazi wake alikuwa amempoteza mchumba wake! Walinzi wa Omega walimfariji kadri walivyoweza lakini hawakuweza kumzuia asiendelee kulia, saa nzima baadaye waliondoka shambani na kusafiri kwa kasi hadi hospitali ya wilaya ya Kilosa ambako waliwakuta wazazi wa Nancy pamoja na mzee Mwinyimkuu wakiwa wamelazwa chumba cha wagonjwa mahututi, Nancy aliomba kumwona daktari ili ajue nini kilichoendelea.

“Hali zao ni mbaya lakini watapona!”

“Kweli daktari?”

“Kabisa, matumaini yapo, tatizo lao kubwa lilikuwa ni njaa! Kwa muda mrefu sana hawakupata chakula cha kutosha, ndio maana tumewatundikia dripu za glucose ili kuongeza sukari kwenye miili yao, siku mbili kuanzia sasa watakuwa na uwezo wa kuongea vizuri!”

“Ahsante daktari! Lakini bado kuna tatizo moja linanitatiza!”

“Tatizo gani binti?” Aliuliza Dk. Muhombolage, aliyekuwa akiwashughulikia wazazi wa Nancy.

“Mchumba wangu!”

“Amekuwaje?”

“Tulikuwa naye pamoja wakati tunawafuatilia wazazi wangu, akachomwa mshale na kuanguka, nikamwacha sehemu aliyokuwa ameangukia na kuingia ndani ya jengo ambako niliwaokoa wazazi wangu, bahati mbaya sana nikamsahau wakati wa kuondoka kuja hapa hospitali! Nikarudia njiani kumfuata lakini sikumkuta, sasa sielewi ni wapi alipokwenda! Lazima kutakuwa na mtu amemchukua au kaliwa na Simba tuliokutana nao njiani! Maana kama angekufa tungeikuta maiti yake eneo lilelile!” Alieleza Nancy kwa kirefu daktari akimsikiliza, hakuwa na jambo la kumshauri zaidi ya kuulizia hospitali za jirani za eneo walilokuwa, alipiga simu hospitali ya Kilombero na kuulizia kama kulikuwa na mgonjwa wa aina hiyo aliyekuwa amepokelewa, jibu likawa hapana.

“Labda mtoe taarifa polisi!”

“Ninaoshughulika nao hapa ni polisi, wamekwishafanya hivyo mapema!”

“Basi atapatikana!”

“Haiwezekani daktari atakuwa amekufa!” Alijibu Nancy na kuondoka ofisini kwa daktari kurudi chumba cha wagonjwa mahututi ambako wazazi wake walilazwa, alikaa huko mpaka saa tatu na nusu ya asubuhi polisi walipokuja kutaka kuchukua maelezo yake kwa sababu taarifa walizokuwa wamezipokea kutoka mkoani Morogoro kwa Kamanda wa Polisi ni kwamba yeye Nancy pamoja na Danny ndio walikuwa majambazi waliokuwa wakisakwa baada ya kuvamia ghala la mzee Katapila lililopo Vingunguti jijini Dar Es Salaam, kuua watu, kumjeruhi mzee Katapila na kuondoka na kiasi kikubwa cha fedha!

Hivyo ndivyo mzee Katapila alivyowaeleza polisi na kwa sababu ya uwezo wake kifedha na heshima aliyokuwa nayo katika jamii kipindi hicho, aliaminika na Nancy pamoja na Danny kuonekana watu hatari, hapohapo hospitali Nancy alipigwa pingu mikononi na kubebwa mpaka kituo cha polisi cha Wilaya ya Kilosa, hakutakiwa kujibu chochote mara moja alipakiwa ndani ya gari jingine na kusafirishwa kwenda Dar Es Salaam alikotakiwa kujibu kesi ya mauaji. Alijaribu kuongea kadri alivyoweza kuonyesha hakuwa na hatia lakini hakuna mtu aliyemjali, hivyo ndivyo ilivyoeleweka, Nancy alikuwa muuaji.

Jijini alitupwa moja kwa moja mahabusu kituo kikuu cha polisi, alipotolewa baadaye ulikuwa ni wakati wa kutoa maelezo yake juu ya kilichotokea, jopo la maaskari wa ngazi za juu walikuwepo kusikiliza maelezo ya msichana huyo yakichukuliwa! Nancy huku akilia alianza kusimulia kila kitu kilichotokea maishani mwake tangu mwanzo wakiwa Bagamoyo na wazazi wake, walivyompokea Tonny nyumbani kwao, kuishi naye, kumsomesha mpaka nchini China wakitegemea angekuja kuwa mume mwema wa binti yao lakini ghafla akaja kubadilika, akawa nyoka na kumtelekeza Nancy kwa ajili ya msichana mwingine ambaye naye alikwenda kumfanyia unyama wa aina hiyohiyo ndipo akarudi nchini Tanzania na kutaka kumuoa tena Nancy ambaye kwa wakati huo tayari alikuwa na mchumba mwingine. Hakuyasahau mambo ya Bagamoyo kula yamini kwa mganga wa kienyeji ambayo baadaye ilikuja kumfanya awe mwendawazimu.

“Kuna mzee mmoja ambaye yuko Kilosa hospitali pamoja na wazazi wangu, anaitwa mzee Mwinyimkuu huyo ndiye mganga mwenyewe aliyenilisha yamini na baadaye akapatikana na kuiondoa ndio maana akili yangu ikarejea tena kawaida! Tonny akawa ameng’ang’ania kunioa lakini kwa mabaya aliyonifanyia nilikataa na kutaka kuolewa na Danny, hilo lilimkera ndio maana akamkodisha mzee Katapila ili awateke wazazi wangu! Lakini kuna kitu kingine hapohapo, Danny alipoamua kunioa mimi alimwacha msichana aitwaye Agness, huyo naye kwa hasira zake akamfuata mzee Katapila huyohuyo na kumkodi ili amteke Danny! Hilo likafanyika, akatekwa na kufichwa Vingunguti lakini mimi niliapa ni lazima nimkombe Danny, niwakomboe wazazi wangu na mzee Mwinyimkuu na baadaye wadogo zangu ambao walichukuliwa na wazee wawili waishio Kisiwani katikati ya ziwa Tanganyika!” Aliongea Nancy kwa karibu masaa mawili akisimulia kila kitu kuonyesha ni kiasi gani hakuwa na hatia na mtu mbaya alikuwa mzee Katapila.

“Kweli?”

“Sina sababu ya kudanganya! Huo ndio ukweli ila kama mtaamua kunigandamiza mimi sababu ya umasikini wangu, sawa! Sitakuwa na la kufanya ila niliyoyasema ndio ukweli!”

“Hivi sasa mzee Katapila yuko wapi?” Kamanda wa polisi wa mkoa alimuuliza Mkuu wa Upelelezi.

“Bado yuko Muhimbili!”

“Afungwe pingu hapohapo kitandani!”

“Sawa Afande!”

“Huyu msichana hana hatia! Tena ni miongoni mwa wasichana shujaa kuliko ambao nimewahi kukutana nao, amefanya kazi ya kipolisi wakati sisi tuko hapahapa!” Kamanda alifoka.

“Mheshimiwa Kamanda naomba nikueleze ukweli juu ya jambo hili, siku nyingi niliwahi kutoa taarifa kituo cha polisi Bagamoyo lakini hakuna aliyejali, nilionekana muongo! Maaskari wengi wanamuogopa sana mzee Katapila, hilo ndilo linamfanya awe mtu mbaya anayeonea watu kila siku na hachukuliwi hatua yoyote!”

“Suala hili nitaliingilia mwenyewe binti mpaka haki itendeke! Kwa hivi sasa tunakuacha huru, ukimaliza kutoa maelezo yako unaweza kuondoka lakini uripoti hapa siku ya Jumatatu, au mnaonaje?”

“Sawa Mkuu!” Wengi wote waliitikia.

Baada ya maelezo Nancy hakuwa na jambo jingine la kufanya kituoni, alimshukuru Mungu na kutoka nje ambako alikutana na waandishi wa habari wengi wakimsubiri na kuanza kumpiga picha huku wakimuuliza maswali mengi juu ya kilichotokea, aliwasimulia ingawa kwa kifupi na baadaye kuondoka mbio hadi stendi ya daladala ambako alipanda basi lililompeleka hadi kituo cha Mabasi cha Ubungo ambako alipanda basi la Shabiby lililomsafirisha hadi Morogoro ambako alipanda basi jingine lililomfikisha Kilosa, hiyo ikiwa ni siku ya Jumamosi saa kumi na mbili jioni.CHANZO:  https://deusdeditmahunda.blogspot.com/

Hali ya wazazi wake wodini ilikuwa nzuri, aliweza hata kuongea nao! Wote walimshukuru kwa ujasiri aliouonyesha hata mzee Mwinyimkuu lakini hawakuacha kuuliza wapi alikokuwa Danny, Nancy alilia wakati akiwaeleza alivyochomwa mshale maiti yake kupotea! Mpaka wakati huo aliamini Danny alikuwa marehemu, wazazi wake wote wakiwa kitandani walimwaga machozi hata mzee Mwinyimkuu hakuweza kujizuia, baadaye walikubaliana na ukweli huo na kuyaacha yote mikononi mwa Mungu.

“Yaani kweli Danny amefariki pamoja na wema wote aliokuwa nao? Haiwezekani!” Mama yake Nancy aliongea akiwa kitandani.

“Nina wasiwasi alilia na Simba!” Alisema Nancy.

“Kwanini unawaza hivyo?”

“Tulikutana na Simba wawili kabla hatujafika shambani!”



Wazazi wa Nancy pamoja na mzee Mwinyimkuu wamepelekwa hospitali ya wilaya ya Kilosa kwa matibabu baada ya kuokolewa kutoka mikononi mwa wauaji! Hizi ni juhudi za mtoto wao Nancy aliyeapa kupoteza maishani ili kuwaokoa wazazi wake.

Lakini anafanya kosa moja kubwa la kumsahau shambani kwa mzee Katapila mchumba wake Danny aliyechomwa mshale mbavuni, analikumbuka kosa hili wakiwa njiani na kuwataarifu polisi, anawaomba wamrudie na wanakubali lakini walipofika mahali alipomwacha walikuta mwili wa Danny haupo, hisia zao zinawafanya waamini kijana huyo ameliwa na Simba kwa sababu walikutana na Simba wawili njiani.

Ni jambo hili ndilo Nancy anawasimulia wazazi wake baada ya kurudi hospitali kutoka shambani akiwa na uhakika Danny hakuwa hai! Je aliliwa na Simba kweli?



Sasa endelea......



“Kwa hiyo inawezeka aliliwa na Simba?” Mama yake Nancy aliuliza.

“Huo ndio wasiwasi wangu kwa sababu hatujamkuta mahali nilipomwacha akiwa amechomwa mshale!”

Kila mtu alisikitika, wazazi wa Nancy walilia machozi kila walipokifikiria kifo cha Danny, hakuna aliyekuwa tayari kuamini kwamba Danny alikuwa marehemu pamoja na wema wote alioufanya! Lawama zote walimtupia mzee Katapila baada ya Nancy kuwasimulia namna mzee huyo alivyoshiriki katika mikakati ya utekaji!

Hakuna alichostahili mzee huyo zaidi ya kifungo cha maisha gerezani au kunyongwa kabisa kwani alisababisha vifo vya watu wengi. Agness na Tonny walikuwa marehemu, mtu pekee aliyekuwa amebaki hai alikuwa mzee Katapila aliyekuwa hospitali akiendelea kutibiwa jeraha la risasi alilokuwa nalo lakini akiwa amefungwa pingu kitandani kwake..

Kitu kingine kilichowasikitisha zaidi wazazi wa Nancy ni watoto Catherine na David, kitendo cha kuambiwa walitekwa na mzee Kiwembe pamo ja na babu Ayoub na kurudishwa kisiwani kiliwachanganya na walishindwa kuelewa nini kingefanyika kuwakomboa watoto hao, Nancy aliwaondoa wasiwasi na kuwaeleza kazi hiyo ingekuwa yake mpaka kuhakikisha watoto wote wanarudi katika himaya ya wazazi wake.

“Utaweza?”

“Nitaweza baba!”

“Angekuwepo Danny mngeweza kusaidiana!”

“Msiwe na shaka na ninafikiri nitapata msaada wa polisi kwa sababu wamekwishaelewa tatizo liko wapi!”

“Itakuwa ni vyema kama nao watakombolewa!”

Mzee Mwinyimkuu alikuwa mtu kwanza kuruhusiwa kutoka hospitali, hakutaka hata kuishi siku mbili mjini Kilosa, alichofanya ni kuaga na kuondoka hadi Morogoro ambako alipanda mabasi yaliyomrejesha hadi Dar Es Salaam, kwa pesa kidogo alizopewa na Nancy aliweza kusafiri hadi Kigoma ambako aliendelea na safari yake kupitia ziwa Tanganyika hadi Kongo. Aliapa kutoyasahau yaliyompata Tanzania, wiki moja baadaye baba na mama yake Nancy walikuwa na hali nzuri pia wakaruhusiwa na kurejea Dar Es Salaam na baadaye Bagamoyo, wakawa wamerejea katika maisha yao ya kawaida.

Watu waliowafahamu, majirani na marafiki wilayani Bagamoyo walipopata habari ya kurudi kwao walifurahi kupita kiasi, ilikuwa ni sherehe kubwa lakini walisikitika walipoambiwa Danny alifariki dunia! Taarifa hizo baadaye mzee Katobe alipopata nafuu alirejea tena Dar Es Salaam wizara ya Mambo ya nchi za nje na kutoa taarifa ili wazazi wa Danny waliokuwa nje ya nchi kwenye ubalozi wajulishwe juu ya kifo cha mtoto wao, hata wafanyakazi wa wizara hiyo waliomfahamu Danny walilia machozi ya uchungu, si hao tu bali pia wanafunzi wa chuo kikuu cha Dar Es Salaam waliosoma naye darasa moja kabla hajakatisha masomo kwa ajili ya Nancy walisikitika na kuiomba serikali imchukulie mzee Katapila hatua kali kwa kitendo cha unyama alichokifanya.

Siku tatu baada ya mzee Katobe kutoa taarifa wizara ya Mambo ya nchi za nje, baba na mama yake Danny waliwasili nchini wakiwa na huzuni kubwa, Danny alikuwa mtoto wao wa pekee! Hivyo kifo chake kilimaanisha wasingekuwa na mtoto mwingine tena, ulikuwa msiba mkubwa sana kwao! Cha kushangaza hawakua na hamaki yoyote kwa mzee Katobe na familia yake, walichofanya wao ni kurudi tena shambani kwa mzee Katapila na kuendelea kuitafuta maiti ya mtoto wao, kwa wiki mbili walifanya kazi hiyo bila mafanikio hatimaye wakakata tamaa kabisa! Hapakuwa na mazishi ya Danny, lakini kila mtu aliamini mtoto huyo hakuwa hai.

“Kwa kweli tumeumia lakini hatuna la kufanya, ulikuwa mpango wa Mungu!”

“Poleni sana hata sisi pia tuna masikitiko makubwa sana! Matatizo yote yaliyotupata sisi tunayaona ni madogo sana kuliko kumpoteza Danny!”

“Hakuna shida! Lililopangwa na Mungu mwanadamu hawezi kulikwepa!” Mama yake Danny alisema.

Wote waliamini walikuwa wameumia lakini kama maumivu yao yangepimwa kwenye mzani, kuna mtu mmoja angewazidi wote! Kifo cha Danny kilikuwa pigo kubwa maishani mwake, hakika asingeweza kukutana na mtu mwingine kama yeye mpaka kaburini kwake! Huyo hakuwa mwingine bali Nancy, kwake kila siku kilikuwa ni kilio na majonzi pamoja na kufanikiwa kuwaokoa wazazi wake, haikutosha! Kutokuwepo kwa Danny maishani mwake lilikuwa pengo lisilozibika.

Hakula chakula kwa karibu wiki nzima, alikonda na kunyongíonyea mpaka ikafikia wakati wazazi wake wakaanza kuwa na wasiwasi angekufa kwa njaa na kulazimika kumpeleka hospitali ambako alitundikiwa dripu ya sukari zilizomtia nguvu mwilini mwake, kilichofuata baada ya hapo ni ushauri Nasaha uliomwimarisha na kumfanya aukubali ukweli wa yote yaliyotokea! Nancy akasimama imara tena na mipango ya kwenda kisiwani Galu kuwaokoa wadogo zake ikaanza kuzunguka ubongoni mwake na alitaka kuondoka wakati wowote lakini polisi walimzuia mpaka atoe ushahidi mahakamani.

“Kwani kesi hiyo haiwezi kuendelea bila mimi kuwepo?” Alimuuliza Mkuu wa kituo cha polisi Bagamoyo wakati akijiandaa na safari yake kwenda Kigoma.

“Haiwezekani! Ushahidi wako ni wa muhimu sana!”CHANZO:  https://deusdeditmahunda.blogspot.com/

“Nina kazi nyingine ya kufanya!”

“Kazi gani?”

“Nahitaji kuwafuatilia wadogo zangu!”

“Wadogo zako wapi?”

“Kwenye maelezo yangu nilishasema kuwa wadogo zangu nao walitekwa!”

“Na mzee Katapila?”Mkuu wa Kituo aliuliza.

“Hapana!”

“Na nani tena?”

“Wako wazee wawili waliowahi kuniteka mimi na mama yangu!”

“Lini tena? Mbona maisha yenu yamejaa historia za kutekwa?”

Ilibidi Nancy asimulie tena kilichotokea mpaka yeye na mama yake wakajikuta wapo katika kisiwa cha Galu ambako walipata mateso yaliyomfanya alie machozi wakati akisimulia, mkuu wa kituo alibaki mdomo wazi! Hakuwa tayari kuamini kama mambo yote hayo yalimpata msichana aliyekuwa mbele ya meza yake, ilionyesha kama Tanzania haikuwa na Serikali, isingewezekana mtu afanye ukatili wa aina hiyo na asichukuliewe hatua.

“Kwa hiyo huko Kisiwani ndio unakotaka kwenda?”

“Ndiyo!”

“Huhitaji kwenda! Jeshi la polisi litaifanya kazi hiyo!”

“:Siwaamini polisi! Si unakumbuka niliwahi kuwataarifu juu ya kutekwa kwa Danny pamoja na wazazi wangu lakini hamkutilia maanani!”

“Tuyasahau ya zamani, nitawasiliana na Kigoma na jeshi la polisi ndilo litakayokwenda hadi Kisiwani na kufanya ukombozi, hao wazee ni lazima wafikishwe mbele ya sheria, nakushauri utulie Nancy ili uwepo wakati kesi ikiendelea!”

“Kwa hiyo unanieleza kwamba niwaamini polisi?”

“Wala usiwe na shaka, utawala uliopo hapa Bagamoyo kwa sasa ni tofauti na zamani, mkuu wa kituo aliyekuwepo alihamishwa kwenda Makao makuu baada ya kufanya makosa fulani, likiwemo hilo la kutofuatilia mambo!”

“Ina maana wewe nikuamini?”

“Asilimia mia moja nitalifanyia suala lako kazi hadi wadogo zako wapatikane!”

“Acha nione!”

Akiwa bado yupo ofisini, mkuu wa kituo alinyanyua simu na kumpigia Kamanda wa Polisi mkoa wa Pwani na akimtaarifu juu ya tukio alilolisikia toka kwa Nancy, kwa kumwangalia machoni wakati akiongea, Nancy alielewa ni kiasi gani hata Kamanda wa Polisi wa Mkoa alikuwa ameshtuka, kwa maneno aliyoyasikia kutoka mdomoni kwa mkuu wa kituo, aliamini hatua za haraka zingechukuliwa! Mpaka anaondoka hicho ndicho kitu kikubwa alichokiamini, alipofika nyumbani aliwasimulia wazazi wake mambo yote yaliyojitokeza polisi nao wakamshauri jambo hilo hilo.

“David na Catherine ni watoto wetu lakini nina uhakika huko waliko, maisha yao hayako hatarini sana!Bado polisi wanaweza kuifanya kazi uliyotaka kuifanya wewe na kuikamilisha, waache waendelee! Wape mwezi mmoja kabla hujafikiria jambo jingine!” Mama yake Nancy aliongea.

Taarifa juu ya kuwepo kwa watoto waliotekwa na kufichwa katika kisiwa cha Galu kilichopo katikati ya Ziwa Tanganyika zilifika hadi makao makuu ya jeshi la polisi ambako amri ilitolewa kwa kamanda wa polisi wa mkoa wa Kigoma kuwa, kiundwe kikosi maalum kwa ajili ya ukombozi wa watoto hao! Jumla ya askari ishirini walikusanywa, wakakabidhiwa silaha na kuondoka ndani ya boti mbili ziendazo kwa kasi kuelekea kisiwani Galu, hakikuwa kisiwa kigeni kwao kwani mara kwa mara walikiona wakiwa katika doria za kusaka magendo na wavuvi haramu, lakini hata siku moja hawakuwahi kufikiri kuwa binadamu waliishi ndani ya kisiwa hicho.

Walikuwa na matumaini makubwa ya kurudi na ushindi, wakiwa na watoto pamoja na watekaji ambao wangefikishwa mbele ya sheria mara moja! Hiyo ndiyo kazi waliyokuwa wamepewa na Kamanda wa polisi wa mkoa wa Kigoma. Isingewezekana watu wawili washindane na askari ishirini wenye silaha waliokuwa tayari kuua ili mradi watoto David na Catherine wakombolewe.

“Jamani sikilizeni!” Mmoja wa maaskari alisema

“Vipi?”

“Tunakwenda kupambana na watu tusiowafahamu!”

“Kwa hiyo?”

“Mimi hawa wazee wa Kiha huwa siwaamini, wanaweza kuwa na ndumba halafu tusifanikiwe kufanya lolote!”

“Wewe acha bwana, umeshaanza imani za kishirikina, wewe twende kazini, acha kutuvunja moyo!”

Yalikuwa maongezi ndani ya boti moja ya polisi wakizidi kusonga mbele, kisiwa cha Galu kilishaanza kuonekana mbele yao! Walikuwa na uhakika katika muda wa dakika thelathini wangekuwa wanagoa kwenye ufukwe wa kisiwa hicho, kila mmoja wao aliweka bunduki yake tayari kwa kazi iliyokuwa mbele. ilikuwa ni lazima warejee na watoto hata kama watekaji wangeuawa, hilo ndilo lilikuwa lengo lao na walijua ingekuwa ni kazi ndogo sana kwao.

Ghafla wakiwa wamebakiza kama mita mia mbili hivi ili wagoe kisiwani, kitu kama kimbunga cha ajabu kiliibuka kutokea nyuma yao kikiyazungusha maji kwa nguvu isiyo ya kawaida! Pamoja na kusafiri siku zote katika ziwa Tanganyika, kila mmoja wao alikiri kimbunga hicho hakikuwa cha kawaida, bila kutegemea hofu ya kifo ilitanda! Hakikuwazungusha watu waliokuwa kwenye boti moja tu, bali ilikuwa hekaheka hata kwa boti ya pili! Walipiga kelele wakiitana na kuombana msaada lakini hapakuwa na mtu wa kumsaidia mwenzake, hali ilikuwa mbaya na muda mfupi baadaye boti zote mbili zilibinuliwa na kuwamwaga maaskari majini! Walishindiwa kuelewa ni kitu gani kilikuwa kimetokea kwani hata maji waliyodumbukia ndani yake yalikuwa na joto kali kama yaliyokuwa yakichemshwa jikoni, wote walilia kwa jinsi walivyoungua.

“Naungua!Naungua!Naungua!” Maaskari walisikika wakilia.

********

Kesi ya mzee Katapila ilivuta usikivu wa watu wengi jijini Dar Es Salaam, mahakama ilifurika kila ilipotajwa! Watu walichukizwa na kitendo alichokifanya, ingawa ujambazi ilikuwa ni sifa yake kwa muda mrefu lakini walishtuka, haikuwa rahisi mtu aliyesaidia jamii kama yeye kuwa bado aliendelea na tabia ya kikatili namna hiyo! Vyombo vya habari viliripoti maendeleo yote ya kesi, kwa sababu hiyo hapakuwa na njia yoyote ambayo mzee Katapila angeitumia kucheza na mfumo wa sheria, hakuna Hakimu aliyekuwa tayari kupokea rushwa ili kupindisha sheria kwani viongozi wote wa serikali waliifuatilia kesi hiyo kwa macho na masikio yao yote.CHANZO:  https://deusdeditmahunda.blogspot.com/

Hakuwa na namna ya kujitetea, ushahidi ulikuwa umembana kila upande! Hakuwa yeye peke yake katika keshi hiyo bali pia baba yake mdogo Agness mzee Shao, aliyekwenda kwake na kumlipa fedha ili afanye utekaji! Wote walikuwa na kesi ya kujibu na pamoja na kuwa na mawakili wazuri bado haikusaidia, walijikuta wakihukumiwa kwenda jela miaka thelathini kwa mzee Shao na Katapila alihukumiwa kifungo cha maisha! Badala ya kusikitika wakazi wa jiji la Dar Es Salaam waliruka juu na kushangilia.

Hata Nancy pamoja na wazazi wake pia walifurahi kupita kiasi lakini furaha hiyo haikutosha, kwani David na Catherine walikuwa bado hawajapatikana na taarifa zilizopatikana kutoka Kigoma ni kwamba maaskari waliotumwa walishindwa kukifikia kisiwa kwa sababu ya dhoruba kali iliyojitokeza kila walipokikaribia! Jumla ya askari sabini na sita walishapoteza maisha kiasi cha jeshi la polisi kuanza kukata tamaa hasa walipofikia roho zilizopotea wakilinganisha na walizokuwa wakijaribu kuziokoa. Maneno kuwa wazee waliokalia kisiwa hicho walikuwa wachawi yalitawala lakini jeshi la polisi halikuwa tayari kwenda kwa mganga wa Kienyeji ili lifanikiwe kufika kisiwani Galu, walidai hiyo haikuwemo katika PGO, yaani Police General Order, au maagizo ya namna polisi wanavyotakiwa kufanya kazi.

“Nafurahi mzee Katapila amehukumiwa kifungo cha maisha, lakini moyo wangu haujatulia mpaka David na Catherine wapatikane! Kama polisi wameshindwa basi nitakwenda mwenyewe!” Nancy aliwaambia wazazi wake.





Habari za kisiwa cha Galu na maajabu yaliyokuwa yakitokea, vilivuta usikivu wa kila mtu mjini Kigoma na Tanzania nzima kwa ujumla! Idadi ya polisi waliopoteza maisha ilipofikia mia moja na ishirini ilibidi jeshi la polisi nchini liamue kusitisha operesheni hiyo, baadhi walianza kutoamini kuwa kweli kulikuwa na watoto wawili katika kisiwa hicho waliotekwa! Kulikuwa na kila dalili kuwa uchawi ulitumika, miujiza iliyotokea ilimshangaza karibu kila mtu.

“Kisiwa gani hiki kisichoingilika?” Ndilo swali walilojiuliza wakuu wa Polisi, karibu wakuu wote wa jeshi la polisi walikuwa mjini Kigoma.

“Hata sisi tunashangaa, visiwa vyote katika ziwa Tanganyika vinaingilika lakini hiki kimetushinda kabisa!”

“Au mzizi?”Mkuu wa ufuatiliaji wa majanga katika jeshi la polisi, Kamshina Aziz aliuliza

“Hivyo ndivyo inavyoaminika na mimi nalazimika kukubaliana na jambo hilo kwani ukikikaribia kisiwa cha Galu hali hubadilika ghafla, mawimbi makubwa hujitokeza na hata mkifanikiwa kufika kila atakayekanyaga ardhi ya kisiwa huanza kusikia moto unamuunguza mwili mzima!”

“Jeshi la Polisi haliwezi kujiingiza katika mambo ya kishirikina, mfano kwenda kwa waganga kuagulia ili kuelewa nini cha kufanya hata hivyo lazima tutafute mbinu ya kuingia katika kisiwa hicho na kuwakomboa watoto waliotekwa!”Mkuu wa jeshi la Polisi nchini alisema.

“Lakini Kamanda, huoni kama tumepoteza idadi kubwa ya maaskari kwa sababu ya watu wawili?”

“Hatuwezi kuacha ni lazima tuendelee ila simamisheni kwanza zoezi, turudi Dar Es Salaam tukajipange upya!”

Hayo ndiyo yalikuwa maamuzi ya jeshi la polisi nchini, jitahada zote zilizokuwa zikifanyika kwa lengo la kuwakomboa watoto David na Catherine, zilisimama! Hivyo ndivyo vyombo vya habari vilivyoripoti na Nancy pamoja na wazazi wake kuzipata habari hizo, haikumwingia Nancy akilini ni hapo ndipo alipoona kulikuwa na kazi ya ziada ya kufanya, hakuwa tayari kuwapoteza wadogo zake kama alivyompoteza Danny kwa kuliwa na Simba.

“Baba!” Alimwita baba yake.

“Naam mwanangu!”

“Haiwezekani!”

“Kwanini?”

“Siwezi kupoteza watu watatu kama nimefanikiwa kuwakomboa wewe na mama, vivyo hivyo ningependa kuwakomboa Catherine na David!”

“Ni sawa lakini...”

“Lakini nini baba?”

“Kwa jinsi tunavyosikia, kisiwa cha Galu kina mambo mengi mabaya, tusingependa kukupoteza wewe pia! Tutakuwa hatuna mtoto kabisa, maisha yetu yameharibika sana tunakuhitaji sana Nancy!”Mzee Katobe alimwambia binti yake.

“Nakuelewa baba lakini hatuwezi kuwaacha David na Catherine wakae kisiwani Galu katika mateso! Mimi nawapenda na bila shaka nyinyi pia, au sio mama?”

“Ni kweli lakini inabidi tukubaliane na ukweli uliopo!” Mama yake alijibu.

Wazazi wake wote walikuwa na huzuni na walionyesha ni kiasi gani mioyo yao ilikuwa na wasiwasi, walimpenda sana Nancy na hawakutaka kumpoteza! Walijaribu kadri ya uwezo wao wote kumshawishi Nancy abadili msimamo wake lakini haikuwezekana, aliendelea kusisitiza ni lazima aende ziwa Tanganyika hadi kisiwani Galu na kuwakomboa wadogo zake, aliamini jambo hilo liliwezekana ingawa si kwa asilimia mia moja, alielewa ilikuwa ni kazi ngumu sana kwani idadi ya maaskari walipoteza maisha ilimtisha! Lakini haikumvunja moyo na kumfanya ahofie kwenda kisiwani.

Kwa wiki nzima waliongea na Nancy lakini haikuwezekana kabisa kumbadili mwisho wakamruhusu aende, mzee Katobe alikwenda benki na kuchukua sehemu ya akiba iliyokuwa imebaki na kumkabidhi Nancy milioni mbili zimsaidie katika kazi yake! Hawakutaka kumwacha aondoke hivyo hivyo ilibidi tambiko la kijadi lifanyike, mzee Katobe na mke wake walitafuta maziwa yaliyokamuliwa katika ng’ombe asubuhi, wakayaleta nyumbani na kumwosha mtoto wao kwa maji ya mtungini wakimsugua kwa mtama uliosagwa kwenye jiwe na walipomaliza walimkalisha mlangoni wakawa wanabugia maziwa mdomoni na kumpulizia mtoto wao mwili mzima huku wakiomba baraka zimwogoze na kumlinda aendako!

Kazi ilipomalizika Nancy alifungiwa ndani ya nyumba bila kuruhusiwa kutoka na jioni ya siku hiyo ilifanyika sherehe iliyohudhuriwa na watu watatu tu, Nancy, mama na baba yake! Ilikuwa ni kama pasaka, siku ya kuagana na wazazi wake! Hakuwa na uhakika wa kurudi salama katika operesheni aliyokuwa anakwenda kuitekeleza, yeye mwenyewe aliita Operesheni kata roho! Hakuogopa wala kuwa na wasiwasi moyoni mwake, hakuona sababu ya kuendelea kuishi kama maisha yake yalishaharibika na mwanaume aliyempenda alikuwa ni marehemu! Hivyo kwa Nancy kifo kilikuwa kitu sahihi kwa wakati huo, isitoshe alielewa mwisho wa maisha ya kila mwanadamu ni kifo.

“Sasa kwanini nisife wakati najaribu kuokoa maisha ya wadogo zangu? Sina sababu ya kuishi kama Danny alishafariki dunia, watu wakuwaonea huruma ni baba na mama yangu lakini sina jinsi kwa sababu pia jukumu la kuwaokoa Catherine na David ni langu!” AliwazaCHANZO:  https://deusdeditmahunda.blogspot.com/

Siku iliyofuata Nancy aliondoka Bagamoyo na kusafiri hadi Dar Es Salaam ambako alipanda treni lililomsafirisha hadi Kigoma na kufika baada ya siku tatu akiwa amechoka hoi bin taaban, ingawa Polisi walishasitisha zoezi la kuwakomboa Catherine na David bado siku iliyofuata Nancy alipoamka na kutoka katika hoteli ya Lubumbashi aliyofikia alikwenda moja kwa moja Makao makuu ya polisi ya mkoa wa Kigoma ambako aliomba kuonana na Kamanda wa Polisi wa mkoa, haikuwa kazi ngumu sana kumpata hasa alipojitambulisha kwa kutaja jina lake na uhusiano aliokuwa nao na watoto waliokuwa kisiwani! Jina lake lilishakuwa maarufu masikioni mwa polisi kutokana na kitendo cha kijasiri alichokifanya wilayani Kilosa na kuwakomboa wazazi wake.

“Unataka kumwona Kamanda?”Msichana wa mapokezi alimuuliza.

“Ndio!”

“Subiri kidogo nimuulize kama ana nafasi ya kukuona!” Alijibu msichana huyo na baadaye kupiga namba ya bosi wake, yeye pia hakuwa na kizuizi Nancy akaruhusiwa na kupandisha ngazi hadi ofisini kwa Kamanda ambako Nancy alieleza nia yake ya kujaribu kwenda Kisiwani Galu kuwakomboa ndugu zake, Kamanda wa polisi alimwangalia kwa macho ya huruma yaliyoonyesha wazi ilikuwa kazi ngumu kiasi gani kwa mtoto wa kike kama yeye kuweza kufanya kazi iliyowashinda wanaume tena askari wa Jeshi la Polisi..

“Utaweza binti?”

“Sina uhakika lakini nataka kujaribu!”

“Bahati nzuri nimepokea ujumbe wa polisi kutoka Dar Es Salaam kuwa kuna kikosi maalumu kinatumwa kwa ndege leo na kitafika hapa mchana, labda ungewasubiri askari wetu uongozane nao!”

“Nipo tayari kufanya hivyo!”

“Basi hakuna tatizo!” Kamanda alijibu na kumruhusu Nancy aondoke, kabla hajatoka alikumbuka kitu akageuka na kumwangalia Kamanda.

“Vipi?”

“Nitajuaje kama wamefika?”

“Aha! Nakushauri uje hapa saa sita mchana!”

“Ahsante!”

Habari aliyopewa na Kamanda ilimpa matumaini zaidi na kumtia nguvu zaidi ya alizokuwa nazo, alirudi hotelini ambako alijifungia chumbani kwake na kuendelea kuvuta fikra juu ya kazi iliyokuwa mbele yake, alikuwa ameamua kuwakomboa wadogo zake hata kama ingegharimu maisha yake mwenyewe, alipenda kusinzia mpaka muda aliopewa ufike lakini haikuwa hivyo, alikuwa macho mpaka saa tano na nusu alipoondoka kurejea kituoni, hali aliyoikuta kituoni mchana huo ilimshangaza! Ilikuwa tofauti na asubuhi alipofika kituoni kuonana na Kamanda, kulikuwa na idadi kuwa ya maaskari waliovaa tofauti na askari wa kawaida! Walionekana wazi ni wazamiaji wa majini, bila kuuliza alielewa ndio waliokuwa wakitegemewa kutoka Dar Es Salaam, alichofanya ni kupandisha moja kwa moja hadi ofisini kwa Kamanda wa Polisi.

“Wamekwishafika na nusu saa ijayo mtakuwa safarini kwenda Kisiwani Galu, una silaha?”

“Hapana!”

“Unategemea kupambana na nini?”

“Silaha itapatikana hukohuko!”

“Basi jiandae!” Kamanda aliongea akionyesha wasiwasi mwingi na mwisho wa maongezi yake alijaribu kumshawishi Nancy abaki Kigoma ili polisi waende peke yao na kumletea taarifa au kuja na watoto kama wangefanikiwa kuwakomboa lakini Nancy alikataa katakata na kusisitiza aruhusiwe kuambatana na Polisi.

“Lakini una uhakika watoto wako Kisiwani?”

“Asilimia mia moja kwa sababu waliowateka ninawafahamu!”

“Kivipi?”

Ilibidi Nancy amsimulie Kamanda kila kitu kilichotokea maishani mwake mpaka akajikuta yupo kisiwani Galu, ni maneno hayo ndiyo yalimfanya Kamanda aone umuhimu wa Maaskari kuongozana na Nancy kwa sababu alikielewa vizuri kisiwa hicho! Nusu saa baadaye kweli waliondoka hadi ziwani kulikokuwa na boti zilizoandaliwa tayari, wote walipanda na safari ya kwenda Galu ilianza!Maaskari wote waliokuwa ndani ya boti walivaa kizamiaji wakiwa na mitungi ya hewa ya oksijeni migongoni mwao na mpira uliofungwa moja kwa moja kwenye pua zao, Nancy pia alifungiwa mtungi mmoja mgongoni pia akavishwa boya moja kifuani kwake ili limsaidie kama ingetokea boti ikazama.

Safari yao hadi Kisiwani Galu ilitegemewa kuwa ya saa mbili na ndivyo ilivyokuwa, hali ya ziwa ilikuwa shwari lakini kisiwa kilipoanza kuonekana mbele yao kikiwa kama kilometa mbili kutoka mahali walipokuwa mambo yalianza kubadilika, hali ya hewa ikaanza kuchafuka! Uliiubuka upepo mkali kama kimbunga uliyoyazungusha maji na hata boti zao, maaskari walianza kuingiwa na hofu wakijua mambo waliyoyasikia ndiyo yalikuwa yanatokea lakini walijipa moyo kwa sababu wote walivaa vifaa maalum vya kuzamia. Hali ilizidi kuwa mbaya kadri dakika zilivyosonga, kilometa mbili zilikuwa mbele yao zilionekana kama kilometa mia moja, hawakuweza kusonga mbele hata hatua kumi! Boti zao zikabinuka na kuwamwaga majini.

Kelele zilizikika kila mahali, boya alilovaa Nancy lilimsaidia akajikuta akielea majini, lakini kitu kimoja kilimshangaza alikiona kiumbe kisicho cha kawaida kikiogelea katikati yake na maaskari wengine, kilikuwa ni kama binadamu lakini si binadamu wa kawaida! Kilimwogopesha, kila kilipowafikia maaskari kiliwavua mtungi wa hewa na kuwaacha wakitapatapa majini! Wote walifanyiwa hivyo na kilipomfuata Nancy alipoteza fahamu hamu hapo kwa sababu ya woga na kuzinduka akiwa ufukweni katika kisiwa cha Galu saa tano baadaye, alipofungua macho yake alimkuta mzee mmoja amekaa pembeni mwake! Haikumchukua hata sekunde mbili kumtambua, alikuwa Babu Ayoub!

“Umejileta! Nilikumisi sana!” Aliongea mzee huyo akitabasamu.

Mwili wa Nancy ulitetemeka, hakuamini kama alikuwa ameingia mikononi mwa mzee huyo aliyemtesa kwa kipindi kirefu kisiwani, machozi yalimtoka hakuwa na uhakika wa kurudi alikotoka tena! Maaskari wote aliokuwa nao katika safari ya kwenda kisiwani walikuwa wamekufa maji baada ya mitungi yao ya hewa kung’olewa, muda mfupi baadaye akilia mzee Kiwembe aliwasili akiwa na Catherine pamoja na David! Afya zao zilikuwa mbaya na za kusikitisha.

“Karibu kisiwani Nancy, hakuna mtu atakayefanikiwa kuja kukutoa hapa tena!Tumejizatiti vya kutosha!” Aliongea mzee Kiwembe akitabasamu.CHANZO:  https://deusdeditmahunda.blogspot.com/

Ingawa alikuwa akilia Nancy alishindwa kuvumilia, akanyanyuka mahali alipokuwa amekaa na kwenda kuwakumbatia wadogo zake! Alikuwa katika himaya nyingine alikotegemea mateso makali na pengine maisha yake yote yaliyobaki kuishia katika kisiwa hicho! Hakuwa na uwezo wa kupambana na nguvu za uchawi walizokuwa nazo wazee hao wawili.

*******



ITAENDELEA