KIFO CHA MTU ASIYE NA HATIA - 2

 

Simulizi : Kifo Cha Mtu Asiye Na Hatia

Sehemu Ya Pili (2)





“Ahsante wifi, ahsante kwa kuja tafadhali utukumbuke!”

“Sawa wifi! Muangalieni sana mama sababu hali yake si nzuri!”

            *****************

Belinda alichukuliwa kwa nguvu na kupakiwa ndani ya gari lililompeleka hadi Tabora ambako alisafirishwa kwa ndege ya kukodi hadi Dar es Salaam, alipokelewa na kupelekwa moja kwa moja   kituo cha polisi ambako aliwekwa rumande na kukaa kwa  siku tatu, alipotolewa aliendelea na adhabu nyingine kali  nyumbani kwao.

Pamoja na adhabu hizo bado Belinda hakuwa tayari kueleza ukweli juu ya mahali alikokuwa, aliendelea kudanganya kuwa alikwenda kwao na rafiki yake msichana waliyesoma naye darasa moja!

“Bila kuaga?”

“Nisamehe baba!”

 Na kweli Belinda alisamehewa  na kuendelea na maisha kama kawaida nyumbani kwao lakini mawazo yake yote yalikuwa kwa Prosper aliyekuwa bado yupo gerezani, alimlilia na alishindwa kula kwa sababu yake! Alitamani kuwa na Prosper tena na hakujua kama katika maisha yake angeweza kumpenda mwanaume mwingine kama alivyompenda Prosper.

Belinda alikonda kwa mawazo na baba yake alimshangaa kwa mabadiliko ya afya ya mwili wake, hakuijua sababu ya tatizo hilo, alijitahidi kumpa mtoto wake kila alichotaka kama njia ya kumbembeleza akiamini  Belinda alichukizwa na adhabu alizompa.

Chuo kilipofunguliwa wiki mbili baadaye Belinda alirudi tena Mlimani na kuendelea na masomo yake ya Sheria lakini kitabu kikawa kigumu kwake kwani kila alipomfikiria Prosper akili yake ilizidi kuchanganyika na kupoteza pointi.

Kitu kingine kilichomshangaza zaidi ni mabadiliko ya hali yake ya afya, alianza kujisikia mchovu kupita kiasi hasa nyakati za asubuhi, uchovu ulioambatana na kichefuchefu na alitapika sana asubuhi, matiti yake yalianza kuvimba! Mwanzoni alifikiri ni malaria lakini alipokwenda kupimwa damu yake ilikuwa safi.

Hali yake iliendelea kuwa mbaya na alipitiliza mwezi mmoja katika mpangilio wake wa hedhi! Hilo ndilo lilimchanganya zaidi hatimaye  akaamua kupimwa kila kitu ndipo alipogundua kumbe alikuwa tayari ni mjamzito wa mwezi mmoja na nusu!

Belinda alichanganyikiwa, alishindwa kuelewa angemwambia nini mzee Thomson! Kila alipoufikiria ukali wa baba yake alizidi kuingiwa na hofu, alijua mzee yule angemuua,  asingemwacha hai hata kidogo kwani hayo ndiyo yalikuwa maongezi yake ya kila siku.

“Mtoto wangu akipata mimba ni lazima nimpige risasi!”

Kila alipoikumbuka kauli hiyo ya baba yake alitetemeka mwili  na hakujua ni kitu gani angefanya ili kujiepusha na hasira ya mzazi wake, alipoomba ushauri kwa rafiki zake walimwambia afanye kila alichoweza ili aitoe mimba hiyo kabla mambo hayajaharibika na mimba kuwa kubwa zaidi.

Jambo hilo lilimshinda Belinda, alikuwa na uhakika kabisa Prosper angenyongwa na asingemwona tena, alipenda abaki na ukumbusho wa Prosper mwanaume aliyempenda kuliko wanaume wengine wote duniani na ukumbusho pekee ulikuwa ni mtoto na Mungu alikuwa amelikubali hilo.

“Siwezi kuua mtoto wa Prosper lolote litakalokuwa na liwe!” Alisema Belinda.

Alivumilia na mimba yake chuoni mpaka ikafikisha miezi minne akawa haendi tena nyumbani kwao kila mwisho wa wiki, jambo lililowashtua ndugu zake na kuwafanya kaka zake waende shuleni kumuuliza lipi lilikuwa likimsumbua.

Ni hao ndio waliomgundua Belinda na mimba yake na bila hata kusita walizipeleka taarifa moja kwa moja kwa mzee Thomson! Belinda alihisi hilo lingetokea ni asubuhi ya siku iliyofuata tu alipopanda basi  kwenda Tabora nyumbani kwao na Prosper kujificha mpaka azae mtoto wake.

           

         ******************

Belinda aliingia Tabora jioni ya saa kumi akiwa amechoka hoi bin taaban, hakutaka kupoteza muda hata kidogo mjini alipanda basi la mwisho kumpeleka hadi kijijini Tutuo! Hakuwa na mzigo mwingine zaidi ya begi lililojaa nguo zake mwenyewe, hakuwa na pesa zaidi ya shilingi elfu kumi aliyokuwa amebakiza.

Alijua wazi kuwa alikokuwa anakwenda kulikuwa na taabu kubwa na nzito ikimsubiri, alijua tangu siku hiyo asingepata msaada wowote kutoka kwa baba yake  sababu alikuwa amemuudhi kupita kiasi! Isitoshe alijua wazi kuwa mama yake wa kambo na ndugu zake wangemjaza chuki baba yake ili azidi kumchukia.

“Lolote na liwe lakini  sipo tayari  kumuua mtoto wangu! Ni bora mimi niteseke lakini kiumbe hiki kizaliwe kama ni masomo nitaendelea nayo baadaye ingawa sina uhakika ni nani atanilipia ada!” Aliwaza Belinda wakati akitembea kuelekea nyumbani kwao na Prosper.

Alishangazwa na umati mkubwa wa watu aliouona alipokaribia nyumba yao, wanaume wengi walikuwa wamekaa katika miduara wakiota moto na wengine walionekana kula chakula! Belinda alishindwa kuelewa ni nini kilikuwa kimetokea.

Alipofika kwenye uwanja wa nyumba alishangaa kuwaona wifi zake wakija mbio huku wakilia  machozi! Wote walimkumbatia huku wakimtaarifa kuwa mama yao alikuwa amefariki asubuhi ya siku hiyo.

“Mama amefariki leo! Na hapa tulipo hata pesa ya sanda tumekosa!” Nyamizi alimwambia Belinda baada ya kuketi chini huku akilia na kujifuta machozi.

“Ni heri umekufa wifi maana hapa ndani hatuna hata senti, nafikiri utatusaidia pesa kidogo tukanunue sanda na kuchonga jeneza!”

Belinda alipofikiria pesa aliyokuwa nayo mfukoni ilikuwa ni shilingi elfu kumi peke yake, hiyo ndiyo ilikuwa maisha  yake hakuwa na tegemeo la  kupata pesa mahali pengine mpaka wakati wa kujifungua! Hakuwa na jinsi ilikuwa ni lazima asaidie, alichukua pochi yake  na kuifungua akatoa noti ya shilingi elfu kumi na kumkabidhi Nyamizi ambaye naye aliwakabidhi wazee wa kijiji ili waende kununua sanda.

Huo ndio ulikuwa mwisho wa Belinda kuwa na pesa, alielewa mbele kulikuwa na shida kubwa kwa sababu nyumbani kwao na prosper asingeweza kupata msaada wowote!

Pamoja na hayo yote hakuwa tayari kumuua mtoto wake.













Belinda alishindwa kuelewa 
maisha yangeendeleaje bila 
pesa, pesa pekee aliyokuwa amebaki nayo ilikuwa shilingi elfu kumi ambayo aliitumia kununua sanda ya mama yake Prosper! Hakuwa na jibu la jinsi gani angeitunza mimba yake mpaka kujifungua, aliielewa hali ya uchumi  kijijini Tutuo, alijua  dada zake na prosper waliobaki wangehitaji msaada kutoka kwake.

Aliona giza kubwa mbele yake lakini yote alimwachia Mungu, alikuwa tayari kwa lolote lakini si kurudi tena Dar es Salaam kwa baba yake, aliamini maisha yalikuwa yamembadilikia na hayo ndiyo yalikuwa maisha yake! Kulikuwa ni kuporomoka kwa aina yake lakini hakuwa na jinsi ya kuubadilisha ukweli huo hiyo ndiyo ilikuwa hali halisi.

Mwezi mmoja baadaye:

Maisha yalikuwa magumu sana kwa Belinda na familia nzima ya akina Prosper iliyotegemea yeye angetoa msaada, mara nyingi walilala na kushinda na njaa sababu ya kukosa chakula!Afya ya Belinda ilizidi kudhoofika, akakonda na alionyesha dhahiri dalili za kupungukiwa damu jambo alilokabiliana nalo kwa kula mboga za majani chukuchuku ambazo gharama yake ilikuwa ni kuzichuma tu na kuzipika.

Mara nyingi alikumbuka maisha ya starehe aliyoishi  nyumbani kwao, maisha hayo hayakuwepo tena ilimlazimu azoee hali aliyokuwa nayo.

Chakula chao kikuu kilikuwa mihogo na karanga, ambacho walikila mara moja kwa siku! Mihogo hiyo ilipatikana baada ya kufanya vibarua katika mashamba ya watu ya mihogo na ujira wao ulikuwa ni hiyohiyo mihogo waliyoitumia kula, Belinda alikuwa na mimba lakini alilazimika kwenda kufanya vibarua kwenye mashamba ya watu asubuhi mpaka saa kumi jioni.

Kwa mwanamke mjamzito ilikuwa ni kazi ngumu lakini alilazimika kuifanya ili aishi, ili kupata pesa ya kumwezesha kwenda kumwona Prosper gerezani kila jumapili,Belinda alilazimika kutafuta kazi ya kusomba maji na kupasua kuni nyumbani kwa mwarabu mmoja tajiri kijijini hapo! Kwa pipa moja la ndoo kumi na mbili Belinda alilipwa shilingi mia tatu, ilikuwa ni pesa kidogo sana lakini alilazimika kuikubali! Alitunza shilingi mia mbili na kutumia shilingi mia.

Akiba aliyojiwekea kwa kufanya kazi hiyo ndiyo ilimwezesha kuwalipia nauli wifi zake pamoja na yeye mwenyewe kwenda gerezani kumwona Prosper! Yalikuwa ni maisha ya huzuni kubwa  kwa Belinda aliyekulia katika familia ya kitajiri na yenye fahari kubwa lakini alilazimika kuyakubali.

Belinda alikonda na kukondeana, akabaki mifupa tupu ni mimba tu iliyoonekana mbele yake, nywele zilizotiwa dawa kichwani mwake zilichakaa na kulazimika kuzikata, pamoja na shida zote hizo bado Belinda hakuwaza kurudi kwa baba yake ambako alijua baba yake angemtoa roho.

“Nitafia hukuhuku Tutuo kamwe sitathubutu  kurudi kwa  baba nina uhakika atanichinja! Ninajua ameshaambiwa mambo mengi ya ajabu na mama na ndugu zangu wa kambo ili anichukie!” Aliwaza Belinda.

             **************

Belinda aliendelea kuishi na kuitunza mimba yake katika mazingira hayo magumu! Akipasua kuni na kusomba maji nyumbani kwa mzee Mohamed, zilikuwa ni kazi ngumu sana kwa mama mjamzito lakini hakuwa na chaguo jingine ilibidi azifanye hivyohiyo vinginevyo asingepata pesa ya kumpa mahitaji muhimu pamoja na nauli ya kumpeleka gerezani kila mwisho wa wiki.

Belinda alikuwa na uwezo wa kuamua kurudi Dar es Salaam na kuanguka miguuni mwa baba yake akiomba msamaha, aliamini pengine angeweza kusamehewa ingawa hakuwa na uhakika sana, alishindwa kufikia uamuzi huo kwa sababu alimpenda mno Prosper na hakuwa tayari kumwacha peke yake.

Alifanya kazi ngumu za kupasua kuni na kusomba maji kwa muda wa miezi minane ya mimba yake, hakukumbuka hata siku moja kwenda kliniki kupimwa maendeleo ya mimba yake, alichofanya ni kununua vifaa muhimu alivyoambiwa na akinamama wazoefu wa mambo ya uzazi kijijini kama vile mipira ya kuvaa mikononi,khanga za kutosha, wembe na nepi za mtoto wake.

Watu wote kijijini walimshangaa kwa jinsi alivyofanya kazi ngumu akiwa na mimba kubwa ya kujifungua wakati wowote, mwezi wa tisa wa mimba yake ulipoingia Belinda alizidiwa na kuishiwa na nguvu kabisa, alianguka siku moja wakati akipasua kuni chini ya jua kali na kuzimia, walimtoa juani na kummwagia maji akazinduka.

Mzee Mohamed mwarabu tajiri aliyekuwa akifanya kazi kwake alipopata taarifa hizo alimfukuza kazi sababu ya kuogopa angeweza kufia nyumbani kwake.

“Belinda iko wewe acha kazi sababu wewe uko na mimba kuba sasa!” Mzee Mohamed alimwita Belinda na kumwambia

“Hapana mzee ninaweza tu ile ilikuwa ni bahati mbaya kwani nilikanyaga mti nikaanguka chini, tafadhali niache nifanye kazi sina pesa ya chakula wala nauli ya kwenda kumwona mume wangu gerezani!” Belinda alimbembeleza mzee Mohamed lakini haikusaidia kitu amri ilishatolewa afukuzwe kazi na hivyo ndivyo ilivyokuwa.

Belinda  aliondoka nyumbani kwa mzee Mohamed akilia machozi kwani pesa aliyokuwa nayo ilikuwa haitoshi kumkamilishia kila kitu wakati wa kujifungua, alijua wangeitumia kwa chakula kabla miezi tisa kamili haijakamilika.

Hivyo ndivyo ilivyokuwa kwani mpaka Belinda anapatwa uchungu saa moja na nusu ya jioni siku ya Ijumaa ya mwezi huo wa tisa hakuwa na pesa yoyote  kama akiba yake, pesa yote alishaitumia kuwatunza dada zake na Prosper, Nyamizi na Kasanda ambao hawakujishughulisha na kazi yoyote pamoja na kuwa afya zao zilikuwa njema.

Hapakuwa na pesa ya kumpeleka hospitalini usiku ule ilibidi ateseke na uchungu mpaka asubuhi lakini bado hakujifungua, aliendelea mpaka saa tano asubuhi hali ilikuwa bado ileile mtoto hakuwa tayari kutoka, Belinda aliishiwa na nguvu  sababu ya kusukuma mtoto kwa muda mrefu bila mafanikio na mguu wake mmoja ulipoteza kabisa hisia.

Saa sita mchana Kasanda na Nyamizi walishtukia badala ya kichwa kutokeza katika njia ya uzazi mkono wa mtoto ulichungulia! Wote waliogopa na kulazimika kutafuta baiskeli na kukimbia hadi kijiji cha jirani kuchukua mkunga wa Jadi, naye alipokuja na kuiona hali aliyokuwa nayo Belinda alishtuka.

“Huyu alikuwa anakwenda Kliniki kweli?”

“Hapana!”

“Mh!” Mkunga aliguna.

“Tusaidie mama!”

“Sina uwezo wa kuwasaidia kama mna pesa tukodisheni gari tumpeleke hospitali!”

“Hatuna hata senti tano!”

“Sasa tutafanya nini?”

“Labda niende kwa mzee Mohamed nikaombe msaada!” Kasanda alisema kwa sauti ya upole.

“Wifi nisaidieni nitakufa!” Belinda alisema akiwa katika maumivu makali.

“Ngoja niende!” Alisema Kasanda na kutoka mbio kwenda kwa mzee Mohamed kuomba msaada wa gari. Aliporudi alikuwa na trekta lenye tela na Belinda alipakiwa mara moja ndani ya tela na safari ya kwenda hospitali ya mkoa, Kitete ilianza.

         ***************

Njia nzima Belinda aliendelea kusukuma lakini mtoto hakutoka, damu peke yake ndiyo zilivuja kwa wingi na kulichafua tela la trekta, hakuna mtu aliyekuwa na uhakika kuwa Belinda angepona katika tatizo hilo, walipofika hospitali walipokelewa na daktari alipopima alithibitisha kuwa mtoto aliyekuwepo tumboni alikuwa bado yuko hai ila mapigo yake yalikuwa yakiendelea kufifia.

 “Daktari huyu mama ana tatizo gani sasa?”

“Ah! Ana Malpresentation, nafikiri alikuwa haendi kliniki kupimwa mlalo wa mtoto!” Alisema daktari Kaniki bingwa wa magonjwa ya wanawake katika hospitali ya Kitete akimaanisha mtoto wa Belinda alikuwa amelala vibaya na kutanguliza mkono.

“Sasa tutafanya nini?”

“Hakuna la kufanya zaidi ya kumpeleka chumba cha upasuaji tukamfanyie Ceasserian section, tujaribu kuokoa maisha yake pamoja na ya mtoto!” Alijibu daktari akimaanisha ilikuwa ni lazima Belinda apelekwe chumba cha upasuaji  kufanyiwa operesheni ya uzazi.

“Amekula kitu chochote tangu jana?”

“Hapana!” Kasanda na Nyamizi waliitikia.

“Safi sana!”

Kwa haraka bila kuchelewa Belinda alibebwa kwenye machela na kukimbizwa chumba cha upasuaji ambako aliandaliwa na operesheni kufanyika, madaktari walifanikiwa kumtoa mtoto katika dakika zake za mwisho, rangi yake ya ngozi ilikuwa bluu sababu ya kukosa hewa ya oksijeni na alionekana kutohema na ikalazimika afungiwe mashine ya oksijeni ili mapafu yake yafanye  kazi.

“Amepata Cynosis!” Alisema daktari akiiongelea rangi ya bluu iliyokuwa katika mwili wa mtoto.

       ******************

Baada ya operesheni hiyo Belinda akiwa hajitambui alirudishwa moja kwa moja wodini ambako aliendelea kupata matibabu, mtoto wake alitunzwa katika chumba maalum  ambako aliendelea kupewa matunzo ya kumsaidia apumue vizuri.

“Daktari mgonjwa wetu atapona kweli?” Nyamizi alimuuliza daktari Kaniki.

“Atapona ila atakuwa na matatizo kidogo yaliyosababishwa na kuchelewa kufika hospitali!”

“Matatizo gani daktari?”

“Belinda ametoboka tundu kati ya mfuko wa mkojo na njia ya uzazi! Hali hii sisi kitaalamu tunaiita Vaginal vesco fistula au kwa kifupi VVF kwa hiyo mkojo utakuwa unatoka tu wenyewe na wakati mwingine  utatokea ukeni! Ni hali ngumu kidogo kuishughulikia itabidi Belinda abaki hapa hospitali kwa muda mrefu kidogo!”

“Matibabu yake ni nini?”

“Matibabu yake ni mpaka operesheni tu na hii itafanyika baada ya miezi mitatu hadi sita katika muda huu wote mkojo utakuwa unatoka peke yake!”

“Kuna tatizo jingine lililojitokeza daktari?”

“Ndiyo mguu wake wa kushoto umepoteza hisia kwa sababu mshipa wa fahamu unaoshughulika na mguu huo uligandamizwa na mtoto! Lakini hili si tatizo kubwa sana baada ya muda akifanya mazoezi hali yake itakuwa nzuri!” Alimaliza daktari na kuwaaga Nyamizi na Kasanda.

Walibaki katika masikitiko makubwa na hawakujua nini wangefanya kumsaidia Belinda katika tatizo alilokuwa nalo na hawakuwa na uhakika kama mtoto angepona.

 Miezi miwili baadaye:

Belinda alikuwa bado yuko hospitali akisubiri siku tisini zitimie ili afanyiwe operesheni, muda wote huo alimkumbuka Prosper gerezani, hakuna siku hata moja iliyopita bila kumfikiria na alitamani atoke hospitalini na kwenda gerezani Isanga  kumwona lakini haikuwezekana.

Hali aliyoambiwa na daktari ilikuwepo! Mkojo ulivuja wenyewe na kulowanisha nguo zake, alitoa harufu mbaya  kiasi kwamba wagonjwa wenzake hawakupenda kabisa kukaa naye!

Alishangaa mpaka muda huo baba yake alikuwa bado hajamtafuta, hilo lilimuumiza sana moyo wake na zaidi ya hilo wifi zake walikomea siku moja aliishi kwa   kutegemea   misaada ya ndugu wa wagonjwa wengine waliomhurumia walipokuja wodini kusalimia ndugu zao na kusikia habari yake.

Ilikuwa ni siku  ya Jumamosi asubuhi daktari Kaniki alipokuwa akipita raundi wodini, alipokifikia kitanda cha Belinda alianza kutabasamu na kumwita Belinda kwa jina.

“Naam daktari!”

“Nafikiri sasa hivi hali yako ni nzuri kidogo inabidi urudi nyumbani uje baada ya mwezi mmoja ili tuone kama tutaweza kukufanyia operesheni!”

“Sawa daktari lakini......!”

“Kwani vipi Belinda?”



“Wifi zangu hawajaja kuniangalia tena, nina wasiwasi wanaweza wakawa hawataki niende tena kwao!”

“Sasa tufanye nini?”

“Daktari ungeniacha tu nikae hapa wodini!”

“Belinda haiwezekani kukaa wodini siku zote hatuna vitanda kabisa! Nakuomba tu uende nyumbani na  urudi baada ya muda huo, hali yako inaendelea vizuri!” Alimaliza daktari na kuhamia kitanda cha mgonjwa mwingine.

Belinda alijikunja kitandani na kumkumbatia mtoto wake  Alikuwa ni mtoto mzuri aliyefanana na baba yake Prosper kwa kila kitu.

Belinda alishindwa kuelewa angepokelewa vipi nyumbani na watu ambao walimfikisha tu hospitali na kuondoka zao! Lakini hakuwa na mahali pengine kwa kwenda mkoani Tabora zaidi ya kurudi Tutuo, siku ya Jumatatu asubuhi alimbeba mtoto wake mgongoni na kuondoka hospitali.

Alikuwa akichechemea kwa sababu mguu wake bado ulikuwa hauna fahamu vizuri pamoja na kufanya mazoezi kwa muda mrefu, hakuwa na nauli alichechemea hadi kituo cha mabasi ambako badala ya kupanda basi la kwenda Tutuo aliomba msaada katika basi la kwenda Isanga gerezani, hakuwa mvumilivu siku hiyo ipite bila kumwona Prosper! Alikuwa amemkumbuka mno na alitaka Prosper amwone mtoto wao.

“Mh! Jamani humu ndani kuna mtu amebeba samaki waliooza nini?” Mmoja wa abiria aliuliza, hali ya hewa ndani ya basi alilopanda ilikuwa nzito sababu ya harufu.

Belinda alijua harufu hiyo  ilitokanana na nini lakini hakutaka kuwaeleza ukweli, swali hilo la abiria lilimuumiza sana moyo wake akajikuta akilia! Nguo zake zote zililowa mkojo uliotoka bila fahamu zake sababu ya tundu alilotoboka wakati wa kujifungua.

Aliposhushwa kituo cha gerezani Isanga abiria wote waligundua kuwa harufu ile ilitokana na yeye, kwani waliona  nguo zake zikiwa zimelowa mkojo.

“Hiloooo! Kubwa zima linajikojolea!” mpiga debe wa gari alimzomea.

Belinda aliumia sana moyo wake  na kujikuta akilia machozi, hakupenda kuwa alivyokuwa ilikuwa ni bahati mbaya katika maisha, alikuwa ni mtoto wa tajiri kuliko mpiga debe aliyemzomea.

Alichechemea hadi gerezani ambako alijitambulisha kwa maaskari kama mke wa mfungwa Prosper, maaskari walimwambia siku hiyo ilikuwa si ya kuwaona wafungwa lakini alipowaeleza hali halisi iliyotokea na kwamba alikuwa akitokea hospitali maaskari walimwonea huruma na kumwingiza katika chumba alichokutana na Prosper mara kwa mara kabla ya kuugua na kulazwa hospitalini!

“Subiri tumwite!”

“Ahsante nasubiri!” Belinda alijibu.

Dakika chache baadaye Prosper aliingia chumbani akiongozana na mwanaume mwembamba mrefu aliyekuwa amemshika kiunoni, mtu huyo alionekana mgonjwa! Alikohoa mfululizo na nywele zake zilikuwa nyepesi sana kichwani, alionekana ni kama mgonjwa wa Ukimwi, Belinda alipomwangalia vizuri mtu huyo alimtambua alikuwa ni Savimbi!

Belinda alishindwa kuelewa ni kwanini Savimbi  alikuwa amekonda kiasi kile lakini hakutaka kuuliza, yeye na Prosper walikumbatiana na kusalimiana kwa furaha! Ulikuwa umepita muda mrefu sana bila kuonana.

“Huyu ndiye mtoto wako nimemleta umwone! Ila alitaka kunitoa roho, nashukuru Mungu leo niko hai!”

“Pole sana Belinda, ninajua unateseka sana kwa ajili yangu Mungu atakulipia!”

Waliongea mengi yaliyopita katikati yao, wakati Savimbi aliendelea kukohoa mfululizo na jasho jingi likimtoka! Hatimaye aliamua kutoka nje kwenda kupunga upepo.

“Kipenzi changu Pros, nipo nje napunga upepo mama!” Savimbi alisema na kunyanyuka kisha akampiga busu Prosper usoni na kutoka nje.

Belinda alipata uhakika wa kilichokuwa kikiendelea kati ya Prosper na Savimbi, alishindwa kujizuia na kuanza kulia mbele ya Prosper.

“Prosper tafadhali niambie ukweli nini kinaendelea kati yako na Savimbi nimejiuliza maswali mengi sana leo naomba unipe majibu!”

Prosper alimwangalia Belinda kwa macho ya huruma, alionekana mnyonge, alionekana kuwa na kitu moyoni alichotaka kukisema lakini alishindwa aanzie wapi.

“Tafadhali niambie Prosper vinginevyo mimi nakuacha narudi Dar es Salaam kwa baba yangu!”

“Usifanye hivyo Belinda!”

“Basi niambie!”

“Ninaweza kukuambia lakini tafadhali niahidi kitu kimoja!”

“Kitu gani?”

“Kwamba utanifichia siri na hutaniacha!”

“Itategemea Prosper! Lakini ni lazima unieleze vinginevyo naondoka nina wasiwasi kuna uhusiano mbaya kati yako na Savimbi kweli sio kweli?”

“Ni kw...eli Beli...nda! Nisa..mehe Beli..nda, Savi..mbi alinis..hawishi, alijifanya msamaria kwangu akawa ananipa chakula kizuri  chenye mafuta, sukari nikafikiri ni mtu mwema lakini siku moja usiku niliamka na kukuta.....!”



Prosper aliingia gerezani kwa kosa la mauaji ambalo hakulifanya! Ni mama yake aliyemuua baba yake lakini ili kumtoa mama yake kifungoni, prosper alikwenda polisi na kusema ni yeye aliyemuua baba yake ingawa wakati wa tukio hakuwepo.

Prosper yuko gerezani ambako amekutana na jambazi Savimbi na kufundishwa mchezo usiostahili, Belinda mpenzi wa prosper waliyezaa naye mtoto mmoja ameligundua hilo la kumuomba Prosper aeleze ukweli! Prosper anakubali kueleza ukweli kwa sharti la kutoachwa na Belinda, je Belinda atachukua hatua gani? Fuatilia...



Huku akilia machozi Prosper aliendelea kumsimulia Belinda kila kitu kilichotokea kati yake na Savimbi ndani ya gereza, lilikuwa jambo la aibu lakini alilazimika kuliweka wazi kwa sababu Belinda alitoka kufahamu.

“Ni kweli Belinda nisam...ehe mwenz’...angu, nisamehe mke wangu mtarajiwa, ni kweli Savimbi ananifanyia kitendo hiki! Alijifanya mweka kwangu tulipoingia gerezani akawa ananipa chakula kizuri, sukari, maji ya kunywa na kila nilipotaka kupigwa na wafungwa alinikingia kifua kwani mie ndiye nilikuwa mfungwa mdogo kuliko wote kwa wakati huo! Kumbe alikuwa na nia mbaya ambayo mimi sikuifahamu tangu awali, hakuacha kunisifia eti nilikuwa na sura na umbile zuri, lakini mimi sikujali nilichukulia kitu cha kawaida kumbe alinitamani kimapenzi!”

“Halafu ikawaje?”Aliuliza Belinda kwa mshangao.

“SIku moja usiku nilizinduka usingizini na kumkuta akinipapasa mwili wangu, nilinyanyuka na kukaa huku nikimuuliza ni kitu gani alichotaka kufanya ndipo aliponieleza wazi kuwa alinitaka mapenzi mimi mwanaume mwenzake!”

Belinda alibubujikwa na machozi ya uchungu wakati akisikiliza maelezo ya Prosper jambo alilokuwa akilisikiliza haikuwa mara yake ya kwanza kulisikia alishalisikia kabla na alihisi lingekuwepo kati ya Prosper na Savimbi.

“Siku alipofanya hivyo ilikuwa ni usiku na wafungwa wote walikuwa usingizini, hakuna mtu aliyesikia kitu chochote, nilinyanyuka na kuanza kukimbia kwenda nje ambako Savimbi alinifuata na kuendelea kunishika ili aniingilie kwa nguvu.

“Aliweza?”Belinda hakuwa mvumilivu, alitaka kujua ni kitu gani kilitokea ingawa hakutaka kabisa mwisho wa habari hiyo uwe Prosper kufanya kitendo hicho.

“Hapana!”

“Afadhali, ulifanya kitu gani kujiokoa?”

“Nilichukua ubao mkubwa uliokuwepo na kumpiga nao usoni akaanguka chini na damu nyingi zikamtoka!”

“Kwa hiyo hakukufanya kitu?”

“Siku hiyo ndiyo! Lakini asubuhi kulipokucha Savimbi alikuwa amenichukia sana hakusema na mimi kitu chochote na aliniambia kuwa ningekiona cha mtema kuni! Asubuhi hiyo sikupata chai aliyokuwa akinipa kila siku pia sikupata chakula wala maji! Usiku ulipoingia nililala sakafuni kwani alininyang’anya godoro lake, hiyo haikutosha siku iliyofuata alitoa taarifa kwa mkuu wa gereza kuwa mimi nilimpiga kichwani na ubao baada ya kugoma kupasua kuni kitu ambacho hakikuwa kweli, kwa sababu yeye Savimbi alikuwa nyampara alisikilizwa zaidi na mkuu wa gereza kuliko mimi!

“Walikufanya nini baada ya hapo?”

“Nikaadhibiwa kwa kupigwa viboko ishirini na ni Savimbi huyohuyo aliyenichapa., niliumia sana!”Alisema Prosper kwa sauti ya upole.

“Pole sana Prosper sikujua kama ulipata mateso hayo yote sasa kwa nini hukuniambia?”

“Hukuwepo darling wakati huo wewe ulikuwa bado upo shule ulikuwa hujaja hapa Tabora!”

“Kiliendelea kitu gani baada ya hapo?”

“Gereza liligeuka Jehamanu kwangu! Nilifanyishwa kazi ngumu, niliteswa kwa kunyimwa chakula na hata maji ya kunywa na katika muda wote wa mateso hayo Savimbi akawa anamhudumia kijana mwingine mwenye umri sawa na wangu ambaye aliingizwa gerezani muda mfupi baada ya mimi kukataa.Kila mara Savimbi alinifuata na kuniambia kuwa nikitaka kuishi vizuri gerezani ilikuwa ni lazima tu nikubaliane na matakwa yake, bado nilikataa!”

“Hongera sana Prosper!”

“Ahsante  lakini ngoja kwanza nimalizie kukusimulia kila kitu Darling!”

“Haya endelea?”

“Mwezi mmoja tu baadaye nilishangaa kuona savimbi akirejesha huduma zake kwangu tena! Nilishindwa kukataa kwa  sababu ya shida na nikawa nakula chakula kizuri tena, akanipa godoro na kunipunguzia kazi gerezani, maisha yakawa mazuri, hakunieleza tena juu ya kufanya kitendo hicho lakini siku moja alinipa chai ya rangi jioni, baada ya kuinywa chai hiyo mwili ulilegea na nikapitiwa na usingizi na kumkuta Savimbi akinifanyia viba......!” Prosper alishindwa kumalizia sentensi yake na kuanza kulia, belinda nae alishindwa kuvumilia na kuanza kulia akiwa na mtoto wake mkononi!

“Nisamehe sana mke wangu! Nisamehe Belinda! Nililazimika kufanya hivyo  kwa sababu ya shida, yalikuwa ni mateso makali mno!”Alisema prosper akiwa ameinamisha kichwa chini.

“Nini kilifuata?”

“Na baada ya hapo tuliendelea kufanya hivyo mara kwa mara, nisamehe belinda lakini pamoja na  hayo yote bado nakupenda wewe pamoja na mtoto wangu na nitabadilika!”

“Prosper! Prosper! Ulishindwa nini kuvumilia mpenzi? Huwezi kuwa mwanaume wa kawaida tena!”Alisema Belinda huku akilia.

“Hapana Belinda nipo kawaida na ninakuahidi kubadilika na kama ikatokea nikatoka gerezani tuendelee na maisha yetu!”

“Prosper umeniumiza sana! Na kwa heri ya kuonana!”Alisema Belinda na kuanza kusimama wima alitembea hadi nje bila kugeuka nyuma, machozi yaliendelea kumbubujika na kulowanisha nguo zake, alikuwa ameumia kupita kiasi, hakutegemea kama mwanaume aliyempenda angeweza kutenda jambo hilo! Aliumia kiasi cha kuusahau hata ugonjwa uliokuwa ukimsumbua kwa muda mrefu!

“Belinda! Belinda! Belinda! Tafadhali rudi mpenzi nisamehe sitafanya tena jambo hili!” Alimsikia Prosper akisema wakati akitoka nje ya gereza lakini hakutaka hata kuangalia nyuma! Kila alipoikumbuka picha ya Savimbi amemkumbatia mume wake alizidi kupata uchungu zaidi.

“Narudi kwa baba yangu siwezi tena kukaa hapa kama tu anayenisababishia mimi shida hizi ndiye aliyenifanyia ukatili huu!” Alisema Belinda wakati akitoka gerezani.

Hakuwa na nauli ya kulipia usafiri wa gari kutoka gerezani Isanga hadi Tabora mjini na isitoshe hakutaka kusababisha usumbufu kwa abiria kwa harufu aliyokuwa nayo hivyo aliamua kutembea kwa miguu mpaka mjini ulikuwa ni umbali mrefu lakini Belinda hakujali.

Maisha ya Belinda wakati huo yalikuwa tofauti sana na alivyokulia, hakuwahi hata siku moja kutegemea angekuja kuishi maisha ya taabu kiasi hicho wakati nyumbani kwa baba kulikuwa na kila kitu, lakini hiyo ndiyo hali aliyokuwa nayo.

Alitembea kama kilometa tano katika barabara ya vumbi mtoto wake akiwa mgongoni na mfuko wa rambo uliojaa nguo zake ukiwa mkono wake wa kushoto! Miguuni hakuwa na kiatu na miguu yake ilichanika ilikuwa si rahisi hata kidogo kufahamu kuwa Belinda alikuwa ni miongoni mwa watoto wa matajiri nchini Tanzania.

“Piiii! Piiii!Piii!” ilikuwa ni honi ya gari ikipigwa nyuma yake Belinda alikuwa akitembea katikati ya barabara bila kufahamu aliruka na kuangukia pembeni mwa barabara, dereva wa gari lile aliyempakia mwanamke aliyeonekana kuwa mkewe alimuonea huruma Belinda na kulazimika kukanyaga breki gari likasimama ghafla.

“Pole binti!”Alisema dereva baada ya kugundua kuwa alimshtua Belinda.

“Ahsante sana na samahani dereva!” Alisema belinda huku akijaribu kunyanyuka ardhini.

“Unakwenda wapi binti?”

“Nakwenda mjini Tabora!”

“Basi twende!”

“Hapana nyie nendeni tu mimi nitatembea kwani nina matatio!”

Belinda alikataa katakata kupanda ndani ya gari pamoja na dereva aliyeonekana kuwa mzee wa makamo kuendelea kumsisitia Belinda apande kitu cha nyuma cha gari na alipoona Belinda hataki kusikia aliteremka akachukua mzigo wake na kuuingiza ndani kisha akafungua mlango na kumwomba Belinda aingie, alifanya hivyo kwa shingo upande na safari ikaanza.

“Jamani samahani kama hali ya hewa itachafuka kidogo hapa ndani nina tatizo nililolipata wakati nilipojifungua!”

“Tatizo gani?”

“Nilitoboka tundu!”

“Aha! Una VVF siyo?”Mwanamke aliyekaa upande wa kushoto kwa dereva aliuliza.

“Ndiyo!”

“Usijali hili ni tatizo la kawaida tu kwa mwanamke hata mimi linaweza kunipata jisikie vizuri binti mimi naitwa Dk. Zubeda Katunzi ninafanya kazi hospitali ya Kitete wodi ya watoto na huyu ni mume wangu anaitwa Bwana Katunzi Katagile yeye ni afisa mifugo wa mkoa wa Tabora! Pole sana!”

“Ahsante mama!”

“Huyu ndiye mtoto wako wa kwanza?’

“Ndiyo!”

“Alikuwa mkubwa sana wakati wa kujifungua eeh ndiyo sababu akakusababishia tatizo?”

“Hapana alitanguliza mkono!”

“Mkono? hukuhudhuria kliniki wakati wa ujauzito wako?”

“Sikuwahi kwenda hata siku moja!”

“Pole sana na huku umetoka wapi?”

“Nimetoka gerezani ambako baba  wa mtoto huyu ameshinikiliwa!”

“Pole sana na alifanya nini?”Mzee Katunzi Kategile aliuliza.

“Wanasema alimuua ma..ma ya....ke!”Belinda alishindwa kujizuia na kuanza kulia tena.

Mzee Katunzi na mke wake waliendelea kumbembeleza wakati gari likiendelea na safari mpaka Belind aliponyamaza. walimuomba awaeleze zaidi juu ya kilichotokea!

“Kwa hiyo wewe ni mtoto wa mzee Thomson.

“Ndiyo!Mimi ndiye mtoto wake wa kwana!”

“Oh my God! Why did Thomson do this?(Oh Mungu wangu kwanini Thomson alifanya jambo hili?) Alisema Dk. Katunzi.

“Hata mimi mwenyewe sifahamu!”

“Tunamfahamu baba yako sana na mara kwa mara huwa tunaonana naye Dar es salaam unataka tukusaidie nini binti?”

“Nataka kurudi kwa baba sitaki kitu kingine tena, nisaidie nauli ya treni ili niondoke siku yoyote kurudi Dar es Salaam!”Aliendelea kusema Belinda huku akilia machozi.

Gari lilikuwa likiingia mjini Tabora mzee Katunzi na mkewe walikuwa kimya gari liliendeshwa hadi nyumbani kwao eneo la Kanyenye mjini Tabora kitu cha kwanza walichofanya baada ya kuuingia ndani ni kumpigia simu mzee Thomson nyumbani kwake Dar es Salaam ili kumuuliza kama alikuwa na mtoot aliyeitwa Belinda.

“Belinda?”

“Ndiyo na tena ana mjukuu wako?”

“Hakuna mtoto mwenye jina hilo hapa kwangu, mzee Thomson alikata simu kwa makusudi ingawa alimfahamu Belinda alikuwa bado na hasira kali kwa Belinda baada ya kupata mimba na alijazwa maneno mengi ya chuki kutoka kwa mama wa kambo wa Belinda.

“Wewe msichana umetudanganya siyo?”

“Kwanini?”

“Mbona mzee Thomson anakataa?”

“Hapana huyo ni baba yangu kabisa!”

“Wewe ni tapeli?”

‘Hapana kama hamuamini nipeni simu mimi niongee naye!”Belinda alisema lakini hakuruhusiwa kuigusa simu.

“Tunasikitika hatuwezi kukusaidia kitu chochote binti!”

“Baba nisaidie tafadhali, nisaidieni kama mtoto wenu!”Alisema Belinda.

Mzee Katunzi  na mkewe walimuonea huruma Belinda na kuamua kumsaidia pesa ya nauli kumrudisha Dar es Salaam peke yake na hivyo ndivyo ilivyokuwa kwani siku iliyofuata Belinda alikuwa ndani ya behewa daraja la tatu akielekea Dar njia nzima alilia machozi, aliumia sana kusikia baba yake alimkataa, pamoja na hayo bado alikuwa ameamua kwenda kuonana naye na kuomba msamaha!



Alijingia Dar saa 12 ya jioni na treni la abiria, kwa pesa kidogo iliyokuwa imebaki alikodisha teksi na kwenda moja kwa moja hadi nyumbani kwao.

“Niteremshe hapa hapa!” Alimwambia dereva teksi na kisha akamlipa pesa yake.

Baada ya teksi kuondoka alinyoosha moja kwa moja hadi getini ambako aliingia hadi ndani, watu wa kwanza kukutana nao walikuwa ni kaka zake wa kambo, walimwangalia kwa mshangao, alipowaamkia hakuitikia, waliendelea kucheza mpira wa kikapu katika kiwanja kilichokuwemo ndani ya ngome ya nyumba yao.

“Na wewe hicho kitoto chako unakipeleka wapi?” Walimuuliza Belinda kwa kejeli lakini hakuwajibu kitu alizidi kusonga mbele kuelekea nyumba kubwa waliyoishi.

Alikuwa nyumbani kwao kwa mara nyingine baada ya kukaa na kuteseka nje kwa muda mrefu, hakujua ni kitu gani kingetokea baada ya kukutana na baba yake lakini hilo hakulipa nafasi sana, alichotaka ni kukutana na baba yake na kumuomba msamaha basi!

Kabla hajaingia ndani mlango ulifunguliwa na baba yake alitoka nje na kumkuta, palepale sura yake ilibadilika.

ITAENDELEA